Сепаня 1 - Мукаддес Китап

1‑нҗи бап

¹ Амоның оглы Ёшыяның Яхудада патышалык сүрйән дөврүнде Кушының оглы, Гедаляның агтыгы, Амаряның човлугы, Хизикияның ювлугы Сепаня Реббиң шу сөзи аян болды.

Реббиң хөкүм гүни гелйәр

^2-3 «Ер йүзүнден бар зады бүтинлей сырып-сүпүрҗек. Ынсану-хайваны, гөкдәки гушлары, деңиздәки балыклары сүпүрип ташлаҗак. Пислери бүдретҗек, ынсаны ер йүзүнден ёк этҗек». Муны Реб айдяндыр.

⁴ «Яхуда, хатда Иерусалиме гаршы эл галдырарын, Багал худайының гулларыны гырарын, Бутпараз руханылары ёк эдерин.

⁵ Тамың үчегинде асман җисимлерине сежде эдйәнлери, Реббе сежде эдип, Ондан ант ичйәнлери, Молек бутундан ант ичйәнлери,

⁶ Ребден йүз өвренлери, Ребби агтармаянлары, Ондан маслахат алмаянлары бу ерден ёк эдерин».

⁷ Хөкмүрован Реббиң хузурында дым! Чүнки Реббиң гүни голайдыр, Реб гурбанлык тайынлады, чагыранларыны пәкләп мукаддес этди.

⁸ «Шол гурбанлык гүни Мен хөкүмдарлары, шазадалары, ят адатлара эерйәнлери җезаландырарын.

⁹ Шол гүн галп худайлара сежде эдйәнлери, Өз худайларының бутханасыны зулум хем хиледен долдурянларың барыны җезаландырарын».

¹⁰ Реб шейле диййәр: «Шол гүн Балык дервезесинден ахы-нала, шәхериң тәзе бөлегинден дады-перят, байырлардан гүңлеч сес эшидилер.

¹¹ Эй, базарың голайында яшаянлар, перят эдиң! Әхли сөвдагәрлериңиз ёк эдилер, күмүш өлчейәнлериңизиң бары гырлар.

¹² Шонда Мен Иерусалими чыра билен агтарып, дүйбүне чөкен шерап лөдереси дейин чөкүп, ичлеринден: „Реб не ягшылык, не-де яманлык эдер“ дийип, текепбирлик эдйәнлери җезаландырарын.

¹³ Мал-мүлклери олҗа болар, җайлары хараба дөнер, җай салынсалар-да, яшамазлар онуң ичинде, үзүм агачларыны отурдарлар, эмма оларың шерабындан ичмезлер».

¹⁴ Голайдыр Реббиң хөкүм гүни, голайдыр, Ине, етип гелйәндир ол. Хасратлыдыр Реббиң шол гүни, батыр эсгер аҗы перят эдер.

¹⁵ Шол гүн – газап гүни, бетбагтчылык, мушакгат гүни, вейранчылык ве харабалык гүни, гараңкылык ве гам-гусса гүни, булутлы ве түм гараңкылык гүни болар.

¹⁶ Галалара ве бейик диңлере хүҗүм эдилип, уруш сурнайы чалнып, дуйдурыш берилҗек гүндүр ол.

¹⁷ Мен ынсанларың башына мушакгат индерерин. Олар көр адам кимин йөрәрлер, ганлары сув дейин дөкүлер, беденлери дерс кимин чүйрәр, чүнки олар Реббе гаршы гүнә этдилер.

¹⁸ Реббиң газаплы гүнүнде, алтын-күмүшлери халас эдип билмез олары. Реббиң габанҗаңлык одунда бүтин дүнйә янып күл болар, чүнки Реб ер йүзүнде яшаянларың барыны гырып ёк эдер.