Rimliler 4 - Мукаддес Китап

4‑нҗи бап Ыбрайымың иманы

¹ Ёкарда айдыланлары назара алып, атамыз Ыбрайым бабатда нәме айдып билерис?

² Эгер Ыбрайым Худайың назарында ягшы ишлери аркалы акланан болса, онда, догрудан-да, өвнүп билерди, эмма Худайың өңүнде дәл.

³ Чүнки Мукаддес Язгыда: «Ыбрайым Худая иман этди ве Худай оны догры хасаплады» дийип язылгыдыр.

⁴ Хайсыдыр бир иш эдйән адам өз чекен зәхмети үчин хак аляндыр. Бу пешгеш дәлдир.

⁵ Эмма гүнәкәрлери аклаян Худая иман эдйән адам хич иш этмесе-де, иман эдйәндиги үчин Худайың хузурында акланяндыр.

⁶ Ине, ягшы ишлери этмесе-де, Худай тарапындан акланан адамы Давут хем багтыяр сайып, шейле диййәр:

⁷ «Языгы багышланан, гүнәси өртүлен адам нәхили багтлы!

⁸ Реб тарапындан этмиши хасаба алынмаян адам нәхили багтлы!»

⁹ Эйсем бу багтыярлык диңе сүннетлилере дегишлимидир? Я-да сүннетсизлере хем дегишлимикә? Озал айдышымыз ялы, Худай Ыбрайымың иманы үчин оны догры хасаплады.

¹⁰ Эгер шейле болса, хачан догручыл хасаплады? Сүннетленмәнкәми я-да сүннетлененден соң? Ёк, соң дәл-де, өң догручыл хасаплады!

¹¹ Ыбрайым сүннетленмәнкә иман этди, сүннети болса иман аркалы алан акланмасының мөхүри хөкмүнде кабул этди. Шейдип, Ыбрайым сүннетсизликде иман эдип, догручыл хасапланан хер бир адамың атасы болды.

¹² Шейле-де, атамыз Ыбрайым сүннетлилериң хем атасыдыр. Йөне шейле сүннетлилериң иманы Ыбрайымың сүннетленмеден озал иман эдиши ялы болмалыдыр.

¹³ Худай Ыбрайыма ве онуң неслине дүнйәни мирас бермеги вада берди. Бу вада Ыбрайыма Мусаның Кануныны берҗай эдендиги үчин дәл-де, иман эдип, Худайың назарында догручыл хасапланандыгы үчин берилди.

¹⁴ Чүнки Мусаның Кануныны берҗай эдйәнлер дүнйәни мирас алҗак болсалар, онда иман әхмиетини йитирерди, ваданың бахасы болса көр көпүк боларды.

¹⁵ Себәби бу Кануның бозулмагы Худайы газапландыряр. Эмма Кануның болмадык еринде Кануны бозмаклык-да ёкдур.

^16-17 Шоңа гөрә-де, берлен ваданы иман аркалы алып боляндыр. Вада мерхеметли пешгеш болуп, Ыбрайымың тутуш неслине – диңе Мусаның Канунына эе боланлара дәл, эйсем Ыбрайым ялы иман эдйәнлериң барына дегишлидир. Мукаддес Язгыда Худайың Ыбрайыма: «Сени көп миллетлериң атасы этдим» дийши ялы, Ыбрайым Худайың назарында әхлимизиң атамыздыр. Себәби ол мерхумлары дирелдйән ве озал болмадык затлары бар эдйән Худая иман этди.

¹⁸ Худай Ыбрайыма «Сениң сан-саҗаксыз неслиң болар» дийип айдыпды. Шонуң үчин-де, Ыбрайым көп миллетлериң атасы болмага хич умыдының галмандыгына гарамаздан, иманы себәпли умытдан дүшмеди.

¹⁹ Ол яшының йүзе голайлап, билинде кувватының галмандыгына, Сараның өнелгесиздигине гарамаздан, иманында говшамады.

²⁰ Худайың берен вадасына шүбхеленип, имансызлык этмеди. Терсине, иманда беркәп, Худайы шөхратландырды.

²¹ Ол Худайың Өз берен вадасында тапылҗакдыгына долы ынанды.

²² Ине, шейле иманы үчин Худай «оны догры хасаплады».

²³ Бу сөзлер диңе Ыбрайыма дегишли дәлдир.

²⁴ Бу бизе, ягны Реббимиз Иса Месихи өлүмден дирелден Худая иман эдип, догручыл хасапланянлара хем дегишлидир.

²⁵ Иса Месих бизиң гүнәлеримиз үчин өлүме табшырылып, Худайың назарында акланылмагымыз үчин дирелдилди.