Rimliler 13 - Мукаддес Китап

13‑нҗи бап Хәкимиете табынлык

¹ Хер бир ынсан өз үстүнден хөкүм сүрйән хәкимиете табын болсун, себәби Худай тарапындан болмадык хәкимиет ёкдур. Хөкүм сүрйән хәкимиетлер Худай тарапындан белленендир.

² Шоңа гөрә, хәкимиете гаршы чыкян хер кес Худая гаршы чыкып, җеза дучар болар.

³ Ягшы иш эдйәнлер хәкимиет ёлбашчыларындан горкмаярлар. Олардан яман иш эдйәнлер горкяндырлар. Хәкимиетден горкман яшасың гелйәрми? Ягшы ишлери эт, шонда хәкимиет сени тарыплар.

⁴ Себәби хәкимиет ёлбашчысы сениң ягшылыгың үчин Худайың хызматкәридир. Яман иш эдйән болсаң, хәкимиет ёлбашчысындан горк, себәби ол гылыҗы йөне ере гөтерйән дәлдир. Ол Худайың хызматкәридир, яман иш эдени җезаландырып, Худайың газабыны онуң үстүнден индерйәндир.

⁵ Шоңа гөрә, диңе җеза дучар болмак горкусындан дәл, эйсем ынсабыңызы пәк сакламак үчин хәкимиете табын болмалыдыр.

⁶ Сиз салгытлары хем шу себәбе гөрә төлейәнсиңиз. Себәби хәкимиет ёлбашчылары өз борчларыны берҗай этмек билен, Худая хызмат эдйәндирлер.

⁷ Шоңа гөрә-де, хер кесе берилмелисини: салгыт болса – салгыды, гүмрүк болса – гүмрүги, горкы болса – горкыны, хормат болса – хорматы бериң.

Бири-бириңизи сөйүң

⁸ Бири-бириңизе сөйгүден башга бергиңиз болмасын, себәби якыныны сөййән адам Мусаның Кануныны берҗай эдйәндир.

⁹ Чүнки «Зына этме, адам өлдүрме, огурлык этме, башганың задына гөз дикме» диен ве башга буйрукларың бары «Якыныңы өзүңи сөйшүң ялы сөй» диен буйрукда җемленендир.

¹⁰ Якыныны сөййән адам оңа яманлык эдйән дәлдир. Шейдип, башгалары сөййән адам Мусаның Кануныны берҗай эдйәндир.

¹¹ Шонуң үчин-де, бири-бириңизи сөйүп яшаң, хәзир замананың нәхилидигини билйәнсиңиз. Укудан оянмалы сагадымыз гелип етди, себәби бизиң халас болмалы пурсадымыз Иса Месихе иман эден вагтымыздакыдан хас голайландыр.

¹² Гиҗе гечип, гүндиз голайлады. Шоңа гөрә түмлүгиң ишлерини гойболсун эдип, нуруң ярагларыны дакыналың.

¹³ Кейпи-сапалык, серхошлык, зынахорлык, азгынлык, гөриплик, дава-җенҗел этмән, гүндизе ярашян тәрде эдепли яшалың.

¹⁴ Ынсан хөвеслериңизи нәдип канагатландыраркам дийип ойланмаң-да, гайтам, Реббимиз Иса Месихе беслениң.