Resul 1 - Мукаддес Китап

1‑нҗи бап Иса Мукаддес Рухы вада берйәр

¹ Эй, Теофил! Мен биринҗи китабымда Исаның тә гөге гөтерилен гүнүне ченли башдан-аяк битирен ве өвреден әхли ишлери барада яздым.

² Ол гөге гөтерилмезден өң, Мукаддес Рух аркалы Өз сайлан ресулларына буйруклар берди.

³ Иса эҗир чекип өленден соң, энчеме ынандырыҗы делиллер аркалы ресуллара дирелендигини аян этди. Ол кырк гүнүң довамында олара гөрнүп, Худайың Шалыгы барада гүррүң берди.

⁴ Гүнлериң биринде Иса олар билен сачагың башында отырка, шейле буйрук берди: «Иерусалимден гитмәң, Мениң овал айдышым ялы, Атамың вада берен пешгешине гарашың.

⁵ Яхя сизи сува чүмдүрипди, эмма ене бирнәче гүнден сиз Мукаддес Руха чүмдүрилерсиңиз».

Иса гөге гөтерилйәр

⁶ Ресуллар бир ере үйшенлеринде, Исадан: «Я Реб! Эйсем Ысрайыл шалыгыны дикелтмәге вагт болмадымы нәме?» дийип сорадылар.

⁷ Иса олара: «Атамың Өз ыгтыяры аркалы кесгитлән вагтыны я мөхлетини билмек сизиң ишиңиз дәл.

⁸ Эмма сизиң үстүңизе Мукаддес Рух иненде, гүйч-гудратдан доларсыңыз. Иерусалимде, тутуш Яхудыяда ве Самарияда, ер йүзүниң дөрт күнҗегинде сиз Мениң шаятларым боларсыңыз» дийип җогап берди.

⁹ Иса булары айдандан соңра, ресуллар середип дурка, бир булутда ёкары гөтерилди.

¹⁰ Мундан соң ресуллар Оны гөрмеселер-де, хенизем гөзлерини гөге дикип дурдулар. Бирденкә ак эшикли ики адам оларың алнында пейда болуп:

¹¹ «Эй, җелилелилер! Нәме үчин гөге середип дурсуңыз? Исаның гөге гөтериленини гөзүңиз билен гөрдүңиз ахыры. Ол гөге нәхили гөтерилен болса, хут шонуң ялы хем гайдып гелер» дийдилер.

Юдасың орнуна Маттия сайланяр

¹² Мундан соңра ресуллар Зейтун дагындан Иерусалиме гайдып гелдилер. Бу даг Иерусалиме якын болуп, бир Сабат гүнлүк ёлды.

¹³ Шәхере гиренлеринден соң, олар өз болян өйлериниң ёкаркы гатындакы отагына чыкдылар. Петрус, Ёханна, Якуп, Андрыс, Филип, Томас, Бартоломей, Матта, Алфейиң оглы Якуп, Ватанчы Симун ве Якубың оглы Юдас дагы хем шол ердедилер.

¹⁴ Оларың хеммеси бир ере үйшүп, ызыны үзмән дога-дилег эдйәрдилер. Оларың арасында Исаның эҗеси Меръем, шейле-де кәбир аяллар ве Исаның инилери хем барды.

¹⁵ Бир гүн Петрус йыгнанышан йүз йигримә голай доганларың ортасында дуруп, шейле дийди:

¹⁶ «Эй, доганлар! Исаны тутмага геленлере ёлбашчылык эден Юдас хакда Мукаддес Рух Давут аркалы овал-башдан пыгамберлик эдипди. Мукаддес Язгылардакы шол сөзлер амала ашмалыды.

¹⁷ Юдас бизиң биримиз хасапланярды, ол хем бу хызматдан өз пайыны алыпды».

¹⁸ (Юдас хайынлык эдип газанан пулуна бир экин мейданыны сатын алыпды. Соңра шол ерде башашак йыкылды ве гарны ярылып, әхли ичгошы чогуп чыкды.

¹⁹ Бу вака бүтин Иерусалим илатына мәлим болды ве адамлар ол ери өз диллеринде «Хакелдама», ягны «Ган мейданы» дийип атландырдылар.)

²⁰ Соңра Петрус сөзүни довам эдип, шейле дийди: «Зебурда: „Гой, онуң өйи чоларып галсын, ол ерде хич ким месген тутмасын“, шейле хем: „Башга бири онуң орнуны алсын“ дийлип язылан.

^21-22 Шонуң үчин хем, Юданың орнуна башга бирини сайламагымыз герек. Бу адам Реббимиз Исаның Яхя тарапындан сува чүмдүрилип, тә гөге гөтерилен вагтына ченли хемише бизиң арамызда биле болан адамларың бири болмалы. Ол хем бизиң ялы Исаның дирелендигине шаятлык этсин».

²³ Шейлеликде, ики адамы өңе чыкардылар. Оларың бири Барсап лакамлы Юсуп (оңа Юстус хем диййәрдилер), бейлекиси болса Маттийди.

²⁴ Онсоң Худая дога-дилег эдип: «Я Реб! Сен хеммәниң йүрегини билйәрсиң. Ине, шу икисинден хайсы бирини ресуллыга сайлан болсаң, бизе гөркез,

²⁵ себәби Юдас этмели хызматыны ташлап, өзүне дегишли ере гитди» дийдилер.

²⁶ Онсоң бу икиси үчин биҗе атдылар. Маттиниң биҗеси чыкды. Шейлеликде, Маттий он бир ресула гошулды.