Нехемя 1 - Мукаддес Китап

1‑нҗи бап Нехемя Иерусалим хакда аладаланяр

¹ Хакаляның оглы Нехемя, ине, шулары гүррүң берди: – Парс патышасы Артаксерксиң патышалык этмегиниң йигриминҗи йылының Кислев айында мен Суза галасындадым.

² Доганларымың бири болан Хананы бирнәче адам билен Яхудадан гелди. Мен олардан есирликден гутулып, аман галан яхудылар хакда ве Иерусалим хакда сорадым.

³ Олар маңа: «Есирликден гутулып, аман галан яхудылар улы бетбагтчылыкда; олар иле масгарадырлар; Иерусалимиң диварлары юмрулып, онуң дервезелери ода янды» дийип гүррүң бердилер.

⁴ Мен бу затлары эшиденимде, отурып агладым ве бирнәче гүнләп яс тутдум. Агыз бекләп, гөкдәки Худайдан дилег этдим.

⁵ Мен шейле дийдим: «Эй, Гөгүң Худайы Реб, бейик ве хайбатлы Худай! Сен Өзүңи сөйүп, табшырыкларыңы берҗай эдйәнлер билен әхтиңи хем садык сөйгиңи саклаяң.

⁶ Гулуң болан мениң ысрайыл халкының Саңа гаршы эден гүнәсини боюн алып, гиҗе-гүндиз Саңа эдйән дилегими эшидериң ялы, гулагың эшитгир, гөзүң йити болсун. Менем, аталарымам гүнә этдик.

⁷ Биз Сениң гулуң Муса берен табшырыкларыңы, парзларыңы, хөкүмлериңи берҗай этмән, Сениң гаршыңа җуда эрбет иш этдик.

^8-9 Гулуң Муса: „Эгер бивепалык этсеңиз, сизи халкларың арасына пытрадарын. Йөне сиз Маңа доланып, табшырыкларымы ятда саклап, берҗай этсеңиз, сизиң сүргүн эдиленлериңиз ериң аягуҗунда болса-да, Мен олары шол ерден йыгнап, Өз адымың месген тутмагы үчин сайлан ериме гетирерин“ диен сөзлериңи яда сал.

¹⁰ Олар Сениң бейик гүйҗүң, гудратың билен халас эден Өз гулларың ве халкыңдыр.

¹¹ Я Реб, Өз гулуңың дилегине ве Саңа хормат гойян гулларыңың дилегини эшит! Өз гулуңың ишини шу гүн Өзүң оңуна эдип, патышаның маңа рехими инер ялы эт». Мен шол вагтлар патышаның сакысыдым.