Nagmalar 2 - Мукаддес Китап

2‑нҗи бап

¹ Мен Шароның бәгүли, дерелериң чигилдемидирин.

Йигит:

² Тикен арасындакы чигилдемдир дилдарым, гызлар ичинде.

Гыз:

³ Җеңңел агачларының арасындакы алма агаҗы дей, йигитлериң арасында сөйгүли ярым. Леззетлидир маңа саясы онуң, мивесиниң тагамы агзымдан гитмез.

⁴ Ол мени мейлисхана гетирди, маңа сөйги мейли барды онда.

⁵ Кишмишлер билен мени гүйчлендир, гурпландыр алмалар билен, чүнки ышк хесери мени гаплады.

⁶ Сол эли келләмиң астында, гуҗаклаяр мени саг эли билен.

⁷ Эй, Иерусалим гызлары, җеренлердир чөл маралларындан ант ичйәрин: өзи ислейәнчә ышкы оярмаң, бирахатландырмаң!

Бахар айдымы

⁸ Ярымың овазыдыр бу! Ине, ол дагларың үстүнде бөкҗекләп, депелериң үстүнде товсаклап гелйәр.

⁹ Җерене, кейик овлагына меңзейәр дилдарым. Ине, ол ховлымызың дашында дуруп, пенҗирелерден гараяр, гөзенеклерден середйәр.

¹⁰ Сөйгүлим маңа шейле дийди: «Тур, дилдарым, гөзелим тур, йөр биле гидели.

¹¹ Гыш өтди, ягыш-да диңди.

¹² Ерде гүллер ачылып, нагма пурсады гелди. Үлкәмизде гумрының овазы эшидилйәр.

¹³ Инҗир мивесини дүвйәр, үзүмлер гүл ачяр, хошбой ысыны сачяр. Тур, дилдарым, гөзелим, йөр биле гидели».

Йигит:

¹⁴ Гая говакларындакы, учут кенардакы гөгерчиним, җемалыңы гөрейин, эшидейин сениң овазың, ширин овазың, җемалың-да аҗайыпдыр.

Гыз:

¹⁵ Бизе тилкилери, үзүм багларыны вейран эдйән тилкиҗиклери тутуп бериң, чүнки үзүм багларымыз гүл ачяр.

¹⁶ Сөйгүлим мениңки, мен-де онуңкыдырын; сүрүсини чигилдемлериң арасында бакяр ол.

¹⁷ Даң атып, көлегелер йитйәнчә, долан ызыңа, сөйгүлим, Бесер дагларындакы җерен дей, кейик овлагы дей бол!