Müsürden çykyş 31 - Мукаддес Китап

31‑нҗи бап Мукаддес чадыр үчин уссалар

¹ Реб Муса шейле дийди:

² «Ине, Мен яхуда тиресинден Хуруң агтыгы, Урының оглы Бесалели сайладым.

³ Мен оны Өз Рухум билен долдурдым. Хер дүрли сенет ишинде Мен оңа укып, акыл-пайхас ве башарҗаңлык бердим.

⁴ Ол өкде накгаш болуп, алтына-күмше ве бүрүнҗе дүрли нагышлар салсын.

⁵ Дашлары оюп гашлары гоймакда, агач ёнмакда, хер хили уссачылык ишинде оңа уссатлык бердим.

⁶ Шейле хем, Бесалел билен ишләр ялы, Мен дан тиресинден Ахысамагың оглы Охолыябы хем сайладым. Мен әхли өкде уссалара-да укып бердим. Шейлеликде, олар Мениң саңа буйран шу әхли затларымы ясасынлар:

⁷ Маңа йүз тутулян чадыр, Әхт сандыгы ве онуң үстүниң гапагы, чадырың әхли эсбаплары,

⁸ хантагта ве онуң энҗамлары, сап алтындан эдилен чырадан ве онуң әхли энҗамлары, түтетги сыпасы,

⁹ якма гурбанлык сыпасы ве онуң әхли энҗамлары, леген ве онуң сүтүни,

¹⁰ шейле хем, нагышлар билен кешделенен гейимлер, руханы болуп гуллук эденлеринде геймек үчин, Харуна ве онуң огулларына ниетленен мукаддес лыбаслары,

¹¹ месх ягы ве мукаддес өй үчин якымлы ыслы түтетги. Олар булары эдил Мениң саңа буйрушым ялы этсинлер».

Сабат гүни

¹² Реб Муса ене-де шулары дийди:

¹³ «Сениң өзүң ысрайыллара айт, гой, олар Мениң Сабат гүнүмиң канунларыны ерине етирсинлер, чүнки бу Мен билен сизиң араңыздакы әхтиң гелҗекки несиллериңиз бойы довам этҗек нышаныдыр. Мунуң билен сизи мукаддес халкым эден Реббиң Мендигими билерсиңиз.

¹⁴ Сабат гүнүниң канунларыны ерине етириң, себәби бу гүн сизиң үчин айратындыр. Кимде-ким оны харласа, өлүме хөкүм эдилер. Шол гүн иш эден адам өз халкының арасындан ковлуп чыкарылар.

¹⁵ Алты гүнүң довамында ишлериңизи эдип болуң, эмма единҗи гүн дынч алың. Чүнки ол Реббе багыш эдилендир. Сабат гүни иш эден адам өлүме хөкүм эдилер.

¹⁶ Шонуң үчин хем ысрайыллар Сабат гүнүниң канунларыны ерине етирмелидирлер, несилме-несил оны эбеди әхт хөкмүнде ерине етирмелидирлер.

¹⁷ Бу ысрайыл халкы билен Мениң арамдакы хемишелик белгидир, чүнки Мен алты гүнде Гөги ве Ери яратдым. Единҗи гүн болса хемме ишден дынып, дынч алдым».

¹⁸ Худай Синай дагында Муса билен геплешип болансоң, оңа йүзүне буйруклар язылан ики саны ясы даш бөлегини берди. Оны Худайың хут Өзи языпды.