Müsürden çykyş 30 - Мукаддес Китап

30-нҗы бап Якымлы ыслы түтетги үчин сыпа

¹ Якымлы ыслы түтетги үчин акация агаҗындан сыпа яса.

² Онуң узынлыгы-да, ини-де бир тирсек болуп, ол дөртбурч болсун. Онуң бейиклиги ики тирсек болуп, чыкып дуран бурчлары билен биле тутуш бир битеви эдилсин.

³ Онуң депесини, әхли тарапларыны ве бурчларыны сап алтына гапла. Онуң даш-төверегине алтындан җәхек чек.

⁴ Онуң үчин алтындан ики саны халка яса ве олары җәхегиң ашагындан бири-бирине гаршы эдип, ики тарапына дак. Сыпаны гөтерип гидер ялы, ол халкалардан сырыклар гечир.

⁵ Сырыклары акация агаҗындан яса ве олары алтына гапла.

⁶ Сыпаны Әхт сандыгының янындан асылгы тутының өңүнде ерлешдир. Оны Әхт сандыгының гапагының догрусында гой, чүнки Мен ол ерде сениң билен душушарын.

⁷ Хер гүн ирден Харун чыраны арассалап ягламага геленде, бу сыпаның үстүнде якымлы ыслы түтетги яксын.

⁸ Ол агшам чыраны якмага геленде-де шейле этсин. Сиз бу якымлы ыслы түтетгини Мениң хузурымда хемише несилме-несил этмелисиңиз.

⁹ Бу сыпада башга хич хили түтетги якылмасын, якма гурбанлыгы я-да галла садакасы берилмесин ве онуң үстүне ичги садакасы гуюлмасын.

¹⁰ Йылда бир гезек Харун онуң бурчларында гүнәден сапланма гурбанлыгыны берсин. Гүнәден сапланмак үчин өлдүрилен малың ганыны дөкүп, йылда бир гезек несиллербойы гүнә гурбанлыгыны бер. Сыпа Реббе багыш эдилендир».

Мукаддес чадыр үчин салгыт

¹¹ Реб Муса шейле дийди:

¹² «Ысрайылларың хасабыны алмак үчин, илат санавыны гечир. Хасаба алнанларың хеммеси өз җаны үчин Маңа төлег төлесин. Шонда төлег төләп хасаба алнан адамларың башына хич хили бела инмез.

¹³ Ине, хасаба алнанларың төлемели зады: мукаддес өйүң ресми өлчеги боюнча ярым шекел күмүш. Бир шекел ики мысгала деңдир. Маңа садака хөкмүнде ярым шекел күмүш берсинлер.

¹⁴ Хасаба алнанларың яшы йигрими ве ондан ёкары болан адамларың хер бири шу мукдарда Маңа садака берсин.

¹⁵ Баям, гарыбам шол ярым шекели төлесин. Төлег шундан аз-да болмасын, көп-де. Сиз шу садаканы Маңа берениңизде, гүнәңизден сапланарсыңыз.

¹⁶ Ысрайылларың гүнәлеринден сапланмагы үчин, олардан пул йыгна ве оны Маңа йүз тутулян чадырың хызматы үчин сарп эт. Җаны үчин төлейән төлеги Мениң хузурымда ысрайыллара ятлама болар».

Бүрүнч леген

¹⁷ Реб Муса ене-де шейле дийди:

¹⁸ «Ювунмак үчин бүрүнчден леген яса. Онуң сүтүни хем бүрүнчден болсун. Оны Маңа йүз тутулян чадыр билен гурбанлык сыпасының ортасында гой ве ичине сув гуй.

¹⁹ Шол сув билен Харун ве онуң огуллары эллерини ве аякларыны ювсунлар.

²⁰ Олар Маңа йүз тутулян чадыра гиренлеринде я-да гурбанлык сыпасында от үсти билен Маңа гурбанлык бермәге геленлеринде, шол сув билен ювунсынлар. Шонда олар өлмезлер.

²¹ Олар шол сув билен эллерини, аякларыны ювсунлар, шонда олар өлмезлер. Бу Харун үчин ве онуң несиллери үчин аркама-арка гайталанян эбедилик дүзгүн болсун».

Месх ягы

²² Реб Муса шейле дийди:

²³ «Ине, шу иң говы хошбой ыслы затлары ал: ярым пут мукдарда сувук мүр, чәръек пут мукдарда якымлы ыслы далчын ве ене-де чәръек пут мукдарда хошбой ыслы гамыш,

²⁴ ярым пут мукдарда хинди далчыныны ал. Буларың хеммеси мукаддес өйүң ресми өлчеги билен өлченсин ве дөрт күйзе зейтун ягыны ал.

²⁵ Уссатлык билен гарып, булардан месх ягыны яса. Бу мукаддес месх ягыдыр.

^26-28 Маңа йүз тутулян чадыра, Әхт сандыгына, хантагта ве онуң әхли энҗамларына, чырадана ве онуң әхли энҗамларына, түтетги сыпасына, якма гурбанлык сыпасына ве онуң әхли энҗамларына, легене ве онуң сүтүнине шу ягы сепеле.

²⁹ Олары мукаддес эт, шонда олар иң мукаддес затлар болар. Олара галташан хем мукаддес болар.

³⁰ Харуны ве онуң огулларыны руханыларым болуп хызмат этмеклери үчин, башларына яг гуюп, Маңа багыш эт.

³¹ Ысрайыллара айт: Бу сизиң үстүңиз билен несилме-несил гечйән Мениң мукаддес месх ягымдыр.

³² Бу месх ягыны адаты бедениңизе гуймак үчин уланмалы дәлдир, башга хер хили затлар билен гарышдырмалы дәлдир. Бу мукаддесдир ве сизиң үчин хем мукаддес болмалыдыр.

³³ Руханыдан башга кимде-ким шонуң ялы атыр ясаса ве бириниң үстүне гуйса, өз халкының арасындан ковлуп чыкарылар».

Түтетги

³⁴ Реб Муса шейле дийди: «Хошбой ыслы затлары: бальзамы, ониканы, галбанумы ве якымлы ыслы түтетгини ал. (Буларың хеммеси дең мөчберде болсун.)

³⁵ Атыр ясайҗы гарып, олардан хошбой ыслы түтетги яса. Оңа дуз хем гош, ол сап ве мукаддес болсун.

³⁶ Онуң бир бөлегини күлкеләп, сизиң билен душушян ерим болан Әхт сандыгының өңүндәки Маңа йүз тутулян чадырда гой. Бу сизиң үчин иң мукаддес болар.

³⁷ Шу усул билен өзүңиз үчин түтетги тайярламаң. Муны Мен-Реббе багыш эдилен хасаплаң.

³⁸ Ким муны атыр хөкмүнде уланса, өз халкының арасындан ковлуп чыкарылар».