Müsürden çykyş 23 - Мукаддес Китап

23‑нҗи бап Адалат ве выждан

¹ «Ялан геп яйратма. Ялана шаятлык эдип, ярамаз адама гол берме.

² Эрбет иш эдйән көпчүлигиң ызына дүшме. Бир давада шаятлык эдениңде, көпчүлигиң тарапында дуруп, адалатдан йүз дөндерме.

³ Давада гарыбың-да тарапыны чалма.

⁴ Өз душманыңың азашан өкүзине я-да эшегине душсаң, оны эесине гетирип бер.

⁵ Эгер сени йигренйән бириниң эшегиниң йүк астында ятаныны гөрсең, оны ташлап гитме. Оңа бу йүкден азат болмага көмек эт.

⁶ Давада гарыба адалатсызлык этме.

⁷ Ялан ишден дашда дур. Бигүнә ве догручыл адамы өлдүрме, чүнки Мен гүнәлини акламаярын.

⁸ Пара алмаң, чүнки пара акылдарларың гөзүни көр эдер, догрының ишини терс эдер.

⁹ Гелмишеге зулум этмәң. Гелмишегиң йүрегини билйәнсиңиз, чүнки сизиң өзүңиз хем Мүсүрде гелмишек болуп яшапдыңыз».

Единҗи йыл ве единҗи гүн

¹⁰ «Алты йыл топрагыңыза экин экип, онуң хасылыны йыгың.

¹¹ Эмма единҗи йыл топрага дынч бериң, оны шүдүгәр эдип гоюң. Шонда ондан халкыңызың арасындакы гарыплар ийсин, ондан галанларыны болса йыртыҗы хайванлар ийсин. Үзүм ве зейтун багларыңызы хем шейле эдиң.

¹² Алты гүнләп өз ишлериңизи эдиң, эмма единҗи гүн дынч алың. Шонда өкүзиңизе ве эшегиңизе-де еңиллик болар. Өйүңиздәки гулуңыз хем, гелмишек хем рахатланар.

¹³ Мениң сизе айданларымың әхлисини ерине етириң. Башга худайлары чагырмаң, гой, оларың атлары-да агзалмасын».

Үч байрам

¹⁴ «Йылда үч сапар Мениң шаныма байрам эдиң:

¹⁵ Петир байрамыны белләң. Мениң буйрушым ялы, Абып айының белленен гүнлеринде еди гүнләп петир ийиң, чүнки сиз Мүсүрден шол айда чыкдыңыз. Мениң өңүмде хич ким эли бош гөрүнмесин.

¹⁶ Мейданда чекен зәхметиңизиң илкинҗи хасылындан Галла байрамыны белләң. Мейдандакы мивелериңизи йыгып болуп, йылың ахырында болса хасыл той бериң.

¹⁷ Йылда үч гезек эркеклериңизиң хеммеси Мен – Таңры Реббиң хузурына гелсинлер.

¹⁸ Маңа гурбанлык үчин өлдүрйән малыңызың ганыны хамырмаялы чөрек билен бермәң. Мениң байрамымың шанына гурбан эден малыңызың ягы эртире галмасын.

¹⁹ Ериңизде өнен илкинҗи сайлама мивелери Худайыңыз Реббиң өйүне гетириң. Овлагы энесиниң сүйдүнде биширмәң».

Кенган барадакы вадалар ве дуйдурышлар

²⁰ «Сизи ёлда горар ялы ве тайярлан ериме гетирер ялы, Мен сизиң өңүңизден перишде иберйәрин.

²¹ Онуң айданларына дыкгат билен гулак гоюң. Оңа гаршы баш галдырмаң. Ол сизиң бейле этмишиңизи багышламаз, чүнки ол Мениң адым билен гелер.

²² Эгер сиз оңа боюн болуп, Мениң әхли айданларымы берҗай этсеңиз, онда Мен сизиң душманларыңыза душман, ягыларыңыза ягы боларын.

²³ Мениң перишдәм сизиң өңүңизден гидип, сизи аморларың, хетлериң, перизлериң, кенганларың, хивилериң ве ябусларың юрдуна гетирер ве Мен олары гырып ёк эдерин.

²⁴ Сиз оларың худайларына тагзым этмәң ве олара гуллук этмәң. Оларың дини адатларына уймаң, гайтам, оларың бутларыны дөвүп, дикме дашларыны күл-пеекун эдиң.

²⁵ Сиз өз Худайыңыз Реббе гуллук эдиң, шейтсеңиз, Мен сизиң наныңыза, сувуңыза берекет берерин. Сизиң араңыздан кеселчилиги айрарын.

²⁶ Юрдуңызда чагасы дүшен я-да өнелгесиз галан болмаз. Өмрүңизи-де узак эдерин.

²⁷ Мен Өз хайбатымы сизиң өңүңизден уградарын. Сизиң гаршыңыза чыкан хер бир халкы алҗыраңңылыга салып, әхли душманларыңызы еңсе берип гачар ялы эдерин.

²⁸ Мен хивилере, кенганлара ве хетлере ховп салып, олары сизиң өңүңизден ковуп чыкарарын.

²⁹ Ер бош галмаз ялы ве йыртыҗы хайванлар гаршыңыза көпелмез ялы, Мен душманларыңызы сизиң өңүңизден бир йылың довамында ковҗак дәл.

³⁰ Сиз көпелип, ери эелейәнчәңиз, Мен олары сизиң өңүңизден юваш-ювашдан ковуп чыкарарын.

³¹ Гызыл деңизден пилиштлилериң деңзине ченли ве чөлден Евфрат дерясына ченли арачәклериңизи беллеҗек. Чүнки оларың яшайҗыларыны сизиң элиңизе берҗек. Сиз олары ковуп чыкарың.

³² Сиз олар билен хем, оларың худайлары билен хем әхт баглашмаң.

³³ Олар сизиң юрдуңызда яшамасынлар, ёгсам, олар сизи Маңа гаршы гоюп, гүнә этмәге меҗбур эдерлер. Оларың худайларына гуллук этсеңиз, сиз гүррүңсиз дузага дүшерсиңиз».