Müsürden çykyş 20 - Мукаддес Китап

20‑нҗи бап Он табшырык

¹ Онсоң Худай әхли шу сөзлери дийди:

² «Сениң гул болуп яшан юрдуң Мүсүрден алып чыкан Худайың Реб Мендирин.

³ Сениң Менден башга худайларың болмасын.

⁴ Өзүң үчин ёкарда гөкде, ашакда ерде я-да ерасты сувларда яшаян затларың хич бирине меңзеш шекилде бут ясама.

⁵ Сен олара тагзым этме я-да олара гуллук этме, чүнки Мен Худайың Реб габанҗаң Худайдырын. Мени йигренйән аталарың этмишиниң җезасыны оларың чагаларының үчүнҗи ве дөрдүнҗи аркасына чекдирерин.

⁶ Эмма ким Мени сөйүп, буйрукларымы ерине етирсе, онуң мүңлерче неслине садык сөйгими гөркезерин.

⁷ Худайың Реббиң адыны бош ере агзама, чүнки Реб Өз адыны бош ере агзан адамы җезасыз гоймаз.

⁸ Мукаддес Сабат гүнүниң канунларыны ерине етир.

⁹ Алты гүнде әхли ишлериңи эдерсиң.

¹⁰ Эмма единҗи гүн Худайың Реббе багышланан дынч гүнүдир. Бу гүн сениң өзүң, огул-гызың, гул-гырнагың, мал-гараң, галаңызда яшаян гелмишек хиҗиси бир иш хем этмесин.

¹¹ Чүнки Реб ери, гөги, деңзи ве олардакы әхли җанлы-җандарлары алты гүнде яратды, единҗи гүн болса дынч алды. Шонуң үчин хем Реб Сабат гүнүни айратын гүн хөкмүнде ялкады.

¹² Ата-энеңе хормат гой, шонда Худайың Реббиң өзүңе берен еринде өмрүң узак болар.

¹³ Адам өлдүрме.

¹⁴ Зына этме.

¹⁵ Огурлык этме.

¹⁶ Бириниң гаршысына ялан шаятлык этме.

¹⁷ Башга адамың өйүне, аялына, гул-гырнагына я-да өкүзине, эшегине оңа дегишли затларың хич бирине гөз дикме».

¹⁸ Әхли ысрайыллар гөк гүррүлдисини, йылдырым чакышыны ве сурнайың сесини эшидип, дагың болса, түсселейәндигини гөрүп, горкудан яңа титрешдилер ве узакда дурдулар.

¹⁹ Олар Муса: «Бизе сен гепле, биз эшидерис, йөне, гой, Худай бизе геплемесин, ёгсам, биз өлерис» дийдилер.

²⁰ Муса адамлара: «Горкмаң, чүнки Худай сизи сынамак үчин ве Ондан горкуп, гүнә этмезлигиңиз үчин гелди» дийди.

²¹ Муса Худайың болян түм гараңкылыгына якынлашанда, адамлар узакда дурдулар.

Гурбанлык сыпасы

²² Реб Муса дийди: «Шуны ысрайыллара етир: „Мениң сизиң билен Гөкден геплешеними өзүңиз гөрдүңиз.

²³ Өзүңиз үчин Менден башга алтын-күмүшден худайлар ясамаң.

²⁴ Мениң үчин топракдан гурбанлык сыпасыны ясаң ве онуң үстүнде гоюнларыңызы, өкүзлериңизи башбитин якма гурбанлыгы ве саламатлык гурбанлыгы эдип хөдүрләң. Адым тутулып ятланылан хер бир ере гелип, Мен сизе ак пата берерин.

²⁵ Эгер сиз Маңа гурбанлык сыпасыны дашдан ясасаңыз, оны ёнулан дашлардан ясамаң, чүнки гурал улансаңыз, сиз оны харама чыкарарсыңыз.

²⁶ Мениң гурбанлык сыпама басганчаклар билен чыкмаң, себәби ялаңач ериңизиң гөрүнмеги мүмкин“».