Müsürden çykyş 18 - Мукаддес Китап

18‑нҗи бап Йитро Мусаның янына гелйәр

¹ Худайың Муса үчин ве ысрайыллар үчин эден әхли ишлери барадакы ве Реббиң олары Мүсүрден нәхили чыкарандыгы барадакы хабар Мусаның гайынатасы, Мидян руханысы Йитро барып етди.

² Ине, Муса аялы Сыпораны ве ики оглуны ызына Мидяна гойберенсоң, олары Мусаның гайынатасы Йитро саклаярды.

³ Онуң бир оглуның ады Гершом (Ол оны: «Мен бир ят юртда гелмишек болдум» дийип дакыпды),

⁴ бейлеки оглуның ады Элигезерди (Онуң адыны болса: «Атамың Худайы маңа ярдам берди, Ол мени фараоның гылыҗындан гутарды» дийип, шейле дакыпды).

⁵ Мусаның гайынатасы Йитро онуң аялы ве ики оглы билен Мусаның янына чөле, онуң дүшлән дагына, Худайың дагына гелди.

⁶ Кимдир бири Муса: «Гайынатаң Йитро аялыңы ве ики оглуңы алып, сениң яныңа гелйәр» дийип хабар берди.

⁷ Муса гайынатасыны гаршы алмага чыкды ве дызына чөкүп тагзым этди ве оны огшады. Олар бири-бири билен саглык-аманлык сорашанларындан соң, чадырың ичине гирдилер.

⁸ Муса Реббиң ысрайыллар үчин фараона ве мүсүрлилере эден әхли ишлери барада, оларың ёлда дучар болан кынчылыклары, Реббиң олары азат эдиши барада гайынатасына екән-екән гүррүң берди.

⁹ Йитро Реббиң ысрайыллара эден әхли ягшы ишлери үчин ве олары мүсүрлилериң элинден азат эденлиги үчин гаты бегенди.

¹⁰ Йитро: «Сизи мүсүрлилериң ве фараоның элинден азат эден Реббе алкыш болсун!

¹¹ Инди мен Реббиң бейлеки әхли худайлардан бейикдигини билйәрин, себәби Ол ысрайыллары текепбирлик билен эзйән мүсүрлилериң элинден халас этди» дийди.

¹² Мусаның гайынатасы Йитро Худая якма гурбанлыгыны ве бейлеки садакалары берди. Харун әхли ысрайыл яшулулары билен бирликде Мусаның гайынатасы билен Худайың хузурында нахар иймәге гелди.

Йитро маслахат берйәр

¹³ Эртеси гүн Муса адамлара казылык этмәге чыкды. Адамлар эртирден агшама ченли Мусаның төверегинде дурдулар.

¹⁴ Мусаның гайынатасы онуң адамлар билен эдйән әхли ишлерини гөренде: «Адамлара эдйән бу ишиң нәме болдугы? Нәме үчин шунча адамы еке өзүң кабул эдйәрсиң, бүтин халк эртирден агшама ченли сениң төверегиңде дур» дийди.

¹⁵ Муса гайынатасына: «Мунуң себәби адамлар Худайың ислегини билмек үчин, мениң яныма гелйәрлер.

¹⁶ Оларың давасы болса, маңа гелйәрлер. Мен хем ики давагәриң арасындакы даваны чөзүп берйәрин ве Худайың парзларыны, Онуң канунларыны олара аян эдйәрин» дийди.

¹⁷ Мусаның гайынатасы оңа шейле дийди: «Сениң эдйән бу ишиң говы дәл.

¹⁸ Сен өзүңи хем, адамлары хем көсәп, гынап йөрсүң. Бу иш сениң үчин гаты агыр. Сениң еке өзүң муны ерине етирип билмерсиң.

¹⁹ Инди мениң сөзүме гулак гой. Мен саңа маслахат берҗек. Худай саңа яр болсун! Сен Худайың өңүнде халкың векили болуп, оларың ягдайларыны Худая етир.

²⁰ Сен олара Худайың парзларыны ве таглыматларыны өврет. Олара хайсы ёлдан йөремелидигини ве нәме иш этмелидигини гөркез.

²¹ Мундан башга-да, әхли адамларың ичинден башарҗаңларыны, ягны Худайдан горкян, догручыл ве параны йигренйән адамлары сайла. Олары мүң адамың, йүз адамың, элли адамың ве он адамың үстүнден баштутан гой.

²² Гой, хемише олар адамлара казылык этсинлер. Улы давалары саңа айтсынлар, эмма кичи давалары өзлери чөзсүнлер. Шонда сениң үчин аңсадрак болуп, агыр йүкүң еңләр.

²³ Худайың буйрушы ялы, шейле этсең, онда сен бу ишиң хөтдесинден гелерсиң. Бу адамларың әхлиси хем өйлерине канагатланып гайдарлар».

²⁴ Шейлеликде, Муса гайынатасының сөзүне гулак гойды. Онуң айдан әхли затларыны ерине етирди.

²⁵ Муса әхли ысрайылларың ичинден башарҗаң адамлары сайлап, олары халка мүңбашы, йүзбашы, эллибашы ве онбашы эдип белледи.

²⁶ Олар халка хемме вагт казылык этдилер. Олар чөзмеси кын давалары Муса гетирдилер, эмма кичи давалары өзлери чөздүлер.

²⁷ Соңра Муса гайынатасыны угратды. Йитро ызына, өз юрдуна гайтды.