Matta 4 - Мукаддес Китап

4‑нҗи бап Иса сыналяр

¹ Соңра иблисиң сынамагы үчин, Мукаддес Рух Исаны чөле әкитди.

² Иса кырк гиҗе-гүндиз агыз бекләнден соңра аҗыкды.

³ Шол вагт Онуң янына аздырыҗы шейтан гелип: «Эгер Сен Худайың Оглы болсаң, онда шу дашларың чөреге өврүлмегини буюр» дийди.

⁴ Эмма Иса оңа: «„Ынсан диңе чөрек билен яшаман, эйсем Реббиң агзындан чыкян хер бир сөз билен хем яшаяр“ дийип язылгыдыр» дийип җогап берди.

⁵ Соңра иблис Исаны мукаддес шәхер Иерусалиме гетирди. Оны ыбадатхананың чүр депесине чыкарып:

⁶ «Эгер Сен Худайың Оглы болсаң, Өзүңи ашак окла. Чүнки шейле язылгыдыр: „Ол перишделерине Сен бабатда эмр эдер. Аягың даша бүдремез ялы, олар Сени эллеринде гөтерер“» дийди.

⁷ Иса оңа: «„Худайыңыз Ребби сынамаң“ дийип хем язылгыдыр» дийди.

⁸ Бу гезек иблис Исаны бейик бир дагың чүр башына чыкарды. Оңа дүнйәниң әхли шалыкларыны ве оларың шан-шөхратыны гөркезип:

⁹ «Эгер дызыңа чөкүп, маңа сежде этсең, буларың барыны Саңа берейин» дийди.

¹⁰ Иса оңа: «Ёк бол, шейтан! „Худайыңыз Реббе сежде эдиң, диңе Оңа гуллук эдиң“ дийип языландыр» дийди.

¹¹ Шундан соң иблис Исаны ташлап гитди. Перишделер гелип, Иса хызмат этдилер.

Иса Хош Хабары ыглан этмәге башлаяр

¹² Иса Яхяның туссаг эдилендигини эшиденде, Җелилә доланды.

¹³ Ол илки Насыра шәхерине гелди, эмма ол ерде узак эгленмән, Зебулун билен Нафталы велаятындакы Җелиле көлүниң кенарында ерлешйән Капернаумда орнашды.

¹⁴ Шунлукда, Ишая пыгамбер аркалы айдылан шу сөз берҗай болды:

¹⁵ «Эй, Зебулун ве Нафталы юрды! Деңиз якасындакы ёл, Иорданың аңырсы! Эй, кесеки миллетлериң яшаян Җелилеси!

¹⁶ Түмлүкде месген тутан халк бейик нур гөрди, түм гараңкылыкда яшаянларың үстлерине нур сачылды».

¹⁷ Шол вагтдан башлап, Иса: «Тоба эдиң, чүнки Гөгүң Шалыгы голайлады» дийип, вагыз этмәге башлады.

Иса илкинҗи шәгиртлерини сайлаяр

¹⁸ Иса Җелиле көлүниң кенарындан гечип барярка, көле тор ташлап дуран ики доганы гөрди. Оларың бири Петрус лакамлы Симун, бейлекиси хем Андрысды. Олар балыкчыдылар.

¹⁹ Иса олара: «Мениң ызыма дүшүң, Мен сизи ынсан тутян балыкчылар эдейин» дийди.

²⁰ Олар хем шол вагтың өзүнде торларыны ташлап, Онуң ызына дүшдүлер.

²¹ Бираз йөрәнлеринден соң, Иса башга ики доганы, Зебедейиң огуллары Якуп билен Ёханнаны гөрди. Олар гайыгың ичинде какалары Зебедей билен торларыны беҗерип отырдылар. Иса олары чагырды.

²² Олар хем дессине гайык билен какалары Зебедейи ташлап, Исаның ызына дүшдүлер.

Иса хассалары сагалдяр

²³ Иса тутуш Җелиләни айланып чыкды. Ол ердәки синагогаларда сапак берип, Гөгүң Шалыгының Хош Хабарыны вагыз этди, халкың арасындакы хер хили кеселлери, хассалары сагалтды.

²⁴ Онуң ат-овазасы бүтин Сирия яйрады, дүрли кеселлере дучар болан әхли хассалары, арвах-җын эеләнлери, тутгайлылары ве отуралары Исаның янына гетирдилер, Ол хем олары сагалтды.

²⁵ Җелиледен, Декаполисден, Иерусалимден, Яхудыядан ве Иорданың гүндогар тарапындан улы мәхелле Онуң ызына дүшди.