Matta 24 - Мукаддес Китап

24‑нҗи бап Дүнйәниң ахырының аламатлары

¹ Иса ыбадатханадан чыкып барярка, шәгиртлери ыбадатхананың биналарына гуванып, оны Иса гөркезмек үчин, Онуң янына гелдилер.

² Эмма Иса олара: «Бу әхли затлары гөрйәңизми? Сизе догрусыны айдярын: бу ерде даш үстүнде даш галмаз, хеммеси вейран болар» дийди.

³ Соңрак Иса еке Өзи Зейтун дагында отырка, шәгиртлери Онуң янына гелип: «Бизе айтсана, бу затлар хачан болар? Сениң гелмегиңи ве дүнйәниң ахырыны гөркезйән аламат нәхили болар?» дийип сорадылар.

⁴ Иса олара шейле җогап берди: «Әгә болуң, хич ким сизи алдаймасын!

⁵ Көплер Мениң адым билен гелип: „Мен Месих“ дийип, энчеме адамлары алдарлар.

⁶ Сиз уруш турандыгы ве уруш барадакы мыш-мышлары эшидерсиңиз. Хич затдан горкмаң. Булар болмалыдыр, йөне энтек соңы дәлдир.

⁷ Миллет миллете, патышалык патышалыга гаршы чыкар. Айры-айры ерлерде ер титремелер, ачлыклар йүзе чыкар.

⁸ Буларың хеммеси бургуларың башлангыҗыдыр.

⁹ Соңра сизи ызарланмалара сезевар эдерлер, өлдүрерлер, Мен себәпли әхли миллетлер сизи йигренерлер.

¹⁰ Шонда көплер Менден эл чекип, бир-бирлерине хайынлык эдерлер, бир-бирлерини йигренерлер.

¹¹ Энчеме галп пыгамберлер дөрәп, көплери аздырарлар.

¹² Яман ишлериң артанлыгы зерарлы, көплериң сөйгүси совар.

¹³ Эмма соңуна ченли чыдан халас болар.

¹⁴ Патышалыгың бу Хош Хабары әхли миллетлере шаятлык хөкмүнде дүнйәниң әхли еринде вагыз эдилер, диңе шондан соң дүнйәниң ахыры гелер.

^15-16 Шонуң үчин хем вейранчылык гетирйән йигренҗи задың мукаддес ерде дикиленини гөрениңизде, Яхудыядакылар даглара гачсын. Хава, Даныел пыгамбериң айданларына окыҗы догры дүшүнсин.

¹⁷ Үчекдәки адам бир зат алмак үчин ашак дүшүп, өе гирмесин.

¹⁸ Экин мейданындакылар донуны алмак үчин ызына гелмесин.

¹⁹ Ол гүнлерде гөврели аялларың ве чага эмдирйәнлериң дат гүнүне!

²⁰ Гача-гачлыгыңыз гышда я-да Сабат гүни болмасын дийип дилег эдиң.

²¹ Чүнки ол гүнлерде шейле бир элхенч мушакгатлар болар велин, дүнйәниң башындан тә шу вагта ченли мунуң ялы зат болан дәлдир, хич хачан болмазам.

²² Ол гүнлер гысгалдылмадык болсады, онда хич ким халас болмазды, эмма сайлананларың хатырасына ол гүнлер гысгалдылар.

²³ Шонда бири сизе: „Ине, Месих бу ерде“ я-да „Анха, ол ерде“ дийсе, ынанмаң.

²⁴ Чүнки галп месихлер ве галп пыгамберлер дөрәп, сайлананлары-да мүмкин болдугыча аздырҗак болуп, бейик аламатлардыр мугҗызалар гөркезерлер.

²⁵ Ине, Мен сизе өңүнден айтдым.

²⁶ Шейлеликде, сизе: „Ине, Месих чөлде“ дийселер, гитмәң. „Ине, Ол ички отагларда“ дийселер-де, ынанмаң.

²⁷ Ынсан Оглуның гелши гүндогарда чакып, гүнбатарда хем гөрүнйән йылдырым ялы болар.

²⁸ Гарагушларың үйшмеги маслыгың бардыгының бир аламатыдыр. Ынсан Оглы хем бир аламат билен гелер.

²⁹ Шол гүнлериң мушакгатының ыз яны Гүн гаралар, Ай нуруны сачмаз. Йылдызлар гөкден гачар, асман җисимлери лерзана гелер.

³⁰ Шонда гөкде Ынсан Оглуның аламаты гөрнер. Ер йүзүндәки әхли халклар яс тутуп перят эдерлер. Ынсан Оглуның бейик гудрата ве шөхрата бесленип, гөгүң булутларында гелйәнини гөрерлер.

³¹ Ол белент сурнай сеси билен Өз перишделерини ёллар. Перишделер Онуң сайланларыны гөгүң бир уҗундан бейлеки уҗуна ченли, дүнйәниң дөрт күнҗүнден йыгнарлар.

³² Инҗир агаҗындан сапак алың: онуң шахалары юмшап, япрак чыкаран махалы томсуң голайландыгыны билйәрсиңиз.

³³ Шонуң ялы-да, бу затлары гөрениңизде, Ынсан Оглуның голай гелендигини, гапының агзындадыгыны билиң.

³⁴ Сизе догрусыны айдярын, бу затларың әхлиси болянча, бу несил дүнйәден өтмез.

³⁵ Асман билен ер өтер, эмма Мениң сөзлерим асла өтмез.

Билинмейән гүн ве сагат

³⁶ Эмма ол гүни хем сагады хич ким билйән дәлдир, не гөкдәки перишделер, не-де Огул билйәндир, диңе Ата билйәндир.

³⁷ Нухуң дөврүнде яшайыш нәхили болан болса, Ынсан Оглуның гелши-де шейле болар.

³⁸ Нухуң гәмә мүнен гүнүне ченли, силден өңки гүнлерде адамлар ийип-ичйәрдилер, өйленип, дурмуша чыкярдылар.

³⁹ Әпет сил гелип, хеммесини сүпүрип әкидйәнчә, олар өз башларындан инҗек затлардан асла бихабардылар. Ынсан Оглуның гелши хем шейле болар.

⁴⁰ Шонда экин мейданында ики адам болар, бири алнар, бири гойлар.

⁴¹ Дегирмен башында бугдай үвейән ики аял болар, бири алнар, бири гойлар.

⁴² Шонуң үчин оя болуң, себәби Реббиңизиң хайсы гүн гелҗегини билмейәрсиңиз.

⁴³ Эмма шуны билип гоюң: өй эеси огрының гиҗе сагат нәчеде гелҗегини билседи, оя боларды, өйүни талатмазды.

⁴⁴ Мунуң үчин сиз хем тайяр болуң, себәби Ынсан Оглы сизиң осламаян сагадыңызда гелер.

⁴⁵ Хоҗайының садык хем акыллы хызматкәри ким? Бейлеки хызматкәрлерине вагтлы-вагтында нахар бермек үчин, оларың үстүнден гоян адамы дәлми?

⁴⁶ Хоҗайыны доланып геленде, ишиниң башында гөрен хызматкәри нәхили багтлы!

⁴⁷ Сизе догрусыны айдярын: хоҗайыны әхли мал-мүлкүни шоңа ынанар.

⁴⁸ Эмма яман ниетли хызматкәр өз ичинден: „Хоҗайыным гич гелер“ дийип,

⁴⁹ ёлдашларыны урмага, серхошлар билен ийип-ичмәге башлар,

⁵⁰ эмма ол хызматкәриң хоҗайыны онуң осламаян гүнүнде, ойламаян сагадында гелер.

⁵¹ Ол хызматкәрини парча-парча эдип, онуң башына икийүзлүлериң гүнүни салар. Ол ерде агы ве диш гыҗама болар».