Matta 12 - Мукаддес Китап

12‑нҗи бап Сабат гүни барада сораг

¹ Арадан көп вагт гечмәнкә, бир Сабат гүни Иса бугдайлыгың арасындан гечип барярды. Онуң шәгиртлери аҗыгып, бугдай башларыны ёлуп иймәге башладылар.

² Муны гөрен фарисейлер Оңа: «Серет, Сениң шәгиртлериң Сабат гүни гадаган иши эдйәрлер» дийдилер.

³ Иса олара шейле җогап берди: «Давут билен янындакылар ач галанларында, сиз Давудың нәме эдендигини окамадыңызмы?

⁴ Ол Худайың өйүне гирип, Хөдүр чөреклерини ийди, янындакылар хем ийдилер. Бу олар үчин гадаганды, диңе руханылара ругсат берленди.

⁵ Эйсем, сиз ыбадатханада Сабат гүнүниң кадаларыны бозсалар-да, руханыларың гүнәсиз сайыландыгыны Төвратда окамадыңызмы?

⁶ Мен сизе шуны айдайын: бу ерде ыбадатханадан-да бейик Бири бар.

⁷ Сиз: „Мен гурбанлык дәл-де, рехим-шепагат ислейәрин“ диен сөзүң манысыны билседиңиз, гүнәсизлери хөкүм этмездиңиз.

⁸ Чүнки Ынсан Оглы хатда Сабат гүнүниң-де хөкүмдарыдыр».

Эли шел ачан адам

⁹ Иса ол ерден гитди ве оларың синагогасына гелди.

¹⁰ Ол ерде эли шел ачан бир адам барды. Исаны айыплаҗак болуп, Ондан: «Канун боюнча Сабат гүни хасса шыпа бермек болярмы?» дийип сорадылар.

¹¹ Иса олара: «Эгер бир гойнуңыз болуп, ол-да Сабат гүни чукура гачса, хайсыңыз оны чыкарып алмарсыңыз?

¹² Ынсан гоюндан хас гымматлыдыр! Шонуң үчин Сабат гүни ягшылык этмек боляр» дийип җогап берди.

¹³ Онсоң Иса яңкы адама: «Элиңи узат!» дийди. Ол узадан бадына, онуң нәсаг эли эдил бейлеки эли ялы сагалды.

¹⁴ Фарисейлер дашары чыкып, Исаны нәдип ёк этмелидиги барада маслахатлашдылар.

Реббиң бендеси

¹⁵ Эмма Иса фарисейлериң бу ниетини билип, ол ерден гитди. Көп адамлар Онуң ызына дүшдүлер, Иса хем оларың арасындакы хассалары сагалтды.

¹⁶ Иса олара Өзүниң кимдигини хич киме айтмазлыгы табшырды.

¹⁷ Бу Ишая пыгамбер аркалы айдылан шу сөзүң берҗай болмагы үчинди:

¹⁸ «Ине, Мениң сайлан Бендәм, гөвнүхош болуп, Оны сөеним; Рухумы Онуң үстүне гоярын, Ол миллетлере адалаты ыглан эдер.

¹⁹ Ол давалашмаз, сесини гаталтмаз, көчелерде хич ким Онуң сесини эшитмез.

²⁰ Адалаты еңше етирйәнчә, енҗилен гамшы дөвмез, түтейән пелтәни сөндүрмез.

²¹ Әхли миллетлер Онуң адына умыт багларлар».

Иса ве Беелзебул

²² Онсоң Исаның янына арвах-җын эелән көр хем лал адамы гетирдилер. Иса оны сагалдансоң, яңкы адам геплемәге ве гөрмәге башлады.

²³ Тутуш халк хайран галып: «Бу Давудың оглы дәлмикә?» дийишди.

²⁴ Муны эшиден фарисейлер: «Бу адам арвах-җынлары җынларың хөкүмдары Беелзебул аркалы ковуп чыкаряр» дийдилер.

²⁵ Эмма Иса оларың пикирлерини билип, шейле дийди: «Ичинде бөлүнишик болан патышалык даргар, өз ичинден бөлүнен шәхер я-да өй берк дуруп билмез.

²⁶ Шейтан шейтаны ковян болса, онда ичинде бөлүнишик бардыр, онсоң онуң патышалыгы нәхили дурар?

²⁷ Эгер Мен арвах-җынлары Беелзебул аркалы ковян болсам, онда сизиң адамларыңыз олары ким аркалы ковярлар? Шу себәпли сизи өз адамларыңыз хөкүм эдер.

²⁸ Мен арвах-җынлары Худайың Рухы аркалы ковян болсам, онда Худайың Шалыгы сизе-де гелендир.

²⁹ Ким гүйчли адамың өйүне гирип, малыны талап билер? Илки оны даңмалы болар, онсоң өйүни талар.

³⁰ Мениң билен болмадык Маңа гаршыдыр, Мениң билен сүрини топламадык оны даргадяндыр.

³¹ Шонуң үчин сизе шуны диййәрин: ынсанларың хер бир гүнәси, хер бир зада дил етирмеси багышланар, эмма Мукаддес Руха дил етиренлер багышланмаз.

³² Ким Ынсан Оглуна гаршы сөз айтса, багышланар. Эмма Мукаддес Руха гаршы айдылан сөз багышланмаз. Ол шу дөвүрде-де, гелҗекде-де багышланмаз.

Мивели агач

³³ Оңат агач экиң, онуң мивеси-де оңат болар, эрбет агач эксеңиз, эрбет миве аларсыңыз, себәби агач мивесинден таналяндыр.

³⁴ Эй, алахөвренлер несли! Ынсаның дили йүрегинден җошаныны сөзлейәндир. Шейлеликде, өзүңиз эрбеткәңиз, нәдип сиз оңат затлар сөзләп билерсиңиз?

³⁵ Ягшы адам йүрегиниң ягшылык хазынасындан ягшылык чыкаряндыр, яман адам йүрегиниң яманлык хазынасындан яманлык чыкаряндыр.

³⁶ Мен сизе шуны диййәрин: адамлар айдан хер бир бош сөзи үчин кыямат гүни хасап берерлер.

³⁷ Сиз өз сөзүңиз билен акланып, өз сөзүңиз билен хөкүм эдилерсиңиз».

Юнусың аламаты

³⁸ Шонда кәбир Төврат мугаллымлары ве фарисейлер Оңа җогап берип: «Мугаллым, биз Сенден бир гудратлы аламат гөрмек ислейәрис» дийдилер.

³⁹ Иса олара шейле җогап берди: «Бу эрбет ве бивепа несил аламат талап эдйәр, эмма оңа Юнус пыгамбериңкиден башга аламат берилмез.

⁴⁰ Юнусың үч гиҗе-гүндиз балыгың гарнында галышы ялы, Ынсан Оглы-да үч гиҗе-гүндиз ериң багрында галар.

⁴¹ Ниневе халкы кыямат гүни бу несле гаршы чыкып, оны хөкүм эдер, себәби олар Юнусың вагзы билен тоба гелдилер. Ине, бу ерде Юнусдан хем үстүн Бири бар.

⁴² Гүнорта меликеси кыямат гүни бу несле гаршы чыкып, оны хөкүм эдер, себәби ол Сүлейманың пәхимини диңлемек үчин, ериң аңры уҗундан гелди. Ине, бу ерде Сүлеймандан-да үстүн Бири бар.

⁴³ Арвах-җын адамдан чыкандан соң, гурак ерлере айланып, дынчлык гөзлейәр, эмма тапмаяр.

⁴⁴ Шонда ол: „Чыкан өйүме доланайын“ диййәр. Доланып геленде, өйүң сүпүрилги, хемме задың ербе-ердигини гөрйәр.

⁴⁵ Онсоң гидип, өзүнден хем эрбет еди рухы янына аляр-да, шол ере барып месген тутяр. Шейлеликде, ол адамың соңкы ягдайы өңкүсинден-де эрбет боляр. Бу эрбет несле-де шейле болар».

Исаның эҗеси ве инилери

⁴⁶ Иса халка гүррүң берип дурка, эҗеси билен инилери гелди. Олар Иса билен геплешҗек болуп, дашарда гарашып дурдулар.

⁴⁷ Кимдир бири Иса: «Эҗең билен доганларың Сениң билен геплешмек үчин дашарда гарашып дурлар» дийди.

⁴⁸ Эмма Иса муны айдана: «Мениң эҗем, доганларым ким?» дийди.

⁴⁹ Соңра эли билен шәгиртлерини гөркезип: «Ине, Мениң эҗем, доганларым шулардыр!

⁵⁰ Гөкдәки Атамың ислегини ким берҗай этсе, шол Мениң доганым, уям хем эҗемдир» дийди.