Matta 10 - Мукаддес Китап

10-нҗы бап Иса он ики шәгирдини сайлаяр

¹ Иса он ики шәгирдини янына чагырып, олара арвах-җынлары ковмага, хер хили кеселлере ве дертлере шыпа бермәге ыгтыяр берди.

^2-4 Шол он ики ресулың атлары шулардыр: биринҗиси Петрус лакамлы Симун ве онуң доганы Андрыс, Зебедейиң огуллары Якуп билен Ёханна, Филип, Бартоломей, Томас, салгытчы Матта, Алфейиң оглы Якуп, Таддей, ватанчы Симун, Иса хайынлык эден Юдас Искариот.

Иса Онкилери халкың арасына ёллаяр

⁵ Иса бу Онкилере шейле буйрук берип, олары халкың арасына ёллады: «Кесеки миллетлериң арасына гитмәң, самариялыларың хич бир шәхерине гирмәң.

⁶ Муңа дерек азашан гоюнлара меңзейән ысрайыл халкының арасына барың.

⁷ Баран ериңизде Гөгүң Шалыгының голайландыгыны вагыз эдиң.

⁸ Хассалары сагалдың, дери кеселлилери тәмизләң, өлүлери дирелдиң, арвах-җынлары чыкарың. Мугт алдыңыз, мугт бериң.

⁹ Гушагыңызда алтын, күмүш, мис, хич бир пул болмасын.

¹⁰ Ёл үчин яныңыза торба-да, артыкмач эшик-де, чарык-да, хаса-да алмаң, чүнки ишчи өз несибесине мынасыпдыр.

¹¹ Хайсы шәхере я-да оба барсаңыз, ол ерде өзүңизе мынасып адамы гөзләп тапып, гайдянчаңыз шол ерде болуң.

¹² Өе гирениңизде, өйдәкилере саг-саламатлык диләп, салам бериң.

¹³ Өйдәкилер муңа мынасып болсалар, дилән саламатлыгыңыз оларың үстүне инер, эмма мынасып болмасалар, бу өзүңизе өврүлип гелер.

¹⁴ Ким сизи кабул этмесе, сөзлериңизи диңлемесе, ол өйден я-да шәхерден чыкып баряркаңыз, аякларыңызың тозуны какың.

¹⁵ Сизе догрусыны айдярын: кыямат гүни ол шәхериң ягдайы Содом билен Гомора шәхерлериниң ягдайындан хас бетер болар.

Гелҗек мушакгатлар

¹⁶ Ине, Мен сизи мөҗеклериң арасына гоюнлар кимин ёллаярын. Шонуң үчин йылан ялы акыллы, кепдери кимин сада болуң.

¹⁷ Адамлардан әгә болуң! Олар сизи ерли казыете табшырарлар, синагогаларында гамчылап енҗерлер.

¹⁸ Мен себәпли сизи хөкүмдарларың, патышаларың хузурына элтерлер, сиз болса оларың ве кесеки миллетлериң өңүнде шаятлык эдерсиңиз.

¹⁹ Йөне олар сизи элтип табшыранларында, сиз нәме я-да нәдип айтҗакдыгыңызы гайгы этмәң. Сизе нәме айтмалыдыгыңыз шол вагтың өзүнде берлер.

²⁰ Шонда сизиң өзүңиз дәл-де, сиз аркалы Атаңызың Рухы гепләр.

²¹ Доган доганыны, ата чагасыны өлүме табшырар. Чагалар хем эне-аталарына гаршы чыкып, олары өлдүрдерлер.

²² Мен себәпли хеммелер сизи йигренер, эмма соңуна ченли чыдан халас болар.

²³ Сизи бир шәхерде ызарласалар, бейлекисине гачың. Сизе догрусыны айдярын, Ынсан Оглы гелйәнчә, сиз Ысрайылың әхли шәхерлерине айланып чыкып билмерсиңиз.

²⁴ Шәгирт өз халыпасындан, гул өз хоҗайынындан үстүн дәлдир.

²⁵ Шәгирдиң өз халыпасы ялы, гулуң өз хоҗайыны ялы болмагы етерликдир. Эгер өй эесине Беелзебул диййән болсалар, онда онуң ичерисиндәкилере ондан хем бетер зат диймезлерми?!

Кимден горкмалы?

²⁶ Шонуң үчин хич кимден горкмаң. Япык болуп, үсти ачылмаҗак, гизлин болуп, билинмеҗек зат ёкдур.

²⁷ Гараңкылыкда сизе нәме айтсам, шоны ягтылыкда айдың. Гулагыңыза пышырданымы үчекден ыглан эдиң.

²⁸ Бедени өлдүрип, җаны өлдүрип билмейәнлерден горкмаң. Говусы, бедени хем, җаны хем довзахда ёк этмәге гүйҗи етйән Худайдан горкуң.

²⁹ Ики серче бир теңңә сатылмаярмы? Муңа гарамаздан, Атаңыздан ругсатсыз оларың бири-де ере гачян дәлдир.

³⁰ Сизиң башыңыздакы сачыңыз хем долы саналгыдыр.

³¹ Шунлукда, горкмаң, сиз серчелерден хас гымматлысыңыз.

³² Ким Мени ынсанларың өңүнде ыкрар этсе, Мен хем оны гөкдәки Атамың өңүнде ыкрар эдерин.

³³ Ким Мени адамларың өңүнде рет этсе, Мен хем оны гөкдәки Атамың өңүнде рет эдерин.

Парахатлык дәл-де, гылыч гетирдим

³⁴ Мени ер йүзүне парахатлык гетирмәге гелендир өйтмәң. Мен парахатлык дәл-де, гылыч гетирмәге гелдим.

³⁵ Мен оглы атасындан, гызы энесинден, гелни гайыненесинден айырмага гелдим.

³⁶ Адамың душманы өз ичерисиндәкилер болар.

³⁷ Атасыны, энесини Менден артык сөен Маңа мынасып дәлдир. Оглуны, гызыны Менден артык сөен Маңа мынасып дәлдир.

³⁸ Өз хачыны алып, Мениң ызыма дүшмедик хем Маңа мынасып дәлдир.

³⁹ Җаныны аян оны йитирер. Мениң угрумда җаныны йитирен оны горар.

⁴⁰ Сизи кабул эден Мени кабул эдер, Мени кабул эден хем Мени Иберени кабул эдер.

⁴¹ Ким бирини пыгамбердиги үчин кабул этсе, пыгамбериң сылагыны алар. Бир догры адамы догрулыгы үчин кабул эден догры адамың сылагыны алар.

⁴² Ким Мениң шәгирдимиң хорматы үчин, бу пес сайылянларың бирине диңе бир кәсе совук сув берсе-де, сизе догрусыны айдярын, ол асла сылагсыз галмаз».