Mark 1 - Мукаддес Китап

1‑нҗи бап Яхя чүмдүриҗиниң вагзы

¹ Бу Худайың Оглы Иса Месих хакдакы Хош Хабарың башлангыҗыдыр.

² Ишая пыгамбериң китабында шейле язылан: «Өңүңден ёл тайярлар ялы, ине, Мен Өз векилими иберйәрин.

³ Чөлде бир сес гыгыряр: „Реббе ёл тайынлаң! Онуң ёдаларыны дүзләң!“ диййәр».

⁴ Шунлукда, Яхя пейда болуп, чөлде адамлары сува чүмдүрйәрди. Ол адамлара гүнәлериниң багышланмагы үчин тоба эдип, сува чүмдүрилмеклерини вагыз эдйәрди.

⁵ Тутуш Яхудыяның ве Иерусалимиң илаты онуң янына гелйәрди. Олар гүнәлери үчин тоба эдип, Яхя тарапындан Иордан дерясында сува чүмдүрилйәрдилер.

⁶ Яхяның дүе йүңүнден эшиклери, билинде гайышдан гушагы барды. Ол чекиртге билен мейдан балыны иййәрди.

⁷ Ол: «Менден соңра Гелҗек менден хас гүйчлүдир. Мен эглип, Онуң чарыгының багыны чөзмәге-де мынасып дәлдирин.

⁸ Мен сизи сува чүмдүрйәрин, эмма Ол сизи Мукаддес Руха чүмдүрер» дийип вагыз эдйәрди.

Иса сува чүмдүрилйәр ве сыналяр

⁹ Шол гүнлерде Иса Җелиләниң Насыра шәхеринден Яхяның янына гелди. Яхя Оны Иордан дерясында чүмдүрди.

¹⁰ Иса сувдан чыкып гелйәркә, асманың ярыланыны ве Мукаддес Рухуң кепдери гөрнүшде Өз үстүне инип гелйәнини гөрди.

¹¹ Шол вагт гөкден: «Сен Мениң сөвер Оглумсың, Мен Сенден көп разыдырын» диен оваз гелди.

¹² Мукаддес Рух Исаны дессине чөле ёллады.

¹³ Иса чөлде кырк гүн болуп, шейтан тарапындан сынага салынды. Ол ябаны хайванларың арасында яшады, перишделер Оңа хызмат этдилер.

Иса илкинҗи шәгиртлерини чагыряр

¹⁴ Яхя туссаг эдиленден соңра, Иса Җелилә гелип, Худайың Хош Хабарыны вагыз этди.

¹⁵ Ол: «Вагт долды, Худайың Шалыгы голайлады. Тоба эдиң, Хош Хабара ынаның!» диййәрди.

¹⁶ Иса Җелиле көлүниң кенарындан гечип барярка, көле тор ташлап дуран Симун билен онуң доганы Андрысы гөрди. Олар балыкчыдылар.

¹⁷ Иса олара: «Мениң ызыма дүшүң, Мен сизи ынсан тутян балыкчылар эдейин» дийди.

¹⁸ Олар хем шол вагтың өзүнде торларыны ташлап, Онуң ызына дүшдүлер.

¹⁹ Бираз йөрәнлеринден соң, Иса Зебедейиң огуллары Якуп билен Ёханнаны гөрди. Олар гайыгың ичинде торларыны беҗерип отырдылар.

²⁰ Иса олары гөрен бадына чагырды. Олар хем какалары Зебедей билен гүнлүкчилери гайыкда галдырып, Исаның ызына дүшдүлер.

Иса арвах-җынлары ковяр, хассалары сагалдяр

²¹ Олар Капернаума гелдилер. Сабат гүни Иса синагога барып, өвретмәге башлады.

²² Онуң таглыматына хайран галдылар, себәби Иса адамлара Төврат мугаллымлары ялы дәл-де, эрк-ыгтыярлы бири ялы өвредйәрди.

²³ Шол вагт оларың синагогасында арвах-җын эелән бир адам барды. Ол:

²⁴ «Эй, насыралы Иса! Бизиң билен нәме ишиң бар? Бизи ёк этмәге гелдиңми? Мен Сениң кимдигиңи билйәрин, Сен Худайың Мукаддесисиң» дийип гыгырды.

²⁵ Иса арвах-җына кәйәп: «Сем бол! Бу адамдан чык!» дийип буйрук берди.

²⁶ Арвах-җын хем ол адамы сандыратды-да, багырып ондан чыкды.

²⁷ Хеммелер хайран галып, бири-бирлерине: «Бу нәме болдугы? Бу бир тәзе таглымат! Ол арвах-җынлара эрк-ыгтыяр билен буйрук берйәр, олар-да Оңа табын болярлар!» дийишдилер.

²⁸ Шейлеликде, Иса хакындакы хабар шобада Җелиләниң әхли этрабына яйрады.

²⁹ Олар синагогадан чыкып, Симун ве Андрысың өйүне гитдилер, Якуп билен Ёханна хем олар биленди.

³⁰ Симуның гайыненесини гыззырма тутуп ятандыгыны Иса хабар бердилер.

³¹ Шонда Иса хассаның янына барды-да, оны элинден тутуп галдырды. Аялың гыззырмасы шобада айрылды ве ол мыхманлара хызмат этмәге башлады.

³² Гүн батып, агшам дүшенде, әхли хассалары, арвах-җын эелән адамлары Онуң янына гетирдилер.

³³ Шәхериң әхли халкы гапының агзына йыгнанышыпды.

³⁴ Иса дүрли кеселе учран энчеме хассаны сагалтды, энчеме арвах-җыны ковуп чыкарды. Ол арвах-җынлара геплемәге ыгтыяр бермеди, себәби олар Онуң кимдигини билйәрдилер.

³⁵ Ир сәхер билен хениз даң атманка, Иса туруп, дашары чыкды. Бир чола ере барып, Худая дога этди.

³⁶ Симун билен янындакылар Оны гөзлемәге гитдилер.

³⁷ Оны тапанларында: «Хеммелер Сени гөзләп йөр» дийдилер.

³⁸ Иса олара: «Йөрүң, башга ере, голайдакы обалара гиделиң, Мен ол ерлерде-де вагыз этҗек, хут шонуң үчин хем гелдим» дийди.

³⁹ Шейлеликде, Иса оларың синагогаларында вагыз эдип, арвах-җынлары ковуп чыкарып, тутуш Җелиләниң ичине айланды.

Иса дери кеселлини сагалдяр

⁴⁰ Исаның янына дери кеселине ёлуган бир адам гелди. Ол дызына чөкүп, Оңа: «Эгер ислесең, мени бу кеселден тәмизләп билерсиң» дийип ялбарды.

⁴¹ Исаның ол адама йүреги авады. Ол элини узатды-да, оңа дегрип: «Ислейәрин, тәмиз бол!» дийди.

⁴² Бу адам шобада дери кеселинден сапланып, долы сагалды.

^43-44 Иса оны уграданда, оңа: «Әгә бол, муны хич киме айтмагын. Йөне гит-де, рухана гөрүн ве дери кеселинден сапланандыгыңы хеммелере субут эдер ялы, Мусаның буйран садакасыны бер» дийип, берк табшырык берди.

⁴⁵ Эмма ол адам гидип, болан затлары етишибилдигине гүррүң бермәге ве яйратмага башлады. Шонуң үчин Иса инди хич бир шәхере аркайын гирип билмән, олардан дашда, чола ерлерде болярды. Эмма хемме ерден Онуң янына адамлар гелйәрдилер.