Luka 17 - Мукаддес Китап

17‑нҗи бап Багышлама ве иман барадакы таглымат

¹ Иса шәгиртлерине шейле дийди: «Адамлары гүнә дучар эдйән затларың гелмеги гутулгысыздыр, эмма бу затларың гелмегине ярдам берйән адамың дат гүнүне!

² Маңа ынанян пес гөвүнлилериң бириниң гүнә этмегине себәп боланындан, бойнундан бир дегирмен дашы асылып, деңзе ташлананы онуң үчин хас оңат болар.

³ Хабардар болуң! Эгер доганың гүнә этсе, оңа кәе. Эгер ол тоба этсе, оны багышла.

⁴ Ол саңа гаршы гүнде еди гезек гүнә эдип, еди гезек хем яныңа гелип: „Тоба эдйәрин!“ дийсе, оны багышла».

⁵ Ресуллар Реб Иса: «Бизиң иманымызы артдыр!» дийдилер.

⁶ Ол шейле дийди: «Эгер сизиң бир горчица дәнеси ялы иманыңыз болуп, шу тут агаҗына: „Бу ерден гопарыл-да, деңизде гөгер!“ дийсеңиз, ол сизе гулак асар.

⁷ Айдалы, сизиң ер сүрйән я-да чопанчылык эдйән хызматкәриңиз бар. Ол мейдандан геленде, сизиң хайсыңыз оңа: „Басым гел-де, сачак башында отур“ диерсиңиз?

⁸ Гайтам, оңа: „Мениң агшамлыгымы тайярла, билиңи гуша-да, ийип-ичйәнчәм, маңа хызмат эт, өзүң соңра ийип-ичерсиң“ диймезми?

⁹ Буйрукларыны берҗай эдени үчин, ол хызматкәре миннетдарлык билдирерми?

¹⁰ Сиз хем өзүңизе буйрулан әхли зады берҗай эдениңизден соң: „Биз хем йөне бир хызматкәрдирис, диңе өзүмизе табшырылан юмшы ерине етирдик“ дийиң».

Иса он саны дери кеселлини сагалдяр

¹¹ Иса Самария билен Җелиләниң үстүнден гечип, Иерусалиме тарап гитди.

^12-13 Ол обаларың бирине гиренде, Оңа эндамы дери кеселине дучар болан он адам саташды. Олар узакда дуруп, гаты сес билен: «Эй, Иса! Халыпа, бизе рехим эт!» дийдилер.

¹⁴ Иса олары гөрүп: «Барың, руханылара гөрнүң» дийди. Олар ёлдакалар кеселден сапланды.

¹⁵ Оларың бири сагаланыны гөрүп, гаты сес билен Худайы шөхратландырып, ызына өврүлди.

¹⁶ Ол Исаның аякларына йыкылып, Оңа миннетдарлык билдирди. Бу адам самариялыды.

¹⁷ Иса: «Кеселден сапланан он киши дәлмиди? Галан докуз адам ниреде?

¹⁸ Худайы шөхратландырмак үчин бу кесекиден башга хич ким ызына өврүлмедими?» дийип сорады.

¹⁹ Онсоң оңа: «Тур, гидибер, иманың сени халас этди» дийди.

Худайың Шалыгының гелши барада

²⁰ Бир гүн фарисейлер Исадан Худайың Шалыгының хачан гелҗекдигини соранларында, Ол: «Худайың Шалыгы гөзе гөрнүп гелмез.

²¹ Адамлар: „Ине, бу ерде!“ я-да „Анха, ол ерде!“ диймезлер, себәби Худайың Шалыгы сизиң араңыздадыр» дийип җогап берди.

²² Онсоң Иса шәгиртлерине шейле дийди: «Ынсан Оглуның гүнлеринден бирини гөрмеги күйсеҗек вагтыңыз гелер, эмма ол гүни гөрмерсиңиз.

²³ Адамлар сизе: „Ине, Ынсан Оглы шу ерде!“ я-да „Анха, ол ерде!“ диерлер. Эмма гитмәң, оларың ызына дүшмәң!

²⁴ Йылдырым гөгүң бир уҗундан чакып, бейлеки бир уҗуны нәхили ягтылдян болса, Ынсан Оглы хем Өз гүнүнде шейле болар.

²⁵ Эмма Ол өңүрти көп гөрги гөрүп, бу несил тарапындан рет эдилмелидир.

²⁶ Нухуң гүнлеринде нәхили болан болса, Ынсан Оглуның гүнлеринде-де шейле болар.

²⁷ Адамлар Нухуң гәмә мүнен гүнүне ченли ийип-ичип, өйленип, дурмуша чыкып, аркайын яшап йөрдүлер. Соңра әпет сил гелип, барыны ёк этди.

²⁸ Лутуң гүнлеринде хем шонуң ялы болды: адамлар ийип-ичип, алып-сатып, экип-дикип йөрдүлер.

²⁹ Эмма Лутуң Содомдан чыкан гүни гөкден от билен күкүрт ягып, хеммесини ёк этди.

³⁰ Ынсан Оглуның пейда болҗак гүнүнде хем шейле болар.

³¹ Шол гүн үчекдәки адам өйдәки затларыны алмак үчин ашак дүшмесин. Шейле-де, экин мейданындакы хем ызына гелмесин.

³² Лутуң аялыны яда салың!

³³ Ким җаныны аямага чалышса, оны йитирер, ким җаныны йитирсе, оны аман саклар.

³⁴ Сизе шуны айдярын: шол гиҗе бир дүшекде ики адам болар, бири алнар, бири гойлар.

³⁵ Билеликде бугдай үвейән ики аял болар, бири алнар, бейлекиси гойлар».

³⁷ Шәгиртлер Иса йүзленип: «Агам, бу хадысалар ниреде болар?» дийип сорадылар. Иса хем: «Маслык ниреде болса, гарагушлар хем шол ере үйшйәндир» дийип җогап берди.