Lewiler 6 - Мукаддес Китап

6-нҗы бап

¹ Реб Муса шейле дийди:

² «Эгер кимдир бири аманат я-да гирев гоян кишә бивепалык этсе, я-да огурлык этсе, я-да оны алдап, Реббиң табшырыкларыны бозса,

^3-4 я йитен зады тапып алыбам, бу хакда яландан ант ичип, ынсаның эдәйҗек затларының бирини эдип гүнә газанып, соңам өз эден гүнәсине дүшүнип, зорлук я-да хиле билен алан я-да өзүне аманат берлен, я-да бири тарапындан йитирилен ве өзүниң тапан задыны,

⁵ я-да яландан ант ичен ислендик задыны бүтинлигине ве онуң бәшден бир гымматыны-да үстүне гошуп, өз языгыны билен бадына, оны эесине гайтарып берсин.

⁶ Соңра ол өзүниң Реббе язык гурбанлыгы хөкмүнде рухана сүрүден бир шикессиз гоч я-да онуң ерини тутҗак башга бир зат гетирип берсин.

⁷ Онсоң руханы Реббиң хузурында гүнәлини гүнәсинден сапласын ве шонда онуң нәхили гүнә эдендигине гарамаздан, Худай онуң гүнәсини гечер».

Якма гурбанлыгы

⁸ Реб Муса шейле дийди:

⁹ «Харуна ве онуң огулларына табшыр. Якма гурбанлыгының берлиш кадасы шейледир: Якма гурбанлыгы узаклы гиҗе гурбанлык сыпасының үстүнде гоюлмалыдыр. Гурбанлык сыпасындакы от болса өчүрилмели дәлдир.

¹⁰ Эртеси ирден руханы эгнине непис зыгыр матадан тикилен ички гейимини ве онуң үстүнден зыгыр матадан тикилен лыбасларыны гейсин. Соңра ол гурбанлык сыпасының үстүндәки отда янан якма гурбанлык малының күлүни айрып, оны гурбанлык сыпасының гапдалында гойсун.

¹¹ Онсоң руханы зыгыр матадан тикилен лыбасларыны чыкарып, башга эшиклерини гейсин ве күли дүшелгәниң дашына чыкарып, халал ере дөксүн.

¹² Гурбанлык сыпасының үстүндәки от мыдама янып дурсун, ол хич хачан сөнмесин. Эртирлерине руханы одуң үстүне одун атсын. Якма гурбанлык малының бөлекленен этлерини онуң үстүне өрсүн. Саламатлык гурбанлыкларының ягыны-да отда яксын.

¹³ Гурбанлык сыпасының үстүнде хемишелик от янып дурсун, ол хич хачан өчмесин.

Галла садакасы

¹⁴ Галла садакасының берлиш кадасы шейледир: Оны Харуның огуллары Реббиң хузурында, гурбанлык сыпасының өңүнде берсинлер.

¹⁵ Руханы галла садакасының зейтун ягына гарылан сайлама унундан ве онуң үстүндәки якымлы ыслы түтетгиден гошавуҗыны долдурып алып, олары Реббиң ёлуна от үсти билен берилйән садака пайы хөкмүнде гурбанлык сыпасында яксын. Онуң ысы Реббе якымлыдыр.

¹⁶ Онуң галаныны Харун ве онуң огуллары ийсин. Ондан петир биширилип, олар мукаддес ерде, Реббе йүз тутулян чадырың ховлусында ийилсин.

¹⁷ Ол хамырмаясыз болсун. Мен муны Реббе от үсти билен берлен садакаларымдан оларың пайы хөкмүнде бердим. Эдил гүнә гурбанлыгы ве язык гурбанлыгы ялы бу галла садакасы хем өрән мукаддес садакадыр.

¹⁸ Харуның неслинден болан хер бир эркек гөбекли бу галла садакасындан ийип билер. Бу Реббе от үсти билен берлен садакалардан онуң несиллери үчин эбедилик пайдыр. Бу галла садакасына Харуның огулларындан башга галташан хер кес бетбагтчылыга учрар».

¹⁹ Реб Муса шейле дийди:

²⁰ «Харуның ве онуң огулларының белленен гүни Реббе бермели садакасы, ине, шундан ыбаратдыр: сайлама бугдай унуның ондан бир батманыны гүнделик садака хөкмүнде берсинлер. Онуң ярысы эртирине, бейлеки ярысы агшамына берилсин.

²¹ Ол ун зейтун ягына югрулып, сачда яга биширилен петир бөлеклери Реббе якымлы ыс чыкармак үчин галла садакасы хөкмүнде хөдүр эдилсин.

²² Галла садакасыны Харуның неслинден болан, башына яг гуйлуп сайланан баш руханы тайярламалыдыр. Бу садака Реббе эбедилик пай хөкмүнде тутушлыгына якылсын.

²³ Руханының берйән хер бир галла садакасы тутушлыгына якылмалыдыр, ол ийилмели дәлдир».

Гүнә гурбанлыгы

²⁴ Реб Муса шейле дийди:

²⁵ «Харуна ве онуң огулларына айт: „Гүнә гурбанлыгың берлиш кадасы шейледир: гүнә гурбанлыгы үчин берилйән малың дамагы Реббиң хузурында, якма гурбанлык малының өлдүрилйән еринде чалынсын. Бу өрән мукаддес гурбанлыкдыр.

²⁶ Оны гүнә гурбанлыгы үчин хөдүр эден руханы ийсин. Ол мукаддес ерде, Реббе йүз тутулян чадырың ховлусында ийилсин.

²⁷ Харуның огулларындан башга гурбанлык малының этине галташан хер кес бетбагтчылыга учрар. Эгер онуң ганы эгин-эшиге сычраса, ол мукаддес ерде ювулсын.

²⁸ Гурбанлык малының эти гайнадылан тоюн гап дөвүлсин. Эгер ол бүрүнч гапда гайнадылан болса, ол гап сүртгүч билен сүртүлип, сув билен чайкалсын.

²⁹ Руханылар уругындан болан хер бир эркек гөбекли ондан ийип билер. Бу гурбанлык өрән мукаддес гурбанлыкдыр.

³⁰ Эмма мукаддес отагда гүнәден сапламак үчин, Реббе йүз тутулян чадырың ичине ганы гетирилен гүнә гурбанлыгы үчин берлен малың эти ийилмели дәлдир. Ол ода якылмалыдыр.