Lewiler 22 - Мукаддес Китап

22‑нҗи бап Садакаларың мукаддеслиги

¹ Реб Муса шейле дийди:

² «Харуна ве онуң огулларына айт: „Харун ве онуң огуллары ысрайыл халкының Маңа багыш эден мукаддес садакаларына сересаплы чемелешсинлер. Олар Мениң мукаддес адыма ыснат гетирмесинлер. Мен Ребдирин“.

³ Олара шейле дий: „Эгер сизиң гелҗекки несиллериңизден, тохум-тиҗиңизден бири, ысрайыл халкының Маңа багыш эден мукаддес садакаларына харамлыкда якынлашса, ол Мениң хузурымдан ёк эдилсин. Худайыңыз Реб Мендирин.

^4-6 Харун неслинден болан ёканчлы дери кесели я-да сувуклык акмасы болан эркек тәмизленйәнчә, мукаддес садакалардан иймели дәлдир. Җеседе дегип, харам болан ислендик зада галташан я-да тохум акан эркеге я-да ынсаны харам эдйән гурыер сүйрениҗилериниң бирине я-да харамлыгы нәмедигиниң пархы болмадык ынсаны харам эдйән шу агзалан затлардан бирине галташан руханы агшама ченли харамдыр. Ол сува дүшүнмезден, мукаддес садакалардан иймесин.

⁷ Гүн яшан чагы руханы тәмиз болар, диңе шондан соң ол мукаддес садакалардан ийип билер, чүнки бу садака руханылар машгаласына дегишлидир.

⁸ Руханы харам өлен я-да йыртыҗыларың парчалан хайванының этинден ийип, өзүни харам этмесин. Худайыңыз Реб Мендирин.

⁹ Руханылар Мениң буйрукларымы берҗай этсинлер, ёгсам олар мукаддес чадыры харландыклары үчин, өз җезаларыны чекип өлерлер. Олары мукаддес эдйән Худайыңыз Реб Мендирин.

¹⁰ Руханы машгаласындан болмадык адам мукаддес садакалардан иймели дәлдир. Руханыңкыда вагтлайын яшаян гелмишек я-да гүнлүкчи мукаддес садакалардан иймесин.

¹¹ Эмма руханының сатын алан гулы ве онуң өйүнде догланлар онуң сачагындан ийип билер.

¹² Эгер руханының гызы руханы машгаласындан болмадык бирине дурмуша чыкса, ол хөдүр эдилен мукаддес садакалардан иймели дәлдир.

¹³ Эмма руханының гызы айрылышып я дул галып, чагасы болман, яшлыгындакы ялы атасы өйүне доланып гелсе, ол какасының сачагындан ийип билер, йөне башга бир гелмишек ондан иймесин.

¹⁴ Эгер бир адам төтәнликден мукаддес садакадан ийсе, онда ол онуң бахасының бәшден бирини үстүне гошуп, мукаддес садаканы рухана берсин.

^15-16 Руханылар ысрайыл халкының Реббе хөдүр эден мукаддес садакаларыны халкың иймегине ёл берип, өзлерине дегишли мукаддес садакалары харламасынлар. Бу халкы языклы эдип, башларына җеза гетирдйәндир. Чүнки ол садакалары мукаддес эдйән Худайыңыз Реб Мендирин“».

¹⁷ Реб Муса шейле дийди:

^18-19 «Харуна, онуң огулларына ве бүтин ысрайыл халкына айт: „Ысрайыллармы я-да Ысрайылда яшаян гелмишек – пархы ёк, ким Реббе якма гурбанлык хөкмүнде хөдүрленйән, өз айдылан я-да мейлетин садакасыны хөдүр этсе, сизиң гурбанлыгыңызың кабул болары ялы, гара малмы, гоюн-гечи – пархы ёк, ол шикессиз эркек мал болсун.

²⁰ Шикесли малы гурбанлык бермәң, чүнки ол кабул болмаз.

²¹ Эгер кимде-ким айдылан я-да мейлетин садака хөкмүнде гара маллардан я-да доварлардан Реббе саламатлык гурбанлыгыны бермекчи болса, онуң кабул болары ялы, ол гурат, шикессиз мал болсун.

²² Көр, шикес етен я-да майып, баш кеселли, готур я-да демревли малы Реббе хөдүр этмәң, шейле маллары Реббе от үсти билен берилйән садака хөкмүнде гурбанлык сыпасының үстүне гоймаң.

²³ Гөвресинде артыклыгы я кемиси болан өкүзчәни я гузыны мейлетин садака хөкмүнде хөдүрләп билерсиңиз, йөне ол айдылан садаканың ерине кабул болмаз.

²⁴ Эркеклик тохумлыгы енҗилен, сындырылан, ёлнан я-да кесилен малы Реббе хөдүр этмәң, юрдуңызда бейле иш эдилмесин.

²⁵ Шейле хайванлары Реббе иймит садакасы хөкмүнде хөдүр этмек үчин, гелмишегиң элинден алмаң, чүнки олар майып-мүҗрүп, шикесли боландыклары үчин, Реббе иймит садакасы хөкмүнде кабул болмаз“».

²⁶ Реб Муса шейле дийди:

²⁷ «Гөле, гузы я-да овлак догландан соң, ол еди гүнләп энесиниң янында болсун. Секизинҗи гүнден башлап, ол Реббе от үсти билен берилйән гурбанлык хөкмүнде кабул эдилер.

²⁸ Йөне сыгрың ве онуң гөлесиниң, гойнуң ве онуң гузусының, ягны малың ве онуң чагасының дамагыны бир гүнде чалмаң.

²⁹ Эгер Реббе шүкүр садакасыны хөдүр этсеңиз, оны кабул болар ялы эдип бериң.

³⁰ Садака шол гүнүң өзүнде ийилсин, ондан эртире хич зат галдырылмасын. Мен Ребдирин.

³¹ Сиз Мениң буйрукларымы саклап, олары берҗай эдиң. Мен Ребдирин.

³² Мениң ысрайыл халкының арасында мукаддес хасапланарым ялы, сиз Мениң адыма ыснат гетирмәң. Сизи мукаддес эдйән Худайыңыз Реб Мендирин.

³³ Сизиң Худайыңыз болмак үчин, сизи Мүсүр юрдундан чыкарып гетирен Мендирин. Мен Ребдирин».