Işaýa 56 - Мукаддес Китап

56-нҗы бап Реббиң әхли миллетлер билен эден әхти

¹ Реб шейле диййәр: «Адалаты саклаң, догры ишлери эдиң, ине, Мен тизара азат этмәге гелерин, халас эдишими аян эдерин.

² Муны эдйән ынсан, оны берк саклаян нәхили багтлы! Ол Сабат гүнүни амал эдип, оны харламаяр, элини хер хили яман ишден саклаяр».

³ Гой, Реббе бил баглаян кесеки: «Реб мени Өз халкындан айрар» диймесин, Агта: «Ине, мен бир гуры агачдырын» диймесин.

⁴ Реб шейле диййәр: «Сабат гүнлерими амал эдйән, Маңа яраян затлары сайлаян, әхтими берк саклаян агталара

⁵ өйүмде, диварларымың ичинде огул-гызларыңкыдан-да зыяда хатыра хем ат берерин; олара өлмез-йитмез эбеди ат берерин.

⁶ Реббе хызмат этмек үчин, Реббиң адыны сөймек үчин, Онуң бендеси болмак үчин Реббе бил баглаян кесекилери, Сабат канунымы харламан ерине етирйәнлери, әхтими берк саклаянлары,

⁷ мукаддес дагыма гетирерин, ыбадат өйүмде шатландырарын олары; якма гурбанлыклары, башга гурбанлыклары гурбанлык сыпамда кабул эдилер; чүнки Мениң өйүм әхли миллетлер үчин ыбадат өйи дийип атландырылар».

⁸ Ысрайылың ковланларыны топлаян Хөкмүрован Реб шейле диййәр: «Мен өйүме эййәм топлананлардан бейлекилерини-де топларын».

Ысрайылың азгын баштутанлары

⁹ Эй, әхли вагшы хайванлар, эй, бүтин җеңңел хайванлары, гелиң, иймәге гелиң!

¹⁰ Ысрайылың сакчылары көр, хич зады билмейәрлер; әхлиси үйрүп билмейән лал итлердир; олар ятып, дүйш гөрйәрлер, укламагы говы гөрйәрлер.

¹¹ Дояныны билмейән ачгөз итлердир олар. Олар дүшүнҗесиз чопанлардыр; херси өз ёлы билен гидйәр, хер кес өз бәхбидини араяр.

¹² Олар: «Гелиң, шерап гетирелиң! Чакырдан җулк доялың. Эртиримизем шу гүн ялы болар, хатда мунданам хас говы болар» диййәрлер.