Işaýa 39 - Мукаддес Китап

39-нҗы бап Бабылдан гелен чапарлар

¹ Шол дөвүрде Бабыл патышасы Баладаның оглы Меродакбаладан Хизкия патышаның кеселләндигини ве сагаландыгыны эшидип, оңа векиллеринден хатлар билен пешгеш ёллады.

² Хизкия Бабыл патышасының векиллерини шатлык билен кабул этди; олара хазынасындакы күмшүни, алтыныны, хошбой ыслы затларыны, гымматбаха ягларыны, яраг горханасыны хем-де аммарларындакы затлары гөркезди. Ол көшгүндәки ве бүтин патышалыгындакы затларың барыны векиллере гөркезди.

³ Онсоң Ишая пыгамбер Хизкия патышаның янына гелип, ондан: «Бу адамлар саңа нәме дийдилер? Олар сениң яныңа ниреден гелдилер?» дийип сорады. Хизкия хем: «Олар узак юрт Бабылдан гелдилер» дийип җогап берди.

⁴ Ишая: «Олар сениң көшгүңде нәмелер гөрдүлер?» дийип, Хизкиядан сорады. Хизкия: «Олар мениң көшгүмдәки затларың әхлисини гөрдүлер. Аммарларымда олара гөркезилмедик задым галмады» дийип җогап берди.

⁵ Онсоң Ишая пыгамбер Хизкия шейле дийди: «Хөкмүрован Реббиң сөзүни эшит:

⁶ „Бир гүн сениң көшгүңдәки затларың хеммеси ве ата-бабаларыңың тә шу гүне ченли йыгнан затларының бары Бабыла әкидилер, екеҗе зат хем галдырылмаз.

⁷ Сениң өз багрыңдан өнен огулларың Бабыла сүргүн эдилип, шол ерде патышаның көшгүнде агталар боларлар“».

⁸ Онсоң Хизкия Ишая пыгамбере: «Реббиң сениң үстүң билен айдан сөзи ягшы сөздүр» дийди. Хизкия: «Мениң дөврүмде асудалык ве ховпсузлык болар» дийип пикир эдйәрди.