Işaýa 35 - Мукаддес Китап

35‑нҗи бап Мукаддес ёл

¹ Чөл-бееван ве гуры ер шатланар, чөл гуванып, неркес кимин гүлләр.

² Гүл-пүрчүк болар ол, шатлыкдан, гуванчдан яңа нагма айдар. Ливаның гөзеллиги, Кармелиң, Шароның гөрки берлер оңа. Олар Реббиң шөхратыны, Худайымызың шан-шөхратыны гөрерлер.

³ Эҗиз голлара гуҗур бериң, кувват бериң эҗиз дызлара.

⁴ Товшанйүреклилере: «Гайрата галың! Горкмаң! Ине, Худайыңыз өч алмага гелйәр, Ол мынасып хак билен гелип, сизи халас эдер» дийиң.

⁵ Шонда көрлериң гөзлери, керлериң гулаклары ачылар;

⁶ Агсаклар кейик кимин бөкҗекләрлер, лал диллер шатлыкдан айдым айдарлар; дүзден сувлар, чөлден чешмелер чогуп чыкар;

⁷ Гызгын гум ховдана, тешне топрак сув булакларына өврүлер; шагалларың месген тутан мейданына гамыш, гаргы гамыш битер.

⁸ Ол ерде шаёл болар, оңа Мукаддес Ёл дийлер; харам адам ондан гечмез, ол диңе шол Ёла голай яшаянларыңкы болар, хатда акмаклар-да ол ёлдан азашмаз.

⁹ Арслан болмаз ол ерде, йыртыҗы хайван ол ёла чыкмаз, олар онда тапылмаз, бу ёлдан диңе халас эдиленлер йөрәрлер.

¹⁰ Реббиң азат эденлери ыза доланарлар, айдым айдып, Сиона гайдып гелерлер; эбеди шатлыга говшар олар, бегенчден, шатлыкдан доларлар, гайгыдыр гам-гусса ёк болар.