Işaýa 33 - Мукаддес Китап

33‑нҗи бап Ярдам үчин ялбарыш

¹ Өзи вейран эдилмән, вейран эдйәниң, өзүне дөнүклик эдилмән, дөнүклик эдйәниң дат гүнүне! Вейран эдениңден соң, өзүңи-де вейран эдерлер; дөнүклик этмеги бес эдениңде, саңа-да дөнүклик эдилер.

² Я Реб, бизе мерхемет эт! Биз Саңа умыт баглаярыс. Сәхерлерине гүйч бер, хасратлы пурсатларда бизи халас эт!

³ Гудратлы сесиңден халклар гачярлар, шан-шөхратыңдан миллетлер дагашярлар.

⁴ Олҗаңыз чекиртгелериң йыгнайшы кимин йыгналяр, олар чекиртгелериң топулышы дей олҗаның үстүне топулярлар.

⁵ Бейикдир ёкарда отуран Реб, адалатдан, догрулыкдан долдуряр Ол Сионы.

⁶ Ол сениң дөвүрлериң берк бинядыдыр, бол даналык хем билим болар; Ол ызыгидерли халас эдер. Ребден горкмак халкының хазынасыдыр.

⁷ Ине, батырлары көчелерде перят эдйәрлер, зар-зар аглашярлар парахатчылык илчилери.

⁸ Шаёллар чоларяр, ёлагчылар ол ёлдан гечмез. Шертнама бозуляр, антларыны рет эдйәрлер, ынсанлары әсгермейәрлер.

⁹ Юрт яс тутуп, рухдан дүшйәр, Ливан утанчдан саралып-соляр, Шарон Араба чөли киминдир; Башан ве Кармел япракларыны дөкйәр.

¹⁰ Реб: «Инди аяга галарын, инди бейгелерин, беленде гөтерилерин.

¹¹ Сиз самандан хамыла болуп, сыпал догурярсыңыз; демиңиз сизи ялмаян отдур.

¹² Халклар янып, күл боларлар, кесилип, ода якылан тикенлер дек боларлар».

¹³ Эй, узакдакылар, эденлерими эшидиң, эй, якындакылар, гудратымы билиң!

¹⁴ Сиондакы гүнәкәрлер довла дүшүп, худайсызлар лерзана гелди: «Хайсымыз ялмаян одуң башында орнашып билерис?»

¹⁵ Догручыл яшап, догры сөзлейәнлер сүтем билен газанылан газанҗы йигренйәнлер, элини пара алмакдан саклаянлар, ган дөкүшиклиге гулак габартмаянлар, яманлыга гөзлерини юмянлар

¹⁶ белентликлерде яшарлар. Гаялардакы галалар пеналары болар, чөреклери берлер, тешне галдырылмазлар.

Аҗайып патышаның юрды

¹⁷ Гөзүңиз патышаны гөзеллигинде гөрер, узаклара узаян юрды гөрер.

¹⁸ Пикириңде өңки ховплы гүнлер барада ойланарсың: «Салгыт топлан ниреде? Пач йыгнан ниреде? Диңлери санан ниреде?»

¹⁹ Мундан бейләк выҗырдашян, ят дилде геплейән текепбир халкы гөрмерсиңиз.

²⁰ Байрамлар гечирилйән Сион шәхерине серет! Гөзлериңиз асуда мекан, сарсмаз чадыр болан Иерусалими гөрер, онуң газыклары согрулмаз асла, йүплериниң хич бири үзүлмез.

²¹ Гиң дерялардыр чешмелериң болан еринде, шөхратлы Реб биз билен болар, олардан не күрекли гәмилер, не-де улы гәмилер гечер.

²² Реб бизиң казымыздыр, бизиң канун чыкарыҗымыздыр, Реб патышамыздыр, Ол бизи халас эдер.

²³ Гәмилериңиң йүплери чөзүлди, богалдагы гайым саклап билмейәр, елкени ачып билмеди. Шонда көп олҗалар пайлашылар; хатда агсаклар-да олҗа талаң салар.

²⁴ Сион илатының хиҗиси: «Мен сыркав» диймез; ол ерде яшаян халкың этмишлери өтүлер.