Işaýa 29 - Мукаддес Китап

29-нҗы бап Иерусалим габавы

¹ Давудың месген тутан шәхери Ариелиң дат гүнүне! Йылың йылына байрамларыңыз довам эдиберсин.

² Ариеле азап чекдирерин, яс тутар, перят эдер ол, Мениң үчин гурбанлык оҗагы кимин болар.

³ Даш-төверегиңде дүшелге гурарын, төверегиңе габав диңлер гуруп, сени габарын, гаршыңа беркитмелер дикерин.

⁴ Сен песелдилип, ериң астындан гепләрсиң, сөзлериң топрак ичинден гелер; сесиң җының сеси дек ерден чыкар, топрагың тейинден пышырдап эшидилер сөзлериң.

⁵ Душманларыңың көпүси тоз дек болар, залымларың соврулан саман чөпи дейиндир. Бирденкә, дуйдансыз,

⁶ Хөкмүрован Реб гөк гүррүлдиси билен, ер титремеси, улы шовхун билен, харасат ве тупан билен, ялмаян одуң ялны билен гелер.

⁷ Ариеле гаршы сөвешйән әхли миллетлер, онуң ве галаларының гаршысына сөвешйәнлер, оны гысянлар дүйш кимин, гиҗеки гөрнүш кимин боларлар.

⁸ Дүйшүнде нахар иен ач киши, оянансоңам ач боляндыр, дүйшүнде сув ичен тешне, оянансоңам тешнедир. Сион дагына гаршы сөвешйән әхли миллетлер топары-да шу ахвала дүшер.

Надан халк

⁹ Доңуп галың, гатап галың! өзүңизи көр эдиң, гөречден галың, серхош болуң, йөне шерапдан дәл, энтирекләң, йөне чакырдан дәл.

¹⁰ Реб сизи агыр ука батырды, пыгамберлер гөзлериңизи юмдурды, гөргүрлер башларыңызы өртди.

¹¹ Әхли гөрнүш сизиң үчин мөхүрли китабың сөзлери киминдир. Оны окап билйәнлере берип: «Шуны ока» дийсеңиз, олар: «Окап билмейәрис, ол мөхүрленен» диерлер.

¹² Окап билмейәнлере берип: «Шуны ока» дийсеңиз, олар: «Окап билмейәрис» диерлер.

¹³ Реб шейле диййәр: «Бу халк Маңа якынлашып, дили, додаклары билен Мени хорматлаяр, йөне йүреклери Менден узакдадыр. Ынсан буйрукларына гөрә Маңа ыбадат эдйәрлер олар.

¹⁴ Муңа гөрә Мен ене бу халкың арасында гудратлар, гудрат үстүне гудрат гөркезерин. Даналары даналыкдан махрум болар, акыллылары акылдан айрылар».

¹⁵ Өз ниетлерини Ребден гизлемәге чалышянларың, дат гүнүне! Ишлери гараңкылыкда болуп, олар: «Бизи ким гөрйәр? Бизи ким танаяр» диййәрлер.

¹⁶ Сиз бар зады терсине өвүрйәрсиңиз, күйзегәр тоюн билен дең хасапланармы? Ясалан зат өзүни ясана: «Ол мени ясамады» диерми? Шекиллендирилен зат шекиллендирене: «Онуң дүшүнҗеси ёк диерми?»

Гелҗеге умыт

¹⁷ Ливан аз салымың ичинде хасыллы мейдана өврүлмезми, мес топраклы ер токай кимин гөрүнмезми?

¹⁸ Шол гүн керлер китабың сөзлерини эшидерлер, түмлүк, гараңкылык ичинде көрлериң гөзлери ачылар.

¹⁹ Пукаралар ене Ребде шатлык тапарлар, мәтәчлер Ысрайылың Мукаддесинде галкынарлар.

²⁰ Залымлар ёк боларлар, масгаралайҗыларың соңуна чыкылар, яманлык этмәге гарашянлар ёк эдилер.

²¹ Олар ынсана төхмет атярлар, каза дузак гурярлар, шәхер дервезесинде. Хаклыны адалатдан нәхак махрум эдйәрлер.

²² Мунуң үчин Ыбрайымы халас эден Реб Якубың несиллери хакда шейле диййәр: «Якуп инди утанмаз, Онуң йүзи гызармаз инди.

²³ Өз элим билен ярадан чагаларымы өз араларында гөренлеринде, адымы мукаддес саярлар; Якубың Мукаддесини мукаддес саярлар, Ысрайыл Худайындан горкарлар.

²⁴ Ёлундан азашанлар дүшүнерлер, арз-шикаят эдйәнлер тәлим аларлар».