Işaýa 17 - Мукаддес Китап

17‑нҗи бап Дамаска гаршы пыгамберлик

¹ Дамаск барадакы пыгамберлик: Ине, Дамаск инди шәхер сайылмаз, ол харабачылыга өврүлер.

² Арогер шәхерлери терк эдилер, сүрүлериң ятян ерине өврүлер, олары үркүзен болмаз.

³ Эфрайымда гала галмаз, Дамаскда ша болмаз, Сирияның аман галанлары Ысрайыл огулларының шөхраты дей болар. Муны Хөкмүрован Реб айдяндыр.

⁴ Шол гүн Якубың шөхраты өчер, семиз гөвреси хорланар.

⁵ Оракчыларың дәне хасылыны йыгнайшы дей, дәне башларыны алшы дей эллериниң, Рапалар җүлгесине дәне башларының топланышы дей, болар Ысрайыл хем.

⁶ Зейтун агаҗының мивеси какылып алнандан соң, депесинде ики-үч зейтуның галышы дей, шахаларының учларында дөрт-бәшисиниң галышы дей, диңе биразы аман галдырылар. Муны Ысрайыл Худайы Реб айдяндыр.

⁷ Шол гүн халк назарыны Ярадана дикер, гөзлери Ысрайылың Мукаддесини гөрер.

⁸ Өзлериниң гуран гурбанлык сыпаларына бакмазлар, эллери билен ясан Ашера бутларына, түтетги сыпаларына серетмезлер.

⁹ Шол гүн оларың берк галалары ысрайыллардан гачан хивилериң, аморларың терк эден шәхерлери кимин чөле дөнер.

¹⁰ Сен өз Халасгәр Худайыңы унутдың, Пенакәриң болан Гаяны ятламадың. Шоңа гөрә якымлы өсүмликлер эксең-де, өзге юртлаң аҗайып нахалларыны отуртсаң-да,

¹¹ олары экен гүнүң өсдүрсең-де, отурдыланлары эртеси гүллетсең-де, хассалык ве эмсиз дерт гүнүнде хасылың еле соврулар.

¹² Бетбагтчылык! Көп миллетлериң гүввүлдиси! Деңзиң гүввүлдиси дей гүвлейәр олар! Ах! Халкларың гүввүлдиси! Гүйчли толкунлар дей гүввүлдешйәрлер!

¹³ Миллетлер гүйчли толкунларың увлайшы дек увлашарлар, эмма Ол олара кәйәр, даглардакы шемала учян чөп-чалам дей, узаклара гачарлар олар, түвелейиң өңүндәки тогаланян тоз дей тогаланарлар.

¹⁴ Агшамара, ине, ховп! Сәхерден өң ол ёк боляр. Бизи тоздурянларың пайы, бизи талаянларың кысматы шудур.