Işaýa 13 - Мукаддес Китап

13‑нҗи Бабыла гаршы пыгамберлик

¹ Бабыл хакда Амозың оглы Ишая аянлык аркалы гелен пыгамберлик:

² Ялаңач дагың үстүнде байдак дикиң, сөвешиҗилере гыгырың сесиңиз етдигинден, беглериң дервезелеринден гирер ялы, олара эл булаң.

³ Өзүме багыш эдиленлере буйрук бердим, уршуҗыларымы, шаныма гуванянларымы газабымы дөкдүртмек үчин чагырдым.

⁴ Даглардакы гыкылыга гулак гоюң, бу көп халкларың сесине меңзейәр! Бир ере йыгнанышян миллетлериң, патышалыкларың гөчгүнли сесини диңләң! Хөкмүрован Реб сөвеше гошун топлаяр.

⁵ Өз газабының яраглары билен бүтин ер йүзүни вейран этмек үчин, узак үлкелерден, дүнйәниң аңры уҗундан гелер Реб.

⁶ Перят эдиң, Реббиң гүни якындыр! Ол Гудратыгүйчли тарапындан вейранчылык дей гелер.

⁷ Мунуң үчин эллер говшар, хер ынсаның йүреги ярылар.

⁸ Довла дүшер олар, ыза хем гайгы басар; бургусы тутян дей, агыры чекер олар, аңалып бирек-биреге бакарлар, йүзлери ялын дек ловлар.

⁹ Ине, Реббиң гүни, ёвуз гүн гелйәр, ер йүзүни хараба өвүрмек үчин, ондакы гүнәкәрлери ёк этмек үчин, газап билен, гахар оды билен гелйәр.

¹⁰ Гөкдәки йылдызлар, оларың топлумы ышык бермезлер; Гүн догса-да гаралар, Ай нуруны сачмаз.

¹¹ Мен дүнйәни яманлыгы үчин, этмишлери үчин җезаландырарын эрбетлери; текепбирлериң гедемлигиниң соңуна чыкарын, залымларың улумсылыгыны песелдерин.

¹² Ынсанлары сап алтындан, адамлары Опыр гызылындан-да хас гымматлы эдерин.

¹³ Шонуң үчин гөклери титредерин, Реббиң гахар оды ловлаян гүни, Хөкмүрован Реббиң газабындан ер йүзи лерзана гелер.

¹⁴ Коваланян җерен кимин, чопансыз гоюнлар кимин, хер кес өз халкына, хер киши өз юрдуна гачар.

¹⁵ Тутуланлар найзадан гечирилер, эле дүшен гылычдан өтүрилер.

¹⁶ Чагалары гөзлериниң алнында парча-парча эдилер, өйлери таланар, аялларына эл урлар.

¹⁷ Ине, Мен күмше гызмаян, алтыны сөймейән мадайлары олара гаршы өҗүкдирйәрин.

¹⁸ Яш йигитлери ере язар яйлары, бәбеклере рехим этмезлер, гөзлери чагалары гайгырмаз.

¹⁹ Худай патышалыкларың иң гөзели болан, бабыллыларың буйсанҗы болан шөхратлы Бабылы ер билен егсан эдер Содом хем Гомора ялы.

²⁰ Ол ер илатсыз галар, хич хачан яшайыш болмаз онда, араплар чадырларыны дикмезлер, чопанлар сүрүлерини бакмазлар.

²¹ Вагшы хайванлар ятар ол ерде, байгушдан долар өйлери, дүегушлар месген тутар, гечилер бөкҗекләрлер ол ерде.

²² Сарайларында сыртланлар, көшклеринде шагаллар увлашар; Бабылың соңы якындыр, онуң гүнлери узак болмаз.