Hoşeýa 1 - Мукаддес Китап

1‑нҗи бап

¹ Яхудада Узыяның, Ётамың, Ахазың хем Хизкияның, Ысрайылда Еховаш оглы Яробгамың патышалык эден дөврүнде, Беериниң оглы Хошея Реббиң сөзи аян болды.

Ысрайыл бивепалык эдйәр

² Хошея Реббиң сөзүниң башлангыҗы: Реб Хошея: «Гит-де, зынагәр аяла өйлен. Ол саңа башга эркеклерден чага догруп берер. Чүнки бу юрт Ребден дашлашып, бүтинлей зына эдйәр» диыди.

³ Онсоң Хошея гидип, Диблайымың гызы Гомере өйленди. Ол гөврели болуп, Хошея үчин бир огул догурды.

⁴ Реб оңа айтды: «Оглуң адына Йизрегел дак, чүнки аз вагтдан Йизрегелиң ганы үчин, Ехуның неслине җеза берерин, Ысрайыл патышалыгыны тамамларын.

⁵ Шол гүн Йизрегел дересинде Ысрайылың яйыны дөверин».

⁶ Гомер ене-де гөврели болуп, гыз догурды. Реб Хошея айтды: «Гызың адына Лорухама дак, чүнки мундан буяна Ысрайыл өйүне рехим эдип гүнәлерини гечмерин.

⁷ Яхуда өйүне велин рехим эдерин. Мен олары яй, гылыч, уруш, атлар я атлыларың үсти билен дәл-де, өзлериниң Худайы Реббиң гүйҗи билен халас эдерин».

⁸ Гомер Лорухаманы сүйтден айрансоң, гөврели болуп, огул догурды.

⁹ Реб Хошея шейле дийди: «Адына Логаммы дак. Чүнки сиз-ә Мениң халкым дәл, Менем сизиң Худайыңыз дәлдирин.

Ысрайыл Худай билен ярашяр

¹⁰ Ысрайыл огуллары деңиз кенарындакы чәге ялы сан-саҗаксыз ве мөчберсиз көп болар. Олара: „Сиз Мениң халкым дәлсиңиз“ дийлен ерде, „сиз дири Худайың огулларысыңыз“ дийлер.

¹¹ Яхуда ве Ысрайыл халклары яңадан бирлешер, өзлерине бир баш белләп, юртда гүлләрлер. Чүнки Йизрегелиң гүни бейик болар».