Habakuk 3 - Мукаддес Китап

3‑нҗи бап Хабакугың дилеги

¹ Пыгамбер Хабакугың Шигёнот боюнча дилеги.

² Шан-шөхратың барада эшитдим, я Реб! Я Реб, ишлериңе хайранлар галян! Бизиң дөврүмизде ишлериңи җанландыр, бизиң гүнлеримизде олары аян эт, газап ичиндекәң рехим этмеги унутма.

³ Худай Теймандан, Мукаддес Болан Паран дагындан гелди. Села Онуң шөхраты гөклери гаплады, ер йүзи Оңа болан өвгүлерден долды.

⁴ Онуң ягтысы Гүн киминдир, эллери нур сачяндыр, гудратының сыры элиндедир.

⁵ Онуң өңүнден гыргын кесели, ызындан өлүм гитди.

⁶ Ол саклананда, ер сарсды, Ол баканда, миллетлери титретди. Гоҗаман даглар күл болды, гадымы байырлар баш эгди. Онуң ёллары эбедидир.

⁷ Кушан чадырларыны мушакгат астында гөрдүм, Мидян юрдуның чадырлары горкудан титреди.

⁸ Я Реб, газабың дерялара гаршымыды? Гахарың чешмелере гаршымыды? Атларыңа, еңилмез сөвеш арабаларыңа мүнер ялы, газабың деңизлере гаршымыды?

⁹ Ялаңач яйыңы галгатдың, сагдагыңы окдан долдурдың. Села Ер йүзүни акар сувлар билен ярдың.

¹⁰ Сени гөрүп, даглар титрешди, силлер җошды, чуңлуклар сесленип, толкунлар мөвч урды.

¹¹ Учушян окларың ягтысындан, парлаян найзаларың ялпылдысындан, Гүн билен Ай ерлеринде дурды.

¹² Ер йүзүне газап билен гадам басдың, миллетлери гахар билен депеледиң.

¹³ Сен Өз халкыңың гутулышы үчин, сечип-сайланыңы халас этмек үчин гелдиң, пис несилбашыны эздиң, оны депесинден дабанына ченли сойдуң. Села

¹⁴ Эсгерлери түвелей дек бизи даргатмага геленде, оларың башыны баштутаның найзалары билен дешдиң. Гизленен пукаралары ювутмак олара хош якяр.

¹⁵ Атларың билен деңизден гечип, җошгунлы сувлары көпүклетдиң.

¹⁶ Эшидип, тутуш беденим лерзана гелди, сесинден додакларым тибирдеди, сүңңүм эрәп, дызларым саңңылдады. Эмма бизе хүҗүм эдйән халкың башындан инҗек бетбагтлык гүнүне сабырсызлык билен гарашарын.

¹⁷ Инҗир агаҗы гүллемесе-де, үзүм агачлары миве гетирмесе-де, зейтун агачлары хасыл бермесе-де, экин мейданлары хасыл өндүрмесе-де, довар агыллары бош галып, ятаклар мал-гарасыз болса-да,

¹⁸ мен Ребде шатланарын, Халасгәримде йүрегим җошар.

¹⁹ Бейик Худай гүйҗүм-кувватымдыр, аякларымы кейигиң аяклары дек эдип, Мени белентликлерде гездирйәр. Хоруң баштутанына: киришли саз гураллары билен.