Галатялылар 6 - Мукаддес Китап

6-нҗы бап Бири-бириңизе ярдам бериң

¹ Шунлукда, эй, доганлар, эгер кимдир бири гүнәниң торуна дүшен болса, сиз, ягны Руха гөрә яшаянлар, оны юмшаклык билен догры ёла гетириң. Эмма сынага дүшмез ялы, өзүңизе-де гөзегчилик эдиң.

² Бири-бириңизе хемаяткәр болуң. Шейле этсеңиз, Месихиң кануныны берҗай этдигиңиз болар.

³ Эмма кимдир бири хич болуп-да, өзүне нәмедирин өйтсе, ол өзүни алдаяндыр.

^4-5 Хер ким өз эдйән херекетлерини дерңесин. Хер кес өзүне дүшен йүки өзи гөтерсин. Шонда ол өзүни башгалар билен деңешдирмезден, өзүне гуванып билер.

⁶ Шунлукда, сөз аркалы өвүт алян адам оңа өвүт берйән билен әхли ягшы затларыны пайлашсын.

⁷ Өз-өзүңизи алдамаң: Худай Өзүни яңсыладян дәлдир. Адам нәме эксе, шоны хем оряндыр.

⁸ Өз хөвеслерини канагатландырмак ислейән өзүни вейран эдер. Эмма Мукаддес Рухы канагатландырмак ислейән бакы яшайшы алар.

⁹ Ягшылык этмекде ядамалың. Эгер рухдан дүшмесек, өз вагтында орарыс.

¹⁰ Шоңа гөрә-де, хениз вагтымыз барка, хеммелере, айратын-да имандакы доганларымыза ягшылык эделиң.

Сүннетлилик дәл-де, тәзе ярадылыш ваҗыпдыр

¹¹ Ине, сизе өз элимиң шейле улы харплар билен язяныны гөрүң!

¹² Тенде оңат гөрнеси гелйәнлер сизи сүннетленмәге меҗбур эдйәрлер. Олар Месихиң хачы себәпли ызарланмакдан горкуп шейле эдйәрлер.

¹³ Эмма сүннетленмәниң тарапдарларының өзлери-де Мукаддес Кануны берҗай эдйән дәлдир. Олар сизиң сүннетлидигиңиз бабатда магтанмак үчин, сизи сүннетлетҗек болярлар.

¹⁴ Мен болса Реббимиз Иса Месихиң хачындан башга зат бабатда асла магтанасым гелмейәр. Шу хач аркалы мен бу дүнйә үчин, бу дүнйә-де мениң үчин өлүдир.

¹⁵ Чүнки не сүннетлилигиң, не-де сүннетсизлигиң әхмиети бардыр. Диңе тәзе ярадылыш әхмиетлидир.

¹⁶ Худайың Ысрайыл халкына, ягны шу дүзгүни берҗай эдйәнлериң барына парахатлык билен мерхемет яр болсун!

¹⁷ Мундан бейләк хич ким маңа шу затлар бабатда азар бермесин! Себәби мениң беденимде Иса Месихе дегишлидигими гөркезйән яра ызлары бардыр.

¹⁸ Эй, доганларым! Гой, Реббимиз Иса Месихиң мерхемети сизе яр болсун. Омын!