Галатялылар 2 - Мукаддес Китап

2‑нҗи бап Павлусың Иерусалиме икинҗи сапары

¹ Мен он дөрт йылдан Барнап билен ене-де Иерусалиме гитдим. Бу гезек бизиң билен Титус-да гитди.

² Мени ол ере Реббиң ылхамы алып барды. Иерусалимдәки йыгнакларың ёлбашчылары билен айратын душушып, олара кесеки миллетлере вагыз эдйән Хош Хабарымы беян этдим. Мен муны өңки-соңкы эденлеримиң бары пуҗа чыкаймасын дийип этдим.

³ Олар болса янымдакы Титусы, хатда онуң грекдигине-де гарамаздан, оны сүннетленмәге меҗбур этмедилер.

⁴ Сүннетленме меселеси кәбир догансумаклар зерарлы йүзе чыкыпды. Олар бизи гул этмек үчин, арамыза огрынча сүмлүп, Иса Месих аркалы алан азатлыгымызы гизлинликде аңтадылар.

⁵ Эмма Хош Хабарың хакыкаты сизиң билен галсын дийип, биз бу догансумаклара бир пурсат-да эглишик этмедик.

⁶ Йыгнагың ёлбашчылары мениң вагыз эдйән Хош Хабарыма хич зат гошмадылар. (Олар ким болсалар-да, маңа пархы ёк, себәби Худай адамың даш кешбине гарамаяр!)

⁷ Йыгнагың ёлбашчылары Хош Хабары яхудылара вагыз этмеклигиң Петруса берлиши ялы, маңа-да яхуды дәллере вагыз этмеклигиң берлендигини гөрдүлер.

⁸ Олар яхудылара ресуллык этмәге Петрусы беллән Худайың мени-де яхуды дәллере ресуллык этмәге белләндигине,

⁹ маңа мерхемет берлендигине гөз етирдилер. Онсоң йыгнагың диреглери хасапланян Якуп, Петрус ве Ёханна дагы маңа ве Барнаба доганлыгың нышаны хөкмүнде эллерини узатдылар. Мен Барнап билен яхуды дәллериң арасына, олар хем яхудыларың арасына гитмели дийип, өзара ылалашдык.

¹⁰ Йөне олар мәтәчлик чекйән доганлары ятдан чыкарман, олара көмек этмегимизи хайыш этдилер. Мен хем муны берҗай этмек үчин элимде барыны гайгырмадым.

Павлус Антакияда Петрусың ялңышыны дүзедйәр

¹¹ Петрус Антиёха геленде, онуң гойберен ялңышыны ач-ачан йүзүне айдып, оңа гаршы чыкдым.

¹² Петрус Якубың иберен адамлары гелмезден озал, кесеки миллетлер билен бир сачак башында ийип-ичйәрди. Эмма шол адамлар геленде, Петрус сүннет эдилмеги үндейәнлерден горкуп, кесеки миллетлерден четлешип, олар билен гатнашыгы кесди.

¹³ Онуң билен бирликде бейлеки яхудылар хем икийүзлүлиге йүз урдулар, хатда Барнап хем оларың икийүзлүлигинден яңа догры ёлдан азашды.

¹⁴ Мен оларың эдйән херекетлериниң Хош Хабарың хакыкатына лайык дәлдигини гөрдүм. Шонда мен хеммелериң өңүнде Петрусың йүзүне гелип, шейле дийдим: «Сен яхуды болсаң-да, яхудылар ялы яшамаярсың. Сен башга миллетлер ялы яшаярсың. Онсоң сен нәме үчин башга миллетлери яхудылар ялы яшамага меҗбур эдйәрсиң?

¹⁵ Биз аслымыз боюнча яхудыдырыс, гүнәли сайылян кесеки миллетлерден дәлдирис.

¹⁶ Адам Мукаддес Кануны берҗай этмек аркалы дәл-де, диңе Иса Месихе болан иманы аркалы акланяндыр. Муны хатда биз хем билйәрис. Шоңа гөрә-де, биз Мукаддес Кануны берҗай этмек аркалы дәл-де, Иса Месихе болан иманымыз аркалы акланмак үчин, Оңа иман этдик. Чүнки Мукаддес Кануны берҗай этмек аркалы хич ким акланян дәлдир.

¹⁷ Мукаддес Канун бизи, ягны Месих аркалы акланмакчы болянлары хем гүнәли чыкаряр. Онда Месих гүнәниң гуллукчысы болярмы? Ёк, бу дүйбүнден бейле дәл!

¹⁸ Мен канунчылык бинасыны йыкдым. Инди оны гайтадан дикелтсем, онда кануны бозяндыгымы өзүм тассыклаярын.

¹⁹ Мукаддес Кануның өзи мени өлүме хөкүм этди. Шоңа гөрә-де, мен Мукаддес Канун үчин өли болуп, инди онуң гөзегчилигинде дәлдирин. Мен инди Худай үчин яшаяндырын. Мен Месих билен хача чүйлендим:

²⁰ инди мен дәл-де, мендәки Месих яшаяндыр. Бедендәки яшайшым болса Худайың Оглуна болан иманым аркалыдыр. Ол мени сөйүп, Өзүни мениң үчин гурбан этди.

²¹ Мен Худайың мерхеметини инкәр этмейәрин. Чүнки Мукаддес Кануны берҗай этмек аркалы акланып болян болсады, онда Месихиң өлүми бидерек боларды».