Галатялылар 1 - Мукаддес Китап

1‑нҗи бап

^1-2 Мен, ресул Павлус ве янымдакы доганларымың әхлиси Галатядакы иманлылар йыгнагына шу хат билен догайы салам иберйәрис. Мени ресуллыга ынсанлар дәл-де, Иса Месих ве Оны өлүмден дирелден Ата Худай белледи.

³ Атамыз Худайың ве Реббимиз Иса Месихиң мерхемети, парахатлыгы, гой, сизе яр болсун.

⁴ Атамыз Худайың ырадасына гөрә, Реббимиз Иса бизи шу азгын дөвүрден халас этмекчи болуп, гүнәлеримиз үчин Өзүни гурбан этди.

⁵ Оңа эбедилик шан-шөхрат болсун! Омын!

Хош Хабар еке-тәкдир

⁶ Мен Иса Месихиң мерхемети билен сизи чагыран Худайдан бейле тиз дәнип, башга бир «хош хабары» кабул эдишиңизе өрән хайран галярын.

⁷ Башга бир Хош Хабар ёкдур. Йөне кәбир адамлар сизи булашдырып, Месихиң Хош Хабарыны үйтгетҗек болярлар.

⁸ Эмма хатда биз я-да асмандан инен бир перишде сизе өң вагыз эден Хош Хабарымыздан башга бир «хош хабары» вагыз этсе, гой, нәлетли болсун!

⁹ Бизиң сизе озал айданларымызы мен ене-де гайталаярын: кимдир бири сизе озал кабул эден Хош Хабарыңыздан башгасыны вагыз этсе, гой, лагнатлы болсун!

Павлусың вагыз эден Хош Хабары ынсандан дәлдир

¹⁰ Шунлукда, мен кимиң гөвнүнден турмакчы болярын: адамларыңмы я-да Худайың? Эйсем мен адамлара яранҗак болярынмы? Эгер мен адамлара яранмакчы болсадым, онда Месихиң хызматчысы болмаздым.

¹¹ Эй, доганлар, сизиң шуны билмегиңизи ислейәрин: мениң вагыз эден Хош Хабарым ынсандан дәлдир.

¹² Мен оны ынсандан кабул этмедим я-да өвренмедим. Маңа оны Иса Месихиң хут Өзи аян этди.

¹³ Сиз мениң яхудыларың дининдекәм яшан дурмушым барада эшиденсиңиз: мен Худайың йыгнакларыны гүйчли ызарлап, олары ёк этмекчидим.

¹⁴ Мен яхуды дең-душларымың көпүсинден яхудыларың дининде дийсең илерләпдим. Ата-бабаларымызың дәп-дессурларыны сакламакда хем җуда ыхласлыдым.

^15-16 Эмма Худай мерхемет эдип, мени энеден догулманкам сайлап чагырды. Ол Хош Хабары кесеки миллетлере вагыз этмегим үчин, маңа Өз Оглуны аян этмеги макул билди. Шонда мен хич киме геңешмедим

¹⁷ я-да менден өң ресул боланлары гөрмек үчин хатда Иерусалиме-де гитмедим. Мен Арабыстана гидип, соңра ене Дамаска доландым.

¹⁸ Шондан үч йыл соң Петрус билен танышмак үчин Иерусалиме гидип, онуңкыда бирки хепде болдум.

¹⁹ Шонда мен ол ерде Реббимиз Исаның иниси Якупдан башга ресулларың хич бирини гөрмедим.

²⁰ Сизе язянларымың бары хакыкатдыгы бабатда мен Худайың өңүнде гүвә гечйәрин.

²¹ Соңра мен Сирия ве Киликия себитлерине гитдим.

²² Иса Месихиң Яхудыя юрдундакы йыгнаклары мениң хут өзүм билен таныш дәлдилер.

²³ Олар мен барада: «Бирвагт бизи ызарлап, ёк этмекчи болан иманыны инди өзи вагыз эдйәр» диен хабары эшидипдилер.

²⁴ Олар Худайың мени өзгерденини гөрүп, Оны шөхратландырдылар.