Filimun 1 - Мукаддес Китап

1‑нҗи бап

^1-2 Иса Месих угрунда туссаглыкда отуран мен Павлусдан эзиз достумыз ве ишдешимиз Филимуна, аял доганымыз Аффия, сөвешдеш ёлдашымыз Архипа ве сениң өйүңде болян иманлылар йыгнагына догайы салам! Доганымыз Тимотеос хем сизе салам айдяр.

³ Атамыз Худайың ве Реббимиз Иса Месихиң мерхемети, парахатлыгы, гой, сизе яр болсун!

Шүкүрлер ве дога-дилеглер

^4-5 Мен сениң Реббимиз Иса Месихе болан иманың ве тутуш Худайың халкына болан сөйгиң хакда эшидйәрин. Шоңа гөрә-де, сени хемише дога-дилеглеримде ятлап, Худайыма шүкүр эдйәрин.

⁶ Мен бизи бирикдирйән имана гөрә херекет этмегиңи Худайдан дилейәрин. Шонда сен Иса Месихе хызмат этмек үчин эдилмели ягшы ишлере дүшүнерсиң.

⁷ Эй, доганым, сен Худайың халкыны сөйүп, онуң гөвнүни галкындырдың. Бу мени шатлыга бесләп, йүрегиме теселли берди.

Павлусың Онесим барадакы хайышы

⁸ Мен Иса Месихиң маңа берйән ыгтыяры билен саңа этмели ишлериңи буйруп-да билердим,

⁹ йөне сөйгиниң хатырасына саңа ялбарярын. Хава, Иса Месихиң угрунда туссаглыкда отуран мен гоҗа Павлус,

¹⁰ туссаглык дөврүмде маңа огул болан Онесим үчин ялбарярын.

¹¹ Бирвагтлар онуң саңа хич ярдамы ёкды, эмма инди онуң саңа-да, маңа-да ярдамы дегйәр.

¹² Йүрегим болан Онесими ызына, сениң яныңа ёллаярын.

¹³ Хош Хабар угрунда туссаг эдилен дөврүмде сениң ериңе маңа хызмат этсин дийип, илки оны өз янымда алып галмакчыдым.

¹⁴ Йөне этҗек ягшылыгың меҗбуры дәл-де, мейлетин болар ялы, сенден биругсат хич зат эдесим гелмеди.

¹⁵ Ким билйәр, белки, Онесимиң хемишелик саңа доланып бармагы үчин, ол сенден вагтлайын айрыландыр.

¹⁶ Ол инди диңе гулуң дәл, эйсем сөйгүли доганың болды. Ол мениң үчин өрән эзиздир. Йөне ол хем гулуң, хем-де Реб аркалы доганың болуп, сениң үчин хас-да эзиздир.

¹⁷ Шоңа гөрә-де, мени достуң хөкмүнде гөрйән болсаң, оны мени кабул эдйән ялы кабул эт.

¹⁸ Эгер Онесим зерарлы зыян чекен болсаң я-да ондан алгың бар болса, олары мениң хасабыма яз.

¹⁹ Мен, Павлус, муны өз элим билен язярын: мен Онесимиң бергисини берерин. Йөне сен хем халас болмагыңа мениң ярдам берендигими унутма!

²⁰ Шоңа гөрә-де, эй, доган, Реббиң хакы үчин маңа ярдам эт. Месихиң хатырасы үчин гөвнүми галкындыр.

²¹ Сөзүме гулак асҗакдыгыңа, айданларымы аңры яны билен ерине етирҗекдигиңе гөзүм етенсоң, шулары саңа язярын.

²² Ене бир хайыш: мени мыхман алар ялы бир отагы тайынлап гой, себәби Худай дога-дилеглериңизи эшидип, мени ене яныңыза гайтарар диен умыдым бар.

Саламлар

^23-24 Иса Месихиң угрунда мениң билен туссаглыкда биле болян Эпафра, эгиндешлерим Марк, Аристарх, Дема ве Лука дагы саңа салам айдярлар.

²⁵ Реббимиз Иса Месихиң мерхемети сизе яр болсун!