Eýýup 6 - Мукаддес Китап

6-нҗы бап Эйюп Элипаза җогап берйәр

¹ Эйюп шейле җогап берди:

² «Вах, дердим өлчелседи, бетбагтлыгым терезиде чекилседи!

³ Деңиз чәгелеринденем агыр чыкарды, шонуң үчин мен ойланышыксыз гепледим.

⁴ Чүнки Гудратыгүйчлиниң оклары ичимде, рухум оларың зәхерини ичйәр, Худайың ховплары гаршыма хатарланан.

⁵ Гулан отлагдака аңңырярмы? Я өкүз ахырының башында молаярмы?

⁶ Тагамсыз зат дузсуз ийилйәрми? Юмуртганың агында тагам бармы?

⁷ Бейле нахарлара ишдәм ёк, булар йүрегими булаярлар.

⁸ Вах, арзувым хасыл болуп, Худай маңа умыт берседи!

⁹ Керем эдип, Худай җанымы алсады, элини узадып, өмүр танапымы кесседи!

¹⁰ Бу маңа теселли боларды, гүйчли дерт ичинде хем бегенердим, чүнки мен Мукаддес Боланың сөзлерини рет этмедим.

¹¹ Гарашмага гүйҗүм бармы нә? Сабыр этмәге соңум бармы нә?

¹² Дашданмы гүйҗүм? Бүрүнчденми теним?

¹³ Алачсыз галанымда, өзүме ярдам этмәге гүйҗүм етерми?

¹⁴ Достуна мәхирлик этмейән, Гудратыгүйчлүден горкмагы рет эдйәндир.

¹⁵ Достларым акаба яп кимин дурнуксыздыр, акар сувлы чешмелер киминдир.

¹⁶ Чешмелер бузлар эрәнде дашярлар, гар сувларындан долярлар.

¹⁷ Җөвзада чешмелер гураярлар, ыссыда гайып болярлар.

¹⁸ Кервенлер ёлларындан совлуп, сув гөзлегинде энтәп хеләк болярлар.

¹⁹ Сув агтарярлар Тейманың кервенлери, Шебаның ёлагчылары умытда болярлар.

²⁰ Олар ынам эдендиклери үчин утанярлар, ол ере гелип, рухдан дүшйәрлер.

²¹ Сиз хем мениң үчин шол чешмелер ялы болдуңыз, бетбагтлыгымы гөрүп горкярсыңыз.

²² Мен сизе: „Маңа зат бериң, байлыгыңыздан бериң“ дийдимми?

²³ „Мени душман элинден халас эдиң, мени гаракчыларың элинден ызыма сатын алың“ дийдимми я?

²⁴ Маңа өвредиң, онсоң дымайын, ялңышымы дүшүндириң.

²⁵ Догры сөзлер гүйчлүдир! Йөне сизиң бош сөзлериңиз нәмәни субут эдйәр?

²⁶ Сөзлерими дүзедерин өйдйәрсиңизми? Эҗизиң гепини еле совурярсыңызмы?

²⁷ Хатда етим үчин биҗе атарсыңыз, достуңыза баха кесерсиңиз.

²⁸ Инди мерхемет эдип, маңа середиң, йүзүңизе бакып, ялан сөзләп билмен.

²⁹ Говуҗа пикирлениң, адалатсызлык этмәң, яңадан гараң, мен хакдырын.

³⁰ Агзымдан нәхак сөз чыкянмыдыр? Бетбагтлыгы гөрен дәлдирин өйдйәңизми?»