Eýýup 32 - Мукаддес Китап

32‑нҗи бап Элиху Эйюбың достларына җогап берйәр

¹ Шейдип, бу үч киши Эйюп билен җеделини бес этди, чүнки Эйюп өз гөзүне догручыл гөрүнди.

² Онсоң рам уругындан, бүз тиресинден болан Баракелиң оглы Элиху муңа газапланды. Онуң Эйюба гаты гахары гелди, себәби Эйюп Худайы дәл-де, өзүни аклады.

³ Элиху Эйюбың үч достуна-да гаты гахарланды, чүнки олар догры җогап тапмансоңлар, Худай гүнәкәр ялы болуп гөрүнди.

⁴ Элиху бейлекилерден яш боландыгы үчин, Эйюп билен геплешмәге өз нобатына гарашды.

⁵ Бу үч адамдан җогап ёкдугыны гөренде, Элиху газапланды.

⁶ Бүз тиресинден болан Баракелиң оглы Элиху шейле җогап берди: «Мен яш, сиз гарры, шонуң үчин мен чекиндим, өз пикирими айтмага горкдум.

⁷ Ичими гепледип: „Гой, гоҗалар геплесинлер, яшулулар пайхас берсинлер“ дийдим.

⁸ Йөне ынсана ичиндәки рух, Гудратыгүйчлиниң деми акыл берйәр.

⁹ Пайхас диңе гоҗаларда дәлдир, хакыката дүшүнйән диңе яшулулар дәлдир.

¹⁰ Шонуң үчин: „Маңа гулак салың, мен өз пикирими беян этсем“ диййән.

¹¹ Ине, мен сөзлериңизе гарашдым, айтҗак задыңызы агтаряркаңыз, парасатлы гепиңизе гулак асдым.

¹² Сизи дыкгат билен диңледим, эмма хич бириңиз Эйюбың нәхаклыгыны субут этмедиңиз, хич бириңиз онуң сөзлерине җогап бермедиңиз.

¹³ Сиз: „Биз пайхас тапдык, оны Худай нәхак чыкарсын, ынсан дәл“ диймәң.

¹⁴ Эйюп сөзлерини маңа гаршы гөнүкдирмеди, оңа сизиң сөзлериңиз билен җогап бермерин.

¹⁵ „Олар горкуп, җогап берип билмейәрлер, сөз тапмаярлар айтмага.

¹⁶ Олардан сес-седа чыкмаяр, олар җогапсыз дурлар“ дийип, мен гарашайынмы инди?

¹⁷ Мен-де өз җогабымы берерин, өз пикирими беян эдерин.

¹⁸ Чүнки мен сөзден долы, ичимдәки рух мени гыссаяр.

¹⁹ Ине, ичим ачылмадык шерап кимин, тәзе мешик кимин ярылып баряр.

²⁰ Гепләп, ичими совадайын, дил ачып, саңа җогап берейин.

²¹ Адамдан йүз гөрмерин, яранҗаңлык этмен хич киме.

²² Яранҗаңлык этмеги башармаян мен, ёгса Яраданым мени-де ёк эдерди».