Eýýup 3 - Мукаддес Китап

3‑нҗи бап Эйюп геплейәр

¹ Ахыры Эйюп дил ачды ве өз дүнйә инен гүнүни нәлетледи.

² Ол шейле дийди:

³ «Гой, мениң доглан гүнүм гурасын! „Гөвреде огул чага галды“ дийлен гиҗә нәлет сиңсин!

⁴ Гой, шол гүн гараңкылыга өврүлсин! Гөкдәки Худай шол гүни унутсын, онуң үстүне ягты дүшмесин!

⁵ Гой, шол гүни гараңкылык, түм гараңкылык гуршасын. Булутлар өртсүн оны, гараңкылык оны горка салсын!

⁶ Шол гиҗәни зулмат гапласын, ол гиҗе йылың гүнлерине гиризилмесин.

⁷ Гой, ол өнелгесиз гиҗе болсун, онда шатлыклы оваз эшидилмесин!

⁸ Гой, гүнлери нәлетлейәнлер, Ливятаны оярмагы башарянлар шол гүни нәлетлесинлер!

⁹ Даң йылдызлары шугла сачмасын шол гүн, ышыга умыт багласын, йөне ышык болмасын, даң шапагына йүзи дүшмесин!

¹⁰ Чүнки ол энемиң ятгысыны япмады, хасраты мениң гөзлеримден гизлемеди.

¹¹ Нәме үчин дүнйә инәемде өлмәндирин? Гөвреден чыкан дессиме җан бермәндирин?

¹² Этеге салынмасам болҗак экен! Эмдирилмәнлер гечсем болҗак экен!

¹³ Онда мен хәзир рахатлыкда ятардым, дынчлыкда болардым.

¹⁴ Хараба өврүлен биналары гуран дүнйәниң шалары, геңешчилери билен,

¹⁵ өйлерини күмүшден долдуран, алтын топлан хан-беглер билен дынчлыкда болардым.

¹⁶ Нәме үчин өли доглан чага дек, ягта гөзи дүшмедик чага дек ере гөмүлмәндирин мен?!

¹⁷ Ол ерде яманлар яманлыкдан эл чекйәрлер, ядавлар-да дынч алярлар.

¹⁸ Ол ерде есирлер асудалыкдадыр, олар гөзегчилериниң сеслеринден дынчдыр.

¹⁹ Бай-да, гарып-да бардыр ол ерде, гуллар-да хоҗайынларындан азатдыр.

²⁰ Нәме үчин җебир-җепа чекйәне нур, калбы хасратла-да өмүр берилйәр?

²¹ Аҗалы арзув эдйәрлер, аҗал гелмейәр, оны гизленен хазынадан көп агтарярлар.

²² Габра говшанларында, шатланярлар, җошуп, шовхун эдйәрлер.

²³ Нәме үчин ёлуны гөрүп билмейәне, Худайың түмлүге гапланына өмүр берилйәр?

²⁴ Чөреге дерек ахы-зар ювудян, ахы-налаларым эдил сув кимин дөкүлйәр.

²⁵ Хакыкатданам, горкым башыма гелйәр, хедер эденим-де үстүмден инйәр.

²⁶ Менде не рахатлык бар, не асудалык, не-де дынчлык бар, диңе түкениксиз мушакгат гелйәр».