Еврейлер 3 - Мукаддес Китап

3‑нҗи бап Иса Мусадан бейикдир

¹ Шонуң үчин хем, эй, мениң билен биле Худай тарапындан чагырылан мукаддес доганлар, әхли ой-пикириңиз Исада болсун! Ол Худайың Ресулы ве бизиң ыкрар эдйән Баш Руханымыздыр.

² Мусаның Худайың өйүнде садык хызматкәр болшы ялы, Иса хем Өзүни руханылыга беллән Худая садык болды.

³ Өй гуран адамың өе гаранда хас хорматлы болшы ялы, Иса-да Муса гаранда хас бейик шөхрата мынасып болды.

⁴ Хер бир өй кимдир бири тарапындан бина эдилйәндир, эмма әхли задың бинагәри Худайдыр.

⁵ Муса гелҗекде аян эдилҗек сөзлере шаятлык этмек үчин, хызматкәр кимин Худайың өйүне садык болды.

⁶ Эмма Месих Худайың өйүне Огул хөкмүнде садыкдыр. Эгер гайратымызы ве магтанян умыдымызы сакламагы башарсак, биз Худайың өйүдирис.

Имандан дәнмәң

⁷ Шонуң үчин Мукаддес Рухуң айдышы ялы: «Бу гүн сиз Мениң сесими эшитсеңиз,

⁸ Маңа баш галдыран аталарыңыз дей йүрегиңизи гататмаң. Оларың Мени чөлде сынайшы ялы доңйүрек болмаң.

^9-10 Кырк йыллап эден ишлерими гөрселер-де, ол ерде аталарыңыз Мени сынап гөрдүлер. Шонуң үчин Мен бу несле газапланып дийдим: „Оларың йүреги хемише Менден узакдыр, Мениң ёлларымдан йөрейән дәлдирлер“.

¹¹ Шоңа гөрә, олар дынчлык меканыма гирмезлер дийип, Өз газабымда Мен касам этдим».

¹² Эзиз доганлар, хабардар болуң! Сизиң хич бириңизде яман ниетли, имансыз йүрек болмасын, булар сизи дири Худайдан дашлашдырмасын.

¹³ Терсине, хер гүни «Бу гүн» дийип хасаплап, бири-бириңизи рухландырың. Шейдип, сизиң хич бириңиз гүнәниң торуна дүшүп, доңйүрек болмаң.

¹⁴ Биз овал-башдакы ынамымызы соңуна ченли берк сакласак, Месих билен шәрикдеш болярыс.

¹⁵ Озал айдылышы ялы: «Бу гүн сиз Мениң сесими эшитсеңиз, Маңа баш галдыран аталарыңыз дей йүрегиңизи гататмаң».

¹⁶ Онуң сесини эшидибем питне турзанлар кимлерди? Эйсем булар Мусаның Мүсүрден чыкаранлары дәлмиди?

¹⁷ Худай кырк йыллап киме газапланды? Гүнә эденлере дәлми нәме? Оларың җесетлери чөлде серилди.

¹⁸ Худай: «Олар дынчлык меканыма гирмезлер» дийип, кимлер хакда касам этди? Өзүне табын болмаян адамлар хакда дәлми нәме?

¹⁹ Шейлеликде, биз оларың ынанмандыклары зерарлы вада берлен ере гирип билмәндиклерини гөрйәрис.