Еврейлер 2 - Мукаддес Китап

2‑нҗи бап Бипарх болмаң

¹ Шонуң үчин имандан дәнмез ялы, эшиденлеримизе хас көп үнс бермелидирис.

² Худайың перишделер аркалы айдан хабары берк болуп, гүнә эденлер я-да битабын боланлар өз адалатлы алмытыны алярдылар.

³ Инди биз шундан соң халас болмагың бу аҗайып ёлуны инкәр этсек, онда хей-де җезадан халас болуп билерисми? Халас болмагың бу ёлуны овал-башда Реб ыглан этди ве муны Иса Месихиң хут Өзүнден эшиденлер тассыкладылар.

⁴ Худайың Өзи хем аламатлар, мугҗызалар, хер дүрли гудратлар гөркезмек билен бу хабары тассыклады ве Өз ислегине гөрә Мукаддес Рухуң пешгешлерини пайлады.

Иса ынсан болуп гелди

⁵ Бизиң гүррүңини эдйән гелҗекки дүнйәмизи Худай перишделере табын этмеди.

⁶ Терсине, Мукаддес Язгыларың бир еринде шейле шаятлык эдилйәр: «Адам нәме Сен оны ятларың ялы? Ынсан оглы нәме аладасыны эдериң ялы?

⁷ Оны перишделерден бираз вагтлык пес тутдуң. Оңа шөхрат билен хормат җыгасыны гейдирдиң,

⁸ әхли зады аягының астында гойдуң». Худай әхли зады онуң аягының астында гойды, оңа табын дәл зат гоймады. Йөне әхли задың оңа табындыгы хәзирки вагтда бизе айдың гөрүнмейәр.

⁹ Эмма биз шөхрат ве хормат тәҗиниң Иса гейдирилендигини гөрйәрис, себәби Ол бизиң үчин өлүме дөз гелди. Хава, Ол перишделерден бираз вагтлык пес тутулып, Худайың мерхемети билен әхли ынсанлар үчин җебир чекип өлди.

¹⁰ Исаны җебирли өлүми аркалы кәмил этмеклик хемме зады Өзи үчин ве Өзи аркалы ярадан Худая ярашды. Себәби Худай Онуң өлүми аркалы энчеме огуллары шөхрата беследи.

¹¹ Ынсанлары мукаддес эдйән Иса ве Ол аркалы мукаддес эдиленлер инди бир машгала дегишлидир. Шонуң үчин хем Иса олара доган диймекден утанмаяр.

¹² Ол Худая шейле диййәр: «Сениң адыңы доганларыма ыглан эдерин, җемагатың ортасында Саңа шөхрат айдарын».

¹³ Ол ене-де шейле диййәр: «Мен Оңа умыт багларын». Соңра ене шейле диййәр: «Ине, Мен ве Худайың Маңа берен чагалары».

¹⁴ Бу чагалар ынсан боландыклары үчин, Иса хем олар ялы ынсан болды. Өлүме дучар эдйән иблиси Ол Өз өлүми аркалы ёк этди ве

¹⁵ өмүрбойы өлүм горкусының гулчулыгындакы ынсанларың хеммесини азат этди.

¹⁶ Иса перишделере дәл-де, эйсем Ыбрайымың несиллерине ярдам эдйәр.

¹⁷ Шонуң үчин Ол хер җәхтден биз доганларына меңземели болды. Шейдип, Ол халкың гүнәлерини пәклейәндир ве Худайың хызматында рехимдар хем садык Баш Руханыдыр.

¹⁸ Исаның Өзи сынага салнып, гөрги барыны гөрендиги үчин, сынага дүшенлере көмек этмеги башаряндыр.