Еврейлер 12 - Мукаддес Китап

12‑нҗи бап Реб сөййәнини тербиелейәндир

¹ Бизи шейле көп шаятларың гуршаяндыгы үчин, пәсгелчилик дөредйән хер хили йүки ве бойнумыздан япышан гүнәлери ташлалың-да, өңүмизде дуран ярышда сабырлылык билен ылгалың.

² Гелиң, гөзүмизи иманымызың гөзбашы ве кәмиллешдириҗиси Иса дикелиң. Ол гелҗекдәки шатлыга говушмак үчин, масгарачылыгы хич сайып, хачдакы өлүме дөз гелди ве Худайың тагтының сагында отурды.

³ Сиз арып, рухдан дүшмез ялы, Иса хакда пикир эдиң. Ол гүнәлилер тарапындан көп эзъет чекип, хеммесине чыдады.

⁴ Гүнә гаршы алып барян сөвешиңизде, сиз энтек ганыңыз дөкүлйәнчә гаршылык гөркезмедиңиз.

⁵ Үстесине-де, Худайың сизе Өз перзентлери хөкмүнде айдан бу өвүт-несихатыны-да унутдыңыз: «Оглум, Реббиң тербиесине бипервай болма, Онуң кәйинҗине рухдан дүшме.

⁶ Чүнки Реб сөййәнини тербиелейәндир, кабул эден перзендине темми берйәндир».

⁷ Тербиеленмекде чыдамлы болуң. Чүнки Худай сизи Өз перзентлери кимин тербиелейәр. Эйсем, хайсы огла атасы тербие бермейәр?

⁸ Эгер Худай сизи хеммелери тербиелейши ялы тербиелемесе, онда сиз Худайың перзенди дәл-де, чөп дүйбүсиңиз.

⁹ Мундан башга-да, бизе тербие берен дүнъеви аталарымыз барды, биз олара хормат гойярыс. Эгер шейдйән болсак, рухы Атамыза хас-да берк табын болуп яшамалы дәлми?

¹⁰ Аталарымыз бизе өз билишлерине гөрә, гысга вагтлык тербие берипдилер. Худай болса бизиң хем Онуң ялы пәк болуп билмегимиз үчин бизе тербие берилйәр.

¹¹ Адам тербие аланда шатланмаяр, гайтам, агыры чекйәр. Эмма шейле тербие аландан соңра, ол догрулыкда ве парахатлыкда яшаяндыр.

¹² Шонуң үчин эҗиз голлара гуҗур бериң, эпилен дызлара кувват бериң!

¹³ «Аякларыңыз үчин догры ёлы сайлап алың». Шейдип, гой, араңыздакы эҗиз ве агсак адамлар йыкылмасынлар, терсине, шыпа тапсынлар.

Худайы рет этмәң

¹⁴ Хеммелер билен оңшуклы болуң. Халал яшамага дырҗашың, ёгса Ребби гөрүп билмерсиңиз.

¹⁵ Хүшгәр болуң, хич ким Худайың мерхеметинден махрум болмасын. Бир аҗы көк гөгерип, сизе эзъет бермесин, көп адамлар мунуң билен зәхерленмесин.

¹⁶ Хич ким зынахорлык этмесин, новбахарлык хакыны бир окара нахара сатан Ысав ялы Худая әсгермезлик этмесин.

¹⁷ Билшиңиз ялы, бираз вагтдан соңра Ысав атасының патасыны алмак иследи, эмма рет эдилди. Мунуң үчин гөзяш дөкүп ялбарса-да, эдилен карары үйтгедип билмеди.

¹⁸ Сизиң якынлашан дагыңыз элләп гөрүп болян Синай дагы ялы дәлдир. Синай дагында алавлы от янярды, дагың үстүни түмлүк, гара булут өртүп, гай-харасат турярды,

¹⁹ сурнай сеси яңланып, Худайың овазы эшидилйәрди. Муны эшиден адамлар Худайың өзлерине икиленч геплемезлиги үчин ялбарыпдылар.

²⁰ Себәби: «Дага хатда хайван хем галташса, дашлансын» диен Худайың буйругына олар чыдап билмәндилер.

²¹ Гөрнүш шейле бир горкунчды велин, Мусаның өзи: «Горкудан яңа титрейәрин» дийипди.

²² Сиз болса Сион дагына, дири Худайың шәхери болан гөге дегишли Иерусалиме, шагалаңлы үйшмелеңе йыгнанан мүңлерче перишделериң хузурына голайлашдыңыз.

²³ Худайың перзентлериниң йыгнагына голайлашдыңыз, оларың атлары гөкде языландыр. Хеммәниң Казысы болан Худайың хузурына гелдиңиз. Худайың овал-башдан кәмиллиге етирен адамларының өңүне гелдиңиз.

²⁴ Сиз тәзе әхтиң Бинятчысы Исаның хузурына гелдиңиз. Хабылың өч алмага гыгырян ганына дәл-де, эйсем гүнәлеримизи ювмак үчин сепилен Исаның ганына якынлашдыңыз.

²⁵ Үнс бериң, өзүңизе геплейән Худайдан йүз өвүрмәң! Өзлерине ерде Гепләни рет эденлеринде, гачып гутулып билмедик болсалар, онда биз гөкде Гепләнден йүз өврәйсек, җезадан асла гутулмаҗакдыгымыз месе-мәлим гөрнүп дур ахыры.

²⁶ Шол вагт Худайың сеси ери сарсдырыпды, эмма инди Ол: «Мен ене бир гезек диңе ери дәл, гөги-де сарсдырарын» дийип сөз берди.

²⁷ «Ене бир гезек» диен сөз титрәйҗек затларың, ягны ярадылан затларың арадан айрылҗакдыгыны, ыранмаз затларың эбеди галҗакдыгыны аңладяр.

²⁸ Шонуң үчин хем ыранмаз патышалыга говшандыгымыз үчин шүкүр эделиң. Худайы хошнут этмек үчин Оңа табынлык хем горкы билен сежде эделиң,

²⁹ себәби Худайымыз якып-яндырыҗы отдур.