Ёханна 1 - Мукаддес Китап

1‑нҗи бап Сөз

¹ Овал-башда Сөз барды, Сөз Худай биленди, Сөз Худайың Өзүди.

² Овал-башда Ол Худай биленди.

³ Тутуш барлык Сөз аркалы ярадылды, ярадылан затларың хич бири Онсуз ярадылмады.

⁴ Сөз яшайыш чешмесидир, бу яшайыш ынсанларың Нуры болды.

⁵ Нур түмлүкде парлаяндыр, түмлүк болса Оны еңип билмеди.

⁶ Худай тарапындан Яхя атлы бир адам иберилди.

⁷ Яхя Нур барада шаятлык этмәге ве өз шаятлыгы аркалы хеммелери ынандырмага гелди.

⁸ Яхяның өзи Нур дәлди, ол диңе Нур барада шаятлык этмәге гелди.

⁹ Хер бир ынсаны нурландырян хакыкы Нур дүнйә гелди.

¹⁰ Ол дүнйәдеди, дүнйә Ол аркалы ярадылыпды, эмма дүнйә Оны танамады.

¹¹ Ол Өзүниңкилере гелди, эмма олар Оны кабул этмеди.

¹² Ол Өзүни кабул эдип, адына иман эденлериң хеммесине Худайың перзентлери болмак хукугыны берди.

¹³ Олар не тен, не ынсан ислегинден, не-де әр хөвесинден доглупдылар. Олар Худай тарапындан доглан перзентлердир.

¹⁴ Сөз ынсан болуп, арамызда яшады. Ол мерхеметден ве хакыкатдан долуды. Биз Онуң шөхратыны, ягны Атадан гелен Еке-тәгиң шөхратыны гөрдүк.

¹⁵ Яхя Иса барада шаятлык эдип, батлы сес билен: «Ине, Менден соңра гелҗек Менден үстүндир, себәби Ол менден хем овал барды диеним Шудур» дийип гыгырды.

¹⁶ Бизиң хеммәмиз Онуң чәксиз мерхемети аркалы ялканыш үстүне ялканыш алдык.

¹⁷ Чүнки Мукаддес Канун Муса аркалы берилди, мерхемет ве хакыкат болса Иса Месих аркалы пейда болды.

¹⁸ Худайы хич ким асла гөрен дәлдир. Бизе Оны Атасының гуҗагындакы, Өзи-де Худай болан еке-тәк Оглы танатды.

Яхя чүмдүриҗиниң шаятлыгы

¹⁹ Ине, яхудыларың баштутанлары Иерусалимден руханылары ве левилери Яхяның янына ибердилер. Олар Яхядан: «Сен ким?» дийип сорадылар. Яхя сөзүни инкәр этмеди,

²⁰ ол шаятлык эдип: «Мен Месих дәл» дийип, чүрт-кесик ыкрар этди.

²¹ Олар ондан: «Онда сен ким? Белки, Ыляссың?» дийип сорадылар. Яхя: «Ёк» дийип җогап берди. Олар ене-де: «Онда шол гарашылян пыгамбермиң?» дийип сорадылар. Ол: «Ёк, ол дәл» дийип җогап берди.

²² Ахыры олар: «Онда сен ким? Биз өзүмизи ёлланлара нәме җогап берели? Сен өзүң хакда нәме айдып билҗек?» дийип сорадылар.

²³ Яхя Ишая пыгамбериң сөзлери билен җогап берип: «Ине, „Реббиң ёлуны дүзләң“ дийип, чөлде гыгырян сес мендирин» дийди.

^24-25 Онсоң онуң янына иберилен кәбир фарисейлер: «Сен Месихем, Ылясам, гарашылян пыгамберем дәл болсаң, онда нәме үчин адамлары сува чүмдүрйәрсиң?» дийип сорадылар.

²⁶ Яхя олара: «Хава, мен адамлары сува чүмдүрйәрин, эмма араңызда Бири бар, сиз Оны танамаярсыңыз.

²⁷ Ол менден соңра гелҗекдир. Мен Онуң чарыгының багыны чөзмәге-де мынасып дәлдирин» дийип җогап берди.

²⁸ Бу вакаларың хеммеси Иордан дерясының гүндогарындакы Бейтанияда, Яхяның сува чүмдүрйән еринде болуп гечди.

²⁹ Эртеси гүни Яхя өз янына гелйән Исаны гөрүп, шейле дийди: «Ине, дүнйәни гүнәден саплаян Худайың Гузусы!

³⁰ Сизе: „Менден соңра Бири гелер, Ол менден үстүндир, себәби Ол менден хем овал барды“ дийип айдан Кишим Шудур.

³¹ Башда мен хем Онуң кимдигини танамаярдым. Эмма мен Оны ысрайыл халкына танатмак үчин, адамлары сува чүмдүрмәге гелдим».

³² Яхя ене шаятлык эдип, шейле дийди: «Мен Мукаддес Рухуң гөкден кепдери кимин инип, Онуң үстүне иненини гөрдүм.

³³ Шол вагт мен Онуң кимдигини танамаярдым, эмма халкы сува чүмдүрмек үчин мени Иберен: „Мукаддес Рухуң кимиң үстүне иненини гөрсең, адамлары Мукаддес Руха чүмдүрҗек Шолдур“ дийди.

³⁴ Мен муны гөрдүм ве Онуң Худайың Оглудыгына шаятлык эдйәрин».

Исаның илкинҗи шәгиртлери

³⁵ Эртеси гүн Яхя янында ики саны шәгирди билен ене шол ердеди.

³⁶ Ол гечип барян Исаны гөрүп: «Ине, Худайың Гузусы!» дийди.

³⁷ Яхяның сөзлерини эшидип, бу ики шәгирт Исаның ызына дүшүп гитди.

³⁸ Иса гаңрылып, ызына дүшүп гелйәнлери гөрди-де, олардан: «Сизе нәме герек?» дийип сорады. Олар: «Рабби, Сен ниреде яшаярсың?» дийип сорадылар. (Рабби мугаллым диймекдир).

³⁹ Иса олара: «Мениң ызыма дүшүң, гөрерсиңиз» дийди. Шейдип, олар Иса билен гидип, Онуң ниреде яшаяндыгыны гөрдүлер, шол вагт өйлән сагат дөрт төверегиди. Олар шол гүн Онуң янында галдылар.

⁴⁰ Яхядан Иса хакда эшидип, Онуң ызына дүшүп гиденлериң бири Симун Петрусың доганы Андрысды.

⁴¹ Андрыс илки билен доганы Симуны тапып, оңа: «Биз Месихи тапдык» дийди. (Месих Худайың сайлап-сечени диймекдир).

⁴² Ол доганыны Исаның янына гетирди. Иса Симуна середип: «Сен Ёханнаның оглы Симунсың, йөне сен Кепас дийлип атландырыларсың» дийди. (Кепас Петрус дийлип терҗиме эдилйәр).

⁴³ Эртеси гүн Иса Җелилә гитмеги йүрегине дүвди. Ол Филипи тапып: «Мениң ызыма дүш!» дийди.

⁴⁴ Андрыс билен Петрус ялы, Филип хем Бетсайда шәхеринденди.

⁴⁵ Филип Натанаели тапып, оңа: «Биз Мусаның Төврадында ве бейлеки пыгамберлериң язгыларында язылан Адамы тапдык. Ол насыралы Юсубың оглы Иса экен!» дийди.

⁴⁶ Натанаел оңа: «Насыралы?! Ол ерден, хей, бир оңлы зат чыкармыка?!» дийди. Филип хем оңа: «Йөр, гөрерсиң!» дийди.

⁴⁷ Иса Өзүне тарап гелйән Натанаели гөрүп, ол хакда: «Ине, калбы хилесиз, хакыкы Ысрайыл оглы» дийди.

⁴⁸ Натанаел Ондан: «Сен мени ниреден танаярсың?» дийип сорады. Иса оңа: «Филип сени хениз чагырманка, Мен сени инҗир агаҗының ашагында гөрдүм» дийип җогап берди.

⁴⁹ Натанаел Оңа: «Мугаллым, Сен Худайың Оглусың! Сен Ысрайылың Патышасысың!» дийди.

⁵⁰ Иса оңа: «Сени инҗир агаҗының ашагында гөрдүм диеним үчин иман эдйәрсиңми? Сен мундан-да бейик ишлери гөрерсиң» дийди.

⁵¹ Иса сөзүни довам эдип: «Сизе догрусыны айдярын, инди сиз гөклериң ачылып, Худайың перишделериниң Ынсан Оглуның хузурына инип-чыкышыны гөрерсиңиз» дийди.