Даныел 1 - Мукаддес Китап

1‑нҗи бап Дөрт ысрайыл йигиди Бабыл көшгүнде

¹ Яхуда патышасы Ехоякымың патышалыгының үчүнҗи йылында Бабыл патышасы Небукаднесар өз гошуны билен Иерусалиме хүҗүм эдип, онуң даш-төверегини габады.

² Таңры Яхуданың патышасы Ехоякымы хем-де Худайың ыбадатханасындакы гап-гачларың бир бөлегини онуң голастына берди. Небукаднесар ол затлары Шингара гетирди. Ол Худайың ыбадатханасындан гетирилен гап-гачлары өз худайларының бутханасындакы газнасында гойды.

³ Соңра Небукаднесар өзүниң баш гөзегчиси Ашпеназа ысрайылларың арасындан патышаның ве хан-беглериң машгаласындан болан йигитлериң бирнәчесини гетирмеги буюрды.

⁴ Бу яш йигитлер беденлери хич хили шикессиз, гөрмегей, хер бир ылымдан баш чыкарян, билимли, өвренмәге укыплы ве патышаның көшгүнде хызмат этмәге мынасып болмалыдылар. Олара бабыллыларың эдебияты ве дили өвредилмелиди.

⁵ Патыша өз гүнделик көшк сачагындан олара бир пай нахар ве шерап бөлүп берди. Олар үч йыл окадылып, үчүнҗи йылың ахырында патышаның хузурында хызмат этмәге гетирилмелидилер.

⁶ Сайлананларың арасында яхуда тиресинден Даныел, Хананя, Мишайыл ве Азаря барды.

⁷ Баш гөзегчи оларың адыны үйтгетди. Даныеле Белтешасар, Хананя Шадрак, Мишайыла Мейшак, Азаря Абеднего дийип ат гойды.

⁸ Даныел өзүни харам этмезлиги йүрегине дүвди. Шейдип, ол баш гөзегчиден өзүниң патышаның сачагындан бөлүп берилйән нахардан, шерапдан сакланмагыны хайыш этди.

⁹ Баш гөзегчиниң назарында Худай Даныеле мерхемет ве рехим-шепагат берди.

¹⁰ Баш гөзегчи Даныеле: «Мен онуң алыхезретлери патышадан горкярын. Ол сизиң нахар ве ичги пайыңызы бөлүп берди ахырын. Эгер сизиң йүзүңизиң өзүңиз билен дең болан бейлеки яш йигитлериңкиден хордыгыны гөрсе, ол җанымы җәхеннеме иберер» дийди.

¹¹ Соңра Даныел баш гөзегчиниң өзүниң, Хананяның, Мишайылың ве Азаряның үстүнден гоян сакчысындан хайыш эдип, шейле дийди:

¹² «Өз гулларыңы он гүн сынап гөрәй. Гой, бизе иймек үчин гөк-өнүмлер, ичмек үчин болса сув берилсин.

¹³ Шундан соң сен бизиң йүзүмизи көшк сачагындан иййән бейлеки йигитлериң йүзи билен деңешдирип билерсиң ве өз гулларыңа нәме этмеги ислесең, гөзел гөвнүң».

¹⁴ Шейдип, сакчы бу пикир билен ылалашып, олары он гүн сынап гөрди.

¹⁵ Он гүнден соң бу дөрт йигит көшк сачагындан нахарланянларың хеммесинден хас гөрмегей ве даяв гөрүндилер.

¹⁶ Шейдип, сакчы оларың көшк сачагындан иймели нахарыны, ичмели шерабыны өзүне алып галып, олара диңе гөк-өнүмлер берди.

¹⁷ Худай бу дөрт йигиде эдебиятың ве ылмың хер бир угруны өвренмәге билим билен укып берди. Даныел хер бир гөрлен дүйши ве гөрнүшлери ёруп билйәрди.

¹⁸ Патышаның олары гетирмеги буйран мөхлети гелип етенде, баш гөзегчи олары Небукаднесарың хузурына гетирди.

¹⁹ Патыша оларың әхлиси билен танышды. Оларың хеммесиниң ичинде Даныел, Хананя, Мишайыл ве Азаря дагы билен деңешдирер ялысы тапылмады. Шонуң үчин патышаның хызматына олар беллендилер.

²⁰ Патыша хер бир ылым я-да дүшүнҗе билен багланышыклы меселе хакда соранда, өз патышалыгындакы әхли җадыгөйлердир палчылардан оларың он эссе артыкдыгыны гөрди.

²¹ Куреш патышаның шалыгының биринҗи йылына ченли Даныел шол ерде көшкде хызмат этди.