Amos 6 - Мукаддес Китап

6-нҗы бап Ысрайыл вейран эдилйәр

¹ Дат гүнүңизе, эй, Сионда асуда яшаянлар, Самария дагында ховпсуз отуранлар, ысрайыл халкының йүз тутмага барян иң бейик миллетиң мешхур адамлары!

² Калне шәхерине гечип гөрүң, ол ерден бейик Хамада гидиң. Онсоң пилиштлилериң Гат шәхерине барың, олар ики патышалыгыңыздан говумыка? Тутян мейданлары сизиңкиден гиңмикә?

³ Эй, сиз бела гүнүни узак сайып, зорлук тагтыны якынлашдыранлар!

⁴ Халыңыза вай, эй, пил сүңкүнден хашамланан чарпаяда ятанлар, дүшеклериниң үстүнде меймирәнлер, сүрүден сайлама гузулары, бага бакылан гөлелери иййәнлер!

⁵ Өзлерини Давут ялы сайып, саз гуралларыны ойлап тапянлар, арфаның овазына айдым айдянлар,

⁶ шакәседен шерап ичйәнлер, үстлерине иң оңат атыр сепйәнлер, Юсубың вейранчылыгына яс тутмаянлар, халыңыза вай!

⁷ Мунуң үчин олар илкинҗи болуп есир эдип әкидилер, күрсүде гайшарянларың мейлиси тамамланар.

⁸ Хөкмүрован Реб Өзүнден ант ичип, шейле диййәр: «Якубың гедемлигини неҗис сайярын, онуң галаларыны йигренйәрин, ичиндәки әхли зады билен биле шәхери душман элине берерин». Муны Хөкмүрован Бейик Худай айдяндыр.

⁹ Бир өйде он адам галан болса, олар-да өлер.

¹⁰ Оларың бириниң гарындашы өз көмекчиси билен хоссарының җеседини өйден дашары чыкарып якмак үчин гелер. Ол көмекчисинден: «Башга-да җесет бармы?» дийип соранда, «Ёк» дийип җогап берер. Онсоң гарындашы: «Сем бол! Реббиң ады агзалмасын» диер.

¹¹ Ине, Реб шейле буюряр: «Улы җайлар тоза, кичи җайлар күле дөнсүн.

¹² Атлар гаяның үстүнде чапармы? Өкүзлер билен ол ерде ер сүрлерми? Эмма сиз адалаты зәхере, догрулык мивесини аҗылыга өвүрдиңиз.

¹³ Сиз Лодебарда пуч зада шатланып: „Карнайымы өз гүйҗүмиз билен басып алмадыкмы нәме?“ диййәрсиңиз.

¹⁴ Шонуң үчин, эй, ысрайыл халкы, саңа гаршы бир миллети аяга галдырҗак. Олар Лебохаматдан Араба дүзлүгине ченли сени эзерлер». Муны Реб Хөкмүрован Худай айдяндыр.