Amos 5 - Мукаддес Китап

5‑нҗи бап Тоба этмәге чагырыш

¹ Эй, ысрайыл халкы, сен хакдакы айтҗак бу агы сөзүме гулак ас.

² Ысрайыл гызы йыкылды, инди ол хич хачан галмаз, өз топрагында сүйнүп ятыр, хич ким оңа ярдам бермез.

³ Шонуң үчин Хөкмүрован Реб шейле диййәр: «Бир шәхерден Ысрайыл үчин сөвеше чыкан мүң адамдан йүз адам аман галар, бейлеки биринден диңе йүзден онусы аман галар».

⁴ Реб ысрайыл халкына шейле диййәр: «Мени агтарың, шонда яшарсыңыз!

⁵ Эмма Мени Бейтелден агтармаң, Гилгала гирмәң, Беершеба гечмәң, чүнки Гилгал хөкман сүргүн эдилер, Бейтел хем хич зат болуп галар».

⁶ Ребби агтарың, шонда яшарсыңыз, ёгсам Ол Юсуп неслине гаршы от кимин ловлар, Бейтелде янгыны сөндүрмәге хич ким тапылмаз.

⁷ Адалаты аҗылыга өвренлер! Догручыллыгы ере чаланлар!

⁸ Үлкер, Орион йылдызларыны ярадан, түм гараңкылыгы даң сәхере өврен, гүндизи гиҗә өврен, деңиз сувларыны чагырып, олары ер йүзүне дөкен Олдур. Онуң ады Ребдир.

⁹ Ол гүйчлүлери шол бада хеләк эдер, галаларыны-да вейран эдер.

¹⁰ Олар казыетде паш эдйәни йигренйәрлер, хакыкаты сөзлейәни әсгермезлик эдйәрлер.

¹¹ Гарыбың элинден бугдай хем саман хакыны зорлук билен аланыңыз үчин, дашдан ёнулан җайлар гурсаңыз-да, сиз оларда яшамарсыңыз, гөзел үзүм багларыны отуртсаңыз-да, оларың шерабыны ичмерсиңиз.

¹² Чүнки Мен этмишиңизиң көпдүгини, гүнәлериңизиң чөкдердигини билйәрин. Догручыла эзъет берип, пара алярсыңыз, казыетде мәтәҗи бош гайтарярсыңыз.

¹³ Шонуң үчин акыллы ынсан шейле пурсатда үмсүм болар, чүнки бу бир эрбет замандыр.

¹⁴ Яманлыгы дәл-де, ягшылыгы агтарың, шонда сиз яшарсыңыз. Эдил сизиң өз айдышыңыз ялы Реб Хөкмүрован Худай сизиң билен болар.

¹⁵ Яманлыгы йигренип, ягшылыгы сөйүң, казыетде адалаты беркарар эдиң. Белки шонда Реб Хөкмүрован Худай Юсубың аман галанларына мерхемет эдер.

¹⁶ Хөкмүрован Худай – Хөкмүрован Реб шейле диййәр: «Бүтин мейданчаларда дады-перят эдерлер, көчелерде „Вай, вай гүнүмизе!“ дийшерлер. Чагырарлар дайханы матам тутмага, ясчылары – яс айдымыны айтмага.

¹⁷ Тутуш үзүм багларыңызда перят эдерлер, чүнки сизиң араңыздан Мен гечерин». Муны Реб айдяндыр.

Реббиң гүни

¹⁸ Дат гүнүңизе, Реббиң гүнүни күйсейәнлер! Нәме үчин сиз Реббиң гүнүне зарсыңыз? Ол гүн айдыңлык дәл-де, гараңкылыкдыр.

¹⁹ Ол гүн бир кишиниң арсландан гачып, ая душ гелши киминдир. Өйүне гелип, элини дивара сөйәнде, оны йыланың чакышы киминдир.

²⁰ Реббиң гүни ягтылык дәл-де, гараңкылык дәлмидир? Ол хич бир ышыксыз түм гараңкылык дәлмидир?

²¹ Мен байрамларыңызы йигренйәрин, әсгермейәрин, мукаддес йыгнанышыкларыңызы асла халамаярын.

²² Хатда якма гурбанлыгыңыздыр галла садакаңызы хөдүр этсеңиз-де, Мен олары кабул этмерин. Семиз малларыңыздан саламатлык гурбанлыгыңызы берсеңиз-де, Мен олара бакмарын.

²³ Янымдан нагмаларың овазыны айрың! Мен арфаларыңызың сазыны диңлемерин.

²⁴ Гой, адалатлык деря кимин җошсун, догручыллык бакы чешме ялы аксын.

²⁵ Эй, ысрайыл халкы, Маңа чөлде кырк йыллап гурбанлыклар ве садакалар хөдүрледиңизми?

²⁶ Сиз патышаңыз Сакуды ве йылдыз худайыңыз Киюны – өзүңиз үчин ясан бутларыңызы гөтерип гездиңиз.

²⁷ Мунуң үчин сизи Дамаскың аңырсына сүргүн эдерин. Муны Реб айдяндыр. Онуң ады Хөкмүрован Худайдыр.