2 Şamuwel 9 - Мукаддес Китап

9-нҗы бап Давут ве Мепибошет

¹ Давут: «Ёнатаның хатырасы үчин ягшылык эдерим ялы, Шавулың неслинден галан бармыка?» дийип сорады.

² Шавулың неслинден Сиба атлы бир хызматкәр барды. Оны Давудың янына чагырдылар. Патыша ондан: «Сен Сибамы?» дийип сорады. Сиба: «Хава, мен шол гулуң» дийип җогап берди.

³ Патыша ондан: «Шавулың неслинден аман галан бармы? Худайың хатырасына мен оңа вепалылык гөркезҗек» дийип сорады. Сиба: «Ёнатаның ики аягы-да агсак бир оглы бар» дийип җогап берди.

⁴ Патыша ондан: «Ол ниреде?» дийип сорады. Сиба: «Ол Лодебарда, Эмиелиң оглы Макырың өйүнде» дийип җогап берди.

⁵ Давут патыша Ёнатаның оглуны Лодебардан, Эмиелиң оглы Макырың өйүнден гетиртди.

⁶ Ёнатаның оглы, Шавулың агтыгы Мепибошет Давудың янына гелди. Ол ере йүзин дүшүп, патыша тагзым этди. Давут: «Мепибошет!» дийди. Ол: «Хава, мен шол гулуң!» дийип җогап берди.

⁷ Давут оңа: «Горкма, какаң Ёнатаның хатырасына мен саңа ягшылык этҗек. Атаң Шавулың әхли ерлерини саңа гайтарып берҗек. Сен хемише мениң сачагымдан нахарланарсың» дийди.

⁸ Мепибошет оңа тагзым эдип: «Мен гулуң өли бир ит ахырын, нәме үчин сен маңа ягшылык эдйәң?» дийди.

⁹ Соңра патыша Шавулың хызматкәри Сибаны чагырып, оңа: «Шавула хем онуң неслине дегишли болан затларың әхлисини җенабыңың агтыгына берендирин.

¹⁰ Сен огулларың ве хызматкәрлериң билен ери онуң үчин беҗерип, хасылыны йыгнарсың, шонда ол җенабыңың агтыгының хараҗады болар, эмма җенабыңың агтыгы Мепибошет хемише мениң сачагымдан нахарланар» дийди. Сибаның он бәш оглы билен йигрими хызматкәри барды.

¹¹ Сиба Давут патыша: «Ша хезретлериниң мен гулуна эмр эден затларының әхлиси берҗай эдилер» дийди. Мепибошет эдил Давудың өз огулларының бири ялы онуң сачагындан нахарланярды.

¹² Мепибошедиң Мика атлы яшаҗык бир оглы барды. Сибаның өйүнде яшаянларың әхлиси инди Мепибошедиң хызматкәрлери болдулар.

¹³ Мепибошет Иерусалимде яшаярды, себәби ол хемише патышаның сачагындан нахарланярды. Онуң ики аягы-да агсакды.