2 Şamuwel 23 - Мукаддес Китап

23‑нҗи бап Давудың соңкы сөзлери

¹ Ине, Давудың соңкы сөзлери шулардыр: Беленде гөтерилен Йышай оглы Давут диййәр, Якубың Худайының сечип сайлан адамы, Ысрайылың ширин лабызлы багшысы шейле сөзлейәр:

² «Реббиң Рухы мениң үстүм билен геплейәр, дилимде Онуң сөзлери.

³ Ысрайыл Худайы гепледи, Ысрайылың Гаясы маңа шейле дийди: „Халка адалатлы хәкимлик эден, Худайдан горкуп, халка баштутанлык эден,

⁴ даң шапагы ялыдыр, айдың асманда доган Гүн ялы, отларың ягышдан соңкы ялкымыдыр“.

⁵ Мениң неслим хем Худайың өңүнде шейле дәлми нәме?! Себәби Ол мениң билен бакы әхт баглашды, бу әхт тертип-дүзгүнли ве бозулмаздыр. Мениң халас болмагым, арзувларым Оңа баглы дәлми нәме?!

⁶ Әхли ярамазлар зыңлан тикен ялыдыр. Чүнки тикени элләп болмаяр.

⁷ Демир я-да найза сапы уланыляндыр олара, хем дуран еринде ода якыляндыр олар».

Давудың батыр йигитлери

⁸ Давудың батыр йигитлериниң атлары, ине, шулардыр: тахкемонлы Ёше Башебет. Ол сердарларың баштутаныды. Ол найзасы билен бир вагтың өзүнде секиз йүз адамы өлдүрди.

⁹ Ондан соңра үч батыр йигидиң бири ахова уругындан Додоның оглы Элгазардыр. Сөвешмек үчин топланышан пилиштлилере гыҗалат берленде, ол Давудың янындады. Ысрайыллар ыза чекилдилер,

¹⁰ эмма Элгазар еринден гозганмады; ол сурнугянча, хатда эли гылыҗа елмешйәнчә сөвешип, пилиштлилери гырды. Реб шол гүн бейик еңиш берди. Халк онуң ызына диңе олҗа йыгнамак үчин дүшди.

¹¹ Үчүнҗиси харарлы Агениң оглы Шаммадыр. Пилиштлилер Лехиде йыгнанышыпдылар. Ол ерде мәшден долы бир ер барды. Гошун пилиштлилерден гачды.

¹² Йөне Шамма мейданчаның ортарасында дуруп, шол ери горады ве пилиштлилери гырды. Реб улы еңиш берди.

¹³ Орак дөврүнде отуз сердарың үчүси Давудың янына, Адуллам говагына гитди. Пилиштлилериң гошуны Рапа җүлгесинде дүшләпди.

¹⁴ Давут шол вагт галадады. Пилиштлилериң гошун бөлүми болса Бейтуллахамдады.

¹⁵ Давут арман эдип: «Бейтуллахамың дервезесиниң янындакы гуюдан сув гетирип берен болсады, шондан бир ичсемдим» дийди.

¹⁶ Шонда үч батыр йигит пилиштлилериң дүшелгесини бөвсүп гечди-де, Бейтуллахамың дервезесиниң янындакы гуюдан сув алып, оны Давуда гетирип берди. Эмма Давут сувдан ичмеди, ол оны Реб үчин ере дөкди.

¹⁷ Ол: «Мени бейтмекден сакла, я Реб! Җанларыны ховп астына салып гиден адамларың ганыны, хей-де, мен ичип билеринми?!» дийип, сувдан ичмек ислемеди. Бу үч батыр йигит шейле эдерменликлер гөркезипди.

¹⁸ Серуяның оглы Абышай үч батыр йигидиң баштутаныды, ол Ёвабың доганыды. Ол өз найзасы билен үч йүз адамың гаршысына урушды ве олары өлдүрип, үч батыр йигит ялы мешхур болды.

¹⁹ Ол отуз сердарың иң мешхурыды ве баштутанды, йөне үч сердарың дереҗесине етип билмәнди.

²⁰ Ехояданың оглы Беная улы эдерменликлер гөркезен кабсеелли батыр йигитдир. Ол моваплы арслан йүрекли ики эдермен уршуҗыны өлдүрди, шейле хем ол гарлы гүн чукурың ичинде бир ёлбарсы өлдүрди.

²¹ Ол соңра әпет бир мүсүрлини өлдүрди. Мүсүрлиниң элинде найзасы барды. Беная онуң гаршысына таяклы чыкды. Ол мүсүрлиниң элинден найзасыны алып, оны өз найзасы билен өлдүрди.

²² Ехояданың оглы Беная, ине, шейле ишлери эдип, ол хем үч батыр йигит ялы мешхур болды.

²³ Ол отуз сердарың арасында иң мешхурыды, йөне үч батыр йигидиң бири дәлди. Давут оны өз җанпеналарының баштутаны эдип гойды.

²⁴ Отузларың арасында ене-де, ине, шулар барды: Ёвабың доганы Асахел, бейтуллахамлы Додоның оглы Элханан,

²⁵ харотлы Шамма ве Элика,

²⁶ палтылы Хелес, тековалы Икешиң оглы Ыра,

²⁷ анатотлы Абыгезер, хушалы Мебуннай,

²⁸ ахова уругындан Салмон, нетопалы Махрай,

²⁹ нетопалы Багананың оглы Хелеп, беняминлерден гибгалы Рибайың оглы Ытай,

³⁰ пиргатонлы Беная, Гагаш җүлгелеринден Хидай,

³¹ арбалы Абыгалбон, бахурымлы Азмавет,

³² шагалбынлы Эляхба, Яшениң огуллары: Ёнатан,

³³ харарлы Шамма, харарлы Шарарың оглы Ахыям,

³⁴ магакалы Ахасбайың оглы Элипелет, гилолы Ахытопелиң оглы Элигам,

³⁵ кармелли Хесро, аравлы Пагары,

³⁶ собалы Натаның оглы Йыгал, гат тиресинден Баны,

³⁷ аммон халкындан Селек, Серуяның оглы Ёвабың ярагыны гөтерйән нөкери бееротлы Нахрай,

³⁸ йытра уругындан Ыра ве Гареп,

³⁹ хет халкындан Урыя. Булар җеми отуз еди адамдан ыбаратдыр.