2 Petrus 1 - Мукаддес Китап

1‑нҗи бап Саламлар

¹ Иса Месихиң гулы ве ресулы мен Симун Петрусдан Худайымыз хем Халасгәримиз Иса Месихиң догрулыгы аркалы бизиң иманымыз ялы гымматлы имана эе боланлара догайы салам!

² Худайы ве Реббимиз Исаны танамакда бол мерхемет хем парахатлык сизе яр болсун!

Имандан дәнмәң

³ Худайың йөрелгеси боюнча яшамагымыз үчин Ол Өз гүйҗи аркалы бизе герек болан әхли зады берди. Ол муны ягшылык ве шөхрат билен бизи Чагыраны танамагымыз үчин этди.

⁴ Худай бизе җуда гымматлы бейик вадалары берди. Ол бу вадалар аркалы сизиң бу дүнйәдәки эрбет хөвеслерден дөрейән азгынчылыкдан гача дуруп, Өзүниң тебигатына шәрик болмагыңызы ниет этди.

^5-7 Шоңа гөрә-де, иманыңызда хас хем беркемәге җан эдиң. Шейдип, иманыңызда ахлак пәклигини, ахлак пәклигинде билими, билимде өзерклилиги, өзерклиликде чыдамлылыгы, чыдамлылыкда худайхонлыгы, худайхонлыкда мәхрибанлыгы, мәхрибанлыкда Худайың сөйгүсини артдырмага дырҗашың.

⁸ Шу говы хәсиетлер сизде бар болса ве көпелсе, онда сиз Реббимиз Иса Месихи танамакда бикәр хем хасылсыз галмарсыңыз.

⁹ Кимде бу хәсиетлер ёк болса, ол узагы гөрйән дәлдир, хатда көрдүр, өңки гүнәлеринден тәмизленендигини унудандыр.

¹⁰ Шонуң үчин хем, эй, доганлар, Худай тарапындан чагырыланларың ве сайлананларың арасындадыгыңызы субут этмәге ыхлас эдиң. Шейле этсеңиз, асла имандан дәнмерсиңиз.

¹¹ Шонда Реббимиз ве Халасгәримиз Иса Месихиң эбеди шалыгына гирмек хукугы сизе болдан-бол эчилер.

Мукаддес Язгылардан өврениң

¹² Сиз бу затлары билсеңиз-де, өзүңиздәки хакыкатда берк дурсаңыз-да, мен булары сизе хемише ятладып дурарын.

¹³ Мен шинди яшаян вагтлайын чадырымдан, ягны беденимден гидйәнчәм, булары ядыңыза салмак билен сизиң аңыңызы оярып дурмагы догры хасаплаярын.

¹⁴ Себәби Реббимиз Иса Месихиң маңа билдириши ялы, бу паны чадырымдан басым гөчмелидигими билйәрин.

¹⁵ Гөченимден соңам бу затлары элмыдама яда салмагыңыз үчин җан эдерин.

¹⁶ Сизе Реббимиз Иса Месихиң гудрат билен гелши хакда хабар беренимизде, биз тослама эртекилере эермедик. Биз Онуң шан-шөхратыны өз гөзүмиз билен гөрдүк.

¹⁷ Шан-шөхратлы Худайдан Оңа: «Бу Мениң сөвер Оглумдыр, Мен Ондан гаты разыдырын» диен сес геленде, Огул Атамыз Худайдан хормат ве шөхрат кабул этди.

¹⁸ Онуң билен биле мукаддес дагдакак, гөкден гелен бу сеси биз хем эшитдик.

¹⁹ Шейлеликде, пыгамберлериң хабары бизиң үчин ене-де ынамдардыр. Тә Гүн догянча ве даң йылдызы калбыңыза нур чайянча, түмлүкде ягты сачян нур дей оңа үнс бериң!

²⁰ Озалы билен шуны билип гоюң: Мукаддес Язгылардакы пыгамберлик сөзлери пыгамберлериң өз дүшүнҗесинден гелип чыкан дәлдир.

²¹ Себәби хич бир пыгамбер ынсан ислеги билен велилик этмеди. Бу пыгамберлер Мукаддес Рух тарапындан угрукдырылып, Худайдан гелен сөзлери айтдылар.