2 Patyşalar 23 - Мукаддес Китап

23‑нҗи бап Ёшыя бутпаразчылыгың соңуна чыкяр

¹ Онсоң Ёшыя патыша Яхуданың ве Иерусалимиң яшулуларының барыны чагырдып, өз янына топлады.

² Ёшыя патыша бүтин яхуда халкы, бүтин Иерусалим илаты, руханылар, пыгамберлер, улудан-кичә бүтин халк билен Реббиң өйүне гитди. Патыша Реббиң өйүнден тапылан Әхт китабындакы сөзлери олара сесли окап берди.

³ Ёшыя сүтүниң гапдалында дуруп, Реббиң табшырыкларыны, перманларыны, парзларыны бүтин калбы билен, бүтин җаны-тени билен берҗай эдип, Реббиң ызына эерҗекдигине хем-де шу әхт барада китапда язылан сөзлери берҗай этҗекдиклери хакда Реббиң хузурында Онуң билен әхт эдишди. Бүтин халк хем бу әхти оңлады.

⁴ Багала, Ашера ве әхли асман җисимлерине сежде этмек үчин эдилен гап-гачларың барыны Реббиң ыбадатханасындан чыкармак барада Ёшыя патыша баш руханы Хилкия, икинҗи дереҗели руханылара ве гапы сакчыларына табшырык берди. Онсоң шол гап-гачларың барыны Иерусалимиң дашында, Кидрон дересинде якып, оларың күлүни Бейтеле әкитдилер.

⁵ Яхуда патышаларының яхуда галаларының ве Иерусалимиң төверегиндәки сеждегәхлерде якымлы ыслы түтетги якмак үчин белленен бутпараз руханылары, шейле хем Багала, Гүне, Ая, йылдызлара ве тутуш асман җисимлерине садакалар хөдүрлейән руханылары везипелеринден бошатды.

⁶ Ол Ашера бутуны Реббиң өйүнден Иерусалимиң дашына, Кидрон дересине чыкарып, шол ерде якды. Онсоң оны енҗип, күл эдип, күлүни адамларың габырларының үстүне сепди.

⁷ Ёшыя Реббиң өйүнде болан азгын эркеклериң өйлерини-де йыкды. Ол ерде аяллар Ашера үчин докма ишлерини эдйәрдилер.

⁸ Ёшыя яхуда галаларындан әхли руханылары гетирип, Гебадан Беершеба ченли руханыларың якымлы ыслы түтетги якян сеждегәхлерини харама чыкарды. Ёшыя шәхер хәкими Ешуваның шәхер дервезесиниң чеп тарапындакы гирелгесиндәки сеждегәхлери ёк этди.

⁹ Сеждегәхлериң руханыларына Реббиң Иерусалимдәки гурбанлык сыпасында Реббе гуллук этмәге ругсат эдилмесе-де, олар бейлеки руханыларың үлүшинден петир ийип билйәрдилер.

¹⁰ Ёшыя патыша хич ким оглуны я-да гызыны Молек үчин отдан гечирмесин дийип, Бенхинном дересиндәки Топет диен ерини-де мурдар этди.

¹¹ Патыша Реббиң өйүниң гирелгесинден Яхуда патышалары тарапындан Гүне чокунмага багышланан атларың хейкелини айырды, атлар Натанмелек эмелдарың ховлусының янындады, шейле хем ол Гүне сежде этмек үчин уланылян арабалары якды.

¹² Ёшыя Яхуда патышалары тарапындан салнан Ахазың ёкаркы гатдакы җайының үчегинде болан гурбанлык сыпаларыны ве Манашаның Реббиң өйүниң ики ховлусында салан гурбанлык сыпаларыны йыкып, олары күл-пеекун этди. Ол гурбанлык сыпасының дөвүк бөлеклерини Кидрон дересине ташлады.

¹³ Ысрайыл патышасы Сүлейманың Иерусалимиң гүндогарындакы Хеләк дагының гүнортасында, сидонлыларың йигренҗи худайы Ашторет үчин, Мовабың йигренҗи буты Кемош үчин, аммонларың йигренҗи буты Милком үчин гуран сеждегәхлерини патыша харамлады.

¹⁴ Ёшыя патыша дикме дашлары күл-пеекун эдип, Ашера бутларыны чапып, оларың ерлерини адам сүңклери билен долдурды.

¹⁵ Шейле хем ол Ысрайыла гүнә этдирен Небадың оглы Яробгамың Бейтелде гуран гурбанлык сыпасыны сеждегәх билен бирликде йыкды. Ёшыя сеждегәхи күл-пеекун эдип, оны якды ве Ашера бутуны хем якды.

¹⁶ Ёшыя төверегине середенде, шол ердәки даглыкдакы мазарлыгы гөрди. Онсоң ол шол ере адам иберип, Реббиң Худайың адамының үсти билен айдан сөзүне гөрә сүңклери мазарлардан чыкартды ве олары гурбанлык сыпасының үстүнде якып, гурбанлык сыпасыны харам этди.

¹⁷ Онсоң Ёшыя патыша гала адамларындан: «Мениң бу гөрйән хейкелим нәме?» дийип сорады. Олар оңа: «Бу Яхудадан гелен хем-де сениң Бейтелдәки гурбанлык сыпасының гаршысына эден ишлериң барада пыгамберлик эден Худайың адамының габрыдыр» дийип җогап бердилер.

¹⁸ Ёшыя патыша: «Оны өз гүнүне гоюң, хич ким онуң сүңклерине эл дегирмесин» дийип табшырык берди. Шейдип, адамлар Худайың адамының сүңклери билен Самариядан гелен пыгамбериң сүңклерине эл дегирмедилер.

¹⁹ Мундан башга-да Ёшыя Самарияның галаларындакы әхли сеждегәхлери ёк этди. Ол ерлери Ысрайыл патышалары гуруп, Реббиң гахарыны гетирипдилер. Ёшыя Самариядакы сеждегәхлери-де, эдил Бейтелдәки гурбанлык сыпасыны эдиши ялы этди.

²⁰ Ёшыя патыша ол ердәки әхли сеждегәхлериң руханыларыны гурбанлык сыпаларының үстүнде өлдүрип, гурбанлык сыпаларының үстүнде адам сүңклерини якды. Шондан соң Ёшыя Иерусалиме доланып гелди.

Ёшыя Песах байрамыны беллейәр

²¹ Патыша бүтин халка табшырык берип: «Бу әхт китабында язылышы ялы Худайыңыз Реббе багышлап, Песах байрамыны белләң» дийди.

²² Ысрайылы доландыран сердарларың дөвүрлеринден бәри Яхуда ве Ысрайыл патышаларының бүтин өмрүнде бу Песах байрамы ялы байрам хич хачан белленилмәнди.

²³ Эмма Ёшыя патышаның шалыгының он секизинҗи йылында бу байрам Иерусалимде Реббе багышлап белленилди.

²⁴ Шейле хем Ёшыя Хилкия руханының Реббиң өйүнден тапан китабында язылан канунда айдылан затлары берҗай этмек үчин, Яхудада, Иерусалимде эдилйән әхли неҗис ишлериң, әхли өй бутларының, бейлеки бутларың, палчыларың, җадыгөйлериң барының соңуна чыкды.

²⁵ Реббе Мусаның канунына лайыклыкда бүтин калбы, бар гүйҗи билен җан-тенден гуллук эден Ёшыя ялы патыша ондан өң хем, соң хем болмады.

²⁶ Манашаның Реббиң гахарыны гетирип, эден пис ишлери зерарлы Онуң Яхуда гаршы туташан газабы энтек хем соваманды.

²⁷ Реб шейле дийди: «Мен Ысрайылы хузурымдан ёк эдишим ялы, Яхуданы-да хузурымдан ёк эдерин. Мен сайлан шәхерим Иерусалими ве „Маңа шу ерде ыбадат эдилер“ диен өйүми-де терк эдерин».

Ёшыяның өлүми

²⁸ Ёшыяның патышалыгы барадакы башга вакалар ве әхли эден ишлери яхуда патышаларының йыл язгыларында языландыр.

²⁹ Ёшыя патышаның дөврүнде Мүсүриң патышасы фараон Неко Ашур патышасына көмек бермек үчин, Евфрат дерясына тарап ёла дүшди. Ёшыя хем оны гаршыламага гитди. Эмма фараон Неко Ёшыя Мегидода саташып, оны шол ерде өлдүрди.

³⁰ Ёшыяның хызматкәрлери онуң җеседини Мегидодан арабалы Иерусалиме гетирип, өз губурында җайладылар. Юрдуң бүтин илаты Ёшыяның оглы Ехогахазы гетирип, башына яг гуюп, какасының ерине патыша гойдулар.

Яхуда патышасы Ехогахаз

³¹ Ехогахаз патыша боланда йигрими үч яшындады. Ол Иерусалимде үч ай патышалык этди. Онуң эҗеси Хамутал либналы Ермеяның гызыды.

³² Ехогахаз ата-бабалары ялы Реббиң назарында йигренҗи ишлери этди.

³³ Фараон Неко Иерусалимде патышалык этмесин дийип, Хамат юрдуның Рибла диен еринде, Ехогахазы есир алды. Ол юрдуң башына бир йүз етмиш батман күмүш, бир ярым батмана голай хем алтын салгыт салды.

³⁴ Фараон Неко Ёшыяның оглы Элякымы какасы Ёшыяның ерине патыша этди ве онуң адыны үйтгедип, Ехоякым гойды. Соңра ол Ехогахазы алып, Мүсүре гелди. Ехогахаз шол ерде өлди.

³⁵ Ехоякым фараона күмүш билен алтын берди. Ол фараон Неконың табшырыгыны ерине етирмек үчин юрда салгыт салып, яхуда халкының хер биринден байлыгына гарап, алтын ве күмүш алды.

Яхуда патышасы Ехоякым

³⁶ Ехоякым патыша боланда йигрими бәш яшындады. Ол Иерусалимде он бир йыл патышалык этди. Онуң эҗеси Зебида румалы Педаяның гызыды.

³⁷ Ехоякым эдил ата-бабалары ялы Реббиң назарында йигренҗи ишлери этди.