2 Korintoslylar 9 - Мукаддес Китап

9-нҗы бап

¹ Худайың Иерусалимдәки йыгнакларына пул ярдамыны бермек барада сизе язмагың гереги ёк.

² Чүнки мен сизиң ярдам этмекдәки ыхласыңызы билйәрин. Мен: «Ахая велаяты гечен йылдан бәри тайярдыр» дийип, македониялылара сиз бабатда магтанярын. Сизиң шейле ыхласыңыз көплери хөвеслендирди.

³ Мен доганлара сизиң тайярдыгыңыз ве пул көмегиниң эййәм йыгналандыгыны айдыпдым. Ине, шу затлара гөз етирмек үчин, олары сизиң яныңыза иберйәрин. Мен сиз барадакы магтанҗымың ялан болуп чыкмагыны исләмок.

⁴ Ёгса македониялылар мениң билен барып-да, сизиң тайяр дәлдигиңизи гөрселер, сиз бабатда шейле ынамлы гүрләнимизе гаты утанарыс. Сиз барада гүррүң-де ёк!

⁵ Шоңа гөрә-де, вада эдилен хемаятыңызың тайярдыгына гөз етирмек үчин, өзүм бармаздан өң доганларымызы яныңыза ибермели диен карара гелдим. Йөне мен хемаятыңызың меҗбуры дәл-де, гөвүнҗеңлик билен берлен пешгеш болмагыны ислейәрин.

⁶ Шуны унутмаң: гысганып экйән аз оряндыр, сахылык билен экйән, бол оряндыр.

⁷ Гөвүнсизлик я меҗбурлык билен дәл-де, хер кес гөвнүнден чыкараныны берсин. Чүнки Худай гөвүнҗеңлик билен берйәни халаяндыр.

⁸ Хемише хемме задыңыз етерлик болуп, ислендик ягшы ише бол мүмкинчилигиңиз болар ялы, Худай сизе мерхеметини болдан-бол бермеги башаряндыр.

⁹ Бу бабатда Мукаддес Язгыларда шейле языландыр: «Ол сахылык билен пайлады, мәтәҗе берди, онуң догрулыгы довам эдер эбеди».

¹⁰ Худай дайханың экҗек тохумыны, ийҗек чөрегини етирйәндир. Шоңа гөрә-де, Ол сизиң экениңизи болдан-бол артдырып, догрулыгыңызың бол хасылыны етишдирмеги хем башарар.

¹¹ Сиз хер затда сахы болуп билериңиз ялы, әхли зада бай боларсыңыз. Биз сизиң сахы пешгешиңизи элтип беренимизде, көп адамлар Худая шүкүр эдерлер.

¹² Чүнки сизиң бу хемаятыңыз Худайың халкының мәтәчликлериниң өвезини долдурмак билен чәкленмән, эйсем Худая эдилйән шүкүрлериң долуп-дашмагына хем себәп болар.

¹³ Сизиң бу хемаятыңыз Иса Месих барадакы Хош Хабара садыкдыгыңызы субут эдйәр. Сиз элде барыңызы олара ве бейлеки иманлылара сахылык билен эчилйәрсиңиз. Ине, шуларың бары үчин Худайың халкы Оны шөхратландырар.

¹⁴ Худайың сизе берен болдан-бол мерхеметини гөрүп, олар сизиң үчин дога-дилеглер эдерлер, сизиң билен дидарлашмагы күйсәрлер.

¹⁵ Худайың шейле аҗайып пешгеши үчин Оңа шүкүрлер болсун!