2 Korintoslylar 5 - Мукаддес Китап

5‑нҗи бап Гөкдәки месгенимиз

¹ Бизиң шинди яшаян паны чадырымыз, ягны беденимиз хер хачан вейран болса-да, гөкде эл билен ясалмадык, Худайың тайынлан бакы месгенимизиң бардыгыны билйәрис.

² Биз өлмән, шол гөкдәки месгенимизе шу вагт бесленмеги күйсәп, ах чекйәрис.

³ Йөне гөкдәки месгенимизе бесленмәнкәк паны чадырымыздан дынмалы болайсак-да, асла ялаңач болмаҗакдыгымыза гөзүмиз етйәр.

⁴ Эмма хәзирликче бу паны чадырымызда болуп, хасрат чекйәрис, гөрги гөрйәрис, себәби бу паны чадырымыздан дынасымыз геленок. Терсине, Худайың тайынлан месгенине бесленип, бакы яшайша өлмәнкәк говушмагы күйсейәрис.

⁵ Чүнки Худай бизи бакы яшайша говушмагымыз үчин ярадып, мунуң кепили хөкмүнде бизе Мукаддес Рухуны берди.

⁶ Шонуң үчин-де, беденимизде яшаян вагтымызда Реббиң янындакы месгенимизден узакдадыгымызы билсек-де, аркайындырыс.

⁷ Чүнки биз гөрйән затларымыза гөрә дәл-де, имана гөрә яшаярыс.

⁸ Хава, бүтинлей аркайындырыс. Биз Реббиң янында месген тутуп билеримиз ялы, беденден айрыланымызы говы гөрйәрис.

⁹ Эмма паны беденде яшасак-да, бакы месгене бесленсек-де, Худайың гөвнүнден турмагы максат эдинйәрис.

¹⁰ Чүнки ягшы болсун, яман болсун, пархы ёк, бедендекәк эден ишлеримизе лайык пайымызы алмак үчин, хеммәмиз Иса Месихиң хөкүм күрсүсиниң өңүнде дурмалыдырыс.

Худай билен ярашың!

¹¹ Биз Худайдан горкмагың нәмедигини биленимиз үчин, башгалары хем тоба этмелидиги барасында ынандырҗак болярыс. Бизиң нәхилидигимиз Худая әшгәрдир. Бу сизиң ынсабыңыза хем әшгәрдир диен умыдым бар.

¹² Биз ене-де өңүңизде өвүнмекчи боламзок. Йөне пәк йүреклери билен дәл-де, дашкы гөрнүши билен өвүнйәнлере җогап берип, биз бабатда өвнүп билмегиңиз үчин сизе тутарык берйәрис.

¹³ Биз акылдан азашан кимин гөрнен болсак, бу Худайы шөхратландырмак үчиндир; эгер акыллы гөрнен болан болсак, бу сизиң үчиндир.

¹⁴ Эгер бир Адам хеммелер үчин өлен болса, онда хеммәмиз өлендирис. Шейле пикире гелелимиз бәри Иса Месихиң сөйгүси бизи херекет этмәге хөвеслендирйәр.

¹⁵ Хава, Иса Месих хеммелериң угрунда өлди. Ол муны яшаянлар инди өзлери үчин дәл-де, оларың угрунда өлен ве дирелен Месих үчин яшасынлар дийип этди.

¹⁶ Шонуң үчин-де, биз инди хич киме ынсан нукдайназарындан гарамаярыс. Эгер Иса Месихе хем озал шу нукдайназардан гаран болсак, мундан бейләк гарамарыс.

¹⁷ Шоңа гөрә-де, ким Иса Месихе дегишли болса, ол тәзе ярадылышдыр. Көнеси гечип гитди, инди тәзеси гелди!

¹⁸ Буларың бары Худайдандыр. Ол Иса Месих аркалы бизи Өзи билен ярашдырып, бизе ярашдырма хызматыны табшырды.

¹⁹ Хава, Худай ынсанларың гүнәлерини хасаба алман, Иса Месих аркалы дүнйәни Өзи билен ярашдырды. Ярашдырма барадакы хабарыны болса бизе табшырды.

²⁰ Шоңа гөрә-де, биз Иса Месихиң илчилеридирис. Худай биз аркалы йүзленйәр. Биз сизе Месихиң хатырасына ялбарярыс: Худай билен ярашың!

²¹ Биз Иса Месих аркалы Худайың догрулыгы боларымыз ялы, Ол бизиң гүнәлеримизи асла гүнә этмедик Иса Месихиң үстүне йүкледи.