1 Şamuwel 31 - Мукаддес Китап

31‑нҗи бап Шавулың ве онуң огулларының өлүми

¹ Пилиштлилер Ысрайылың гаршысына сөвеш этди. Ысрайыллар пилиштлилерден гачып, Гилбова дагында көпүси гырылды.

² Пилиштлилер Шавулың ве онуң огуллары Ёнатаның, Абынадабың хем-де Малкышуваның ызындан ковуп етип, онуң огулларыны өлдүрдилер.

³ Шавула гаршы сөвеш гүйчленди, яйчылар оны тапдылар ве агыр яраладылар.

⁴ Шавул ярагчы нөкерине шейле дийди: «Гылыҗыңы ал-да, мени өлдүр; сүннетсизлериң элинден өлүп, олара гөз болмайын». Эмма онуң ярагчы нөкери җуда горкды ве бейле этмек ислемеди. Шоңа гөрә, Шавул өз гылыҗыны алды-да, онуң үстүне өзүни оклады.

⁵ Шавулың өлендигини гөрен ярагчы нөкери-де өз гылыҗының үстүне өзүни оклап, онуң билен биле өлди.

⁶ Шейдип, Шавулың өзи, үч оглы, ярагчы нөкери хем-де әхли адамлары бир гүнде өлдүлер.

⁷ Ысрайылың еңлип гачандыгыны, Шавулың хем онуң огулларының өлендигини гөрүп, җүлгәниң бейлеки тарапында ве Иордан дерясының аңырсында яшаян ысрайыллар өз галаларыны ташлап гачдылар; пилиштлилер гелип, олары эеледилер.

⁸ Эртеси гүн пилиштлилер өлдүриленлери таламак үчин геленлеринде, Гилбова дагындан Шавул билен онуң үч оглуның җеседини тапдылар.

⁹ Олар Шавулың келлесини кесип, ярагыны алдылар ве бутханаларына хем-де халкына хабар бермек үчин, тутуш пилиштлилериң юрдуна чапарлар гөндердилер.

¹⁰ Шавулың ярагыны Ашторет худайларының бутханасында гойдулар, җеседини болса Бейтшеян галасының диварындан асып гойдулар.

¹¹ Пилиштлилериң Шавула эденлерини Гилгатдакы Ябешиң илаты эшиденде,

¹² онуң гайдувсыз адамларының әхлиси аяга галды. Олар узак гиҗе йөредилер. Барып, Шавулың хем онуң огулларының җесетлерини Бейтшеян галасының диварындан айырдылар; Ябеше гелип, җесетлери шол ерде якдылар.

¹³ Соңра оларың сүңклерини гетирип, Ябешдәки йылгының ашагында гөмдүлер ве еди гүнләп агыз бекледилер.