1 Şamuwel 29 - Мукаддес Китап

29-нҗы бап Пилиштлилер Давуда ынанмазчылык эдйәрлер

¹ Пилиштлилер өз гүйчлерини Апекде җемледилер, ысрайыллар болса Йизрегелдәки чешмәниң боюнда орнашдылар.

² Пилиштли ханлар йүз ве мүң адамлык топарлары билен барярдылар; Давут ве онуң адамлары Акыш хан билен биле ыздан гелйәрдилер.

³ Пилиштли баштутанлар: «Еврейлер бу ерде нәме ишлейәр?» дийдилер. Акыш хан олара шейле җогап берди: «Онуң Ысрайылың шасы Шавулың гулы Давутдыгыны сиз билйәрсиңиз ахырын. Бир йылдан говурак вагт бәри ол мениң янымда. Гелен гүнүнден тә шу гүне ченли мен онуң ярамаз иш эденини гөрмедим».

⁴ Пилиштли баштутанлар онуң үстүне хеңкирип, шейле дийдилер: «Оны ыза, өз белленен ерине уграт. Ол бизиң билен биле сөвеше гитмесин, ёгса ол бизиң гаршымыза уршар. Себәби өз хоҗайынына говы гөрүнмек үчин, онуң шу адамларың келлесини кесмекден говы тәр тапҗак гүманы бармы нәме?

⁵ „Шавул мүңүсини өлдүрди, Давут болса он мүңүсини“ дийлип, өзи хакда танс эдилип, айдым айдылан Давут дәлми бу?»

⁶ Шондан соң Акыш хан Давуды чагырып, оңа шейле дийди: «Ребден ант ичйәрин, сен бир догручыл адам. Маңа галса сениң билен биле сөвеше гидердим. Яныма гелен гүнүңден тә шу гүне ченли сенден ярамазлык чыканыны гөрмедим. Шонда-да ханлара яранып билмейәрсиң.

⁷ Инди парахатлык билен ызыңа долан, пилиштли ханларың гаңыршына гайтма».

⁸ Давут Акыш хана шейле җогап берди: «Мениң эден задым нәме? Яныңа гелен гүнүмден тә шу гүне ченли сен өз гулуңдан нәме эрбетлик тапдың? Нәме үчин мен өз җенабың, патышаның душманлары билен сөвешмели дәл?»

⁹ Акыш хан Давуда шейле җогап берди: «Сениң эдил Худайың перишдеси ялы пәкдигиңи билйәрин. Йөне пилиштли баштутанлар: „Ол бизиң билен биле сөвеше гитмесин“ дийдилер.

¹⁰ Инди сен ве яныңда гелен патышаңың гуллары даң билен туруп, мениң сиз үчин беллән ериме гидиң. Ярамаз хабары болса гөвнүңе алма, чүнки мен сенден разы. Эртир даң ягтылан бадына ёла дүшүң».

¹¹ Шейлеликде, Давут адамлары билен биле пилиштлилериң юрдуна тарап уграды. Пилиштлилер болса Йизрегеле гитдилер.